អម្បាញ់មិញ​នេះ សហភាព​នៃ​សមាគម​បាល់ទាត់​អឺរ៉ុប​ហៅ​កាត់​ថា UEFA បាន​ប្រកាស​ជា​ផ្លូវ​ការ​នូវ​ការ​ផ្លាស់​ប្ដូរ​ធំ​មួយ ក្នុង​កម្មវិធី Champions League ចាប់​ពី​រដូវ​កាល ២០១៨/១៩ ត​ទៅ។

ការ​ផ្លាស់​ប្ដូរ​នោះ គឺ​ការ​អនុញ្ញាត​ឲ្យ​មាន​ការ​ដូរ​ចូល​នូវ​កីឡាករ​ទី ៤ ក្នុង​ការ​ប្រកួត​ដែល​ឈាន​ដល់​វគ្គ​ថែម​ម៉ោង។

ការ​ផ្លាស់​ប្ដូរ​នេះ ក៏​នឹង​កើត​ឡើង​ផង​ដែរ​ ក្នុង​កម្មវិធី​អឺរ៉ុប​បាល់ទាត់​ផ្សេង​ទៀត រួម​មាន​ Europa League, UEFA Super Cup, the Women's Champions League, European Championship និង European Women's Championship។

ដោយ​ឡែក​ចំពោះ​កម្មវិធី UEFA Youth League, European Championship សម្រាប់​ឈុត​យុវជន​វ័យ​ក្រោម ១៧ និង ១៩​ឆ្នាំ ស្ថាប័ន​បាល់ទាត់​កំពូល​អឺរ៉ុប​មួយ​នេះ បាន​ដាក់​ចេញ​នូវ​ការ​អនុញ្ញាត​ឲ្យ​មាន​ការ​ដូរ​កីឡាករ​ចំនួន ៥ ដង ក្នុង​ប្រកួត​ដែល​មាន​ការ​ថែម​ម៉ោង។

សូម​បញ្ជាក់​ផង​ដែរ​ថា ការ​អនុញ្ញាត​ឲ្យ​មាន​ការ​ដូរ​ចូល​នូវ​កីឡាករ​ទី ៤ ក្នុង​ប្រកួត​ថែម​ម៉ោង ត្រូវ​បាន​អនុវត្ត​រួចហើយ​ក្នុង​កម្មវិធី World Cup លើក​នេះ៕