ទម្លាយរឿងពិតសាលាកម្សត់ ប្រក់ស្បូវ សិស្សរៀនជាង ៣០០នាក់ ខុសពីសារតាមហ្វេសប៊ុក
- 2018-07-05 09:40:00
- ចំនួនមតិ 0 | ចំនួនចែករំលែក 0
ទម្លាយរឿងពិតសាលាកម្សត់ ប្រក់ស្បូវ សិស្សរៀនជាង ៣០០នាក់ ខុសពីសារតាមហ្វេសប៊ុក
ចន្លោះមិនឃើញ
ថ្មីៗនេះ មានការចែកចាយព័ត៌មានតគ្នា បង្កការភ្ញាក់ផ្អើល តាមបណ្ដាញសង្គមហ្វេសប៊ុក អំពីជ្រុង១ នៃសាលារៀនកូនក្មេងតូចៗ កម្សត់ប្រក់ស្បូវ និងមានលិចដំបូលធ្លុះធ្លាយ១កន្លែង នៅភូមិត្រាច ឃុំបាល្លង ស្រុកប្រាសាទបាគង ខេត្តសៀមរាប។
អ្នកចែកចាយ បានបង្ហាញអារម្មណ៍ខុសៗគ្នា តាមរយៈរូបភាព គ្មានប្រភពបកស្រាយ និងបានធ្វើឲ្យមានការយល់ច្រឡំ។
តាមការពិតដំណើររឿងមិនដូចការចែកចាយនោះឡើយ ដូច្នេះសាធារណជន មុនចែកចាយបន្ត សូមបង្កើនការប្រុងប្រយ័ត្ន។ នេះបើតាមការលើកឡើង របស់មន្ត្រីនៃការិយាល័យអប់រំស្រុកប្រាសាទបាគង។
**រឿងយល់ច្រឡំតគ្នា ចែកចាយតាមហេ្វសប៊ុក**
ដំណើររឿង គឺមានម្ចាស់គណនីហ្វេសប៊ុក១ មិនបានដឹងរឿងច្បាស់ បានចូលទៅបរិវេណអនុវិទ្យាល័យ និងបឋមសិក្សាស្រីវិបុលក្តេរិ៍។
គ្រាន់តែឃើញថ្នាក់រៀនប្រក់ស្បូវ រយីករយាក ធ្លុះធ្លាយដំបូលភ្លាម ក៏បានថតរូប អមដោយការសរសេរអក្សរភ្ជាប់ ក្នុងន័យថា អាជ្ញាធរសូមមើល និងយកចិត្តទុកដាក់ផង។
ចំណុចនេះ គឺបានបង្ហាញពីភាពអសកម្មរបស់មន្ត្រីអប់រំ ដែលផ្ទុយពីជាក់ស្ដែង។
ការពិត ត្រូវបានបកស្រាយ
ប្រភពពីលោក តាន់ វិច្ឆិការង្សី ប្រធានការិយាល័យអប់រំ យុវជន និងកីឡា ស្រុកប្រាសាទបាគង ខេត្តសៀមរាប បានផ្ដល់កិច្ចសម្ភាសតាមទូរសព្ទមក Sabay ថាចំពោះព័ត៌មានថ្នាក់រៀននេះ Sabay គឺជាស្ថាប័នទី១ ដែលបានទាក់ទងទៅលោក មុនចេញផ្សាយ ដើម្បីដឹងរឿងពិត មិនដូចព័ត៌មានផ្សេង ដែលបានចែកចាយគ្មានមូលដ្ឋានច្បាស់។
លោកបានបញ្ជាក់ថា ចំណុចនេះ អាចឲ្យកើតជាបញ្ហាផ្សេងៗ ដល់ថវិកាជំនួយសប្បុរសជន និងអាចមានអ្នកក្លែងបន្លំក៏ថាបាន។
លោក តាន់ វិច្ឆិការង្សី បញ្ជាក់ថា តាមការពិតថ្នាក់រៀននោះ គឺជាថ្នាក់បណ្ដោះអាសន្ន ឬហៅថារោងដោល មិនមែនទុកឲ្យសិស្សរៀនអចិន្ត្រៃយ៍ទេ។ សភាពគឺលិចទឹក ធ្លុះធ្លាយដំបូលមែន។ លោកបន្តថា រោងដោលនោះ មានសិស្សកំពុងរៀន ចំនួន២ថ្នាក់ សង់នៅជាប់អាគារថ្ម១។
តាមគម្រោងគឺ ត្រូវការថ្នាក់រៀន ដែលមាន២បន្ទប់បន្ថែម ហើយក្រុមការងារ កំពុងត្រៀមសាងសង់ក្រោមជំនួយ ឧបត្ថម្ភមួយផ្នែក នៃមូលនិធិ១ របស់ប្រទេសអូស្ត្រាលី ដែលនឹងចាប់ផ្ដើមនៅថ្ងៃទី ១០ ខែកក្កដា ឆ្នាំ២០១៨នេះ។
សូមបញ្ជាក់ថា អនុវិទ្យាល័យ និងបឋមសិក្សាស្រីវិបុលក្តេរិ៍ មានទីតាំងនៅក្នុងភូមិត្រាច ឃុំបាល្លង ស្រុកប្រាសាទបាគង ខេត្តសៀមរាប មានចម្ងាយប្រមាណ ២៦គីឡូម៉ែត្រ បើគិតពីក្រុងសៀមរាប នៃខេត្តសៀមរាប។
បច្ចុប្បន្នសាលានេះ មានអគារថ្ម ១ខ្នង មាន៥បន្ទប់ សម្រាប់សិស្សអនុវិទ្យាល័យ។ ចំណែក ១ខ្នង មាន៣បន្ទប់ទៀត របស់សិស្សបឋមសិក្សា និងមានចំនួនសិស្សសរុប ប្រមាណជាង ៣០០នាក់។
សិស្ស ២ថ្នាក់កំពុងរៀននៅរោងដោល ប្រក់ស្បូវ បណ្ដោះអាសន្ន។ បើទោះមានជំនួយខ្លះ ក៏សាលារៀននេះ នៅតែត្រូវការជំនួយមួយចំនួនទៀត ពីសប្បុរសជន ដូច្នេះលោកអ្នក អាចទាក់ទងបន្តជួយការងារសង្គមនេះ តាមរយៈលេខ ០១២ ៧១ ៧០ ៩០។
នេះបើតាមការបញ្ជាក់របស់លោក តាន់ វិច្ឆិការង្សី ប្រធានការិយាល័យអប់រំ យុវជន និងកីឡា ស្រុកប្រាសាទបាគង ខេត្តសៀមរាប។