ឆមាសទី១ឆ្នាំនេះ ភ្ញៀវធ្វើដំណើរតាមយន្តហោះមានប៉ុន្មាននាក់?

2018-07-06 03:48:50
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកដំណើរជាតិ និងអន្តរជាតិ ដែលបានឆ្លងកាត់តាមយន្តហោះមកកាន់ព្រះរាជាណាចក្រកម្ពុជា ក្នុងរយៈពេលឆមាសទី១ ឆ្នាំ២០១៨ មានចំនួន ៥លាន១សែននាក់ ខណៈចំនួនបានកើនឡើង ២៤% បើប្រៀបធៀបនឹងរយៈពេលដូចគ្នាកាលពីឆ្នាំ ២០១៧ កន្លង។

លោក ពេជ្រ សុប៉ុនតារា ប្រធានផ្នែកពង្រីកការហោះហើរនៅព្រលានយន្តហោះកម្ពុជា បានឱ្យដឹងថា តួលេខនេះរាប់បញ្ចូលចំនួនភ្ញៀវធ្វើដំណើរតាមព្រលានយន្តហោះទាំងបីរបស់កម្ពុជា គឺព្រលានយន្តហោះអន្តរជាតិភ្នំពេញ ព្រលានខេត្តសៀមរាប និងព្រលានយន្តហោះខេត្តព្រះសីហនុ។ ភ្ញៀវធ្វើដំណើរតាមព្រលានយន្តហោះអន្តរជាតិភ្នំពេញមានចំនួន២ លាន៦ សែននាក់ ឆ្លងកាត់ព្រលានយន្តហោះខេត្តសៀមរាបវិញមាន ២លាន ៣ សែននាក់ និងក្រៅពីនេះភ្ញៀវឆ្លងកាត់ព្រលានយន្តហោះខេត្តព្រះសីហនុ។

លោកមានសុទិដ្ឋិនិយមថា ចំនួនភ្ញៀវធ្វើដំណើរអាចរក្សាកំណើនបន្ថែមទៀត ខណៈក្រុមហ៊ុនអាកាសចរថ្មីពីរទៀតគ្រោងនឹងហោះហើរ ហើយក្រុមហ៊ុន ដែលកំពុងប្រតិបត្តិការស្រាប់ក៏គ្រោងពង្រីកជើងហោះហើរបន្ថែម។ “ខ្ញុំមានសុទិដ្ឋិនិយមថា ចំនួនភ្ញៀវអាចនឹងកើនឡើងបន្ថែមទៀត ព្រោះក្រុមហ៊ុនក្នុងស្រុកចំនួនពីរបន្ថែមទៀតគ្រោងបើកការហោះហើរ។ ចំណែកក្រុមហ៊ុនចាស់ក៏គ្រោងនឹងពង្រីកជើងហោះហើរផងដែរ”។

បច្ចុប្បន្ននេះកម្ពុជាមានក្រុមហ៊ុនអាកាសចរប្រមាណ៤០ ក្រុមហ៊ុនកំពុងប្រតិបត្តិការ ខណៈក្រុមហ៊ុនក្នុងស្រុកមានចំនួន ៨ ក្រុមហ៊ុន។ នេះបើតាមការបញ្ជាក់របស់លោក ពេជ្រ សុប៉ុនតារា ប្រធានផ្នែកពង្រីកការហោះហើរនៅព្រលានយន្តហោះកម្ពុជា។

ទាក់ទងនឹងការកើនឡើងនេះសម្រាប់លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានថ្លែងថា កំណើនភ្ញៀវហោះហើរមកកម្ពុជាបង្ហាញពីសញ្ញាវិជ្ជមានសម្រាប់វិស័យទេសចរនៅកម្ពុជាហើយបរទេសគេស្គាល់ពីប្រទេសកម្ពុជា និងការរីកចម្រើនសេដ្ឋកិច្ចក៏ដូចជាស្ថិរភាពនយោបាយក្នុងស្រុក។

លោកស្រីបន្ថែមថា សមាគមទីភ្នាក់ងារទេសចរស្វាគមន៍ ផងដែរ ដែលកម្ពុជាមានការរីកចម្រើនលើសវិស័យអាកាសចរ ហើយជាពិសេសនោះ អាកាសចរចិនតែម្ដង ដែលបានហោះហើរត្រង់មកកាន់ប្រទេសកម្ពុជាបានជាច្រើនជើង។

នៅក្នុងឆ្នាំ ២០១៧ ភ្ញៀវទេសចរចិនបានឈរនៅលំដាប់ឈានមុខគេដែលមានរហូតដល់ជាង ១,២ លាននាក់ កើនឡើង ៤៥,៩ ភាគរយធៀបនឹងឆ្នាំ២០១៦ ហើយក្រសួងទេសចរណ៍កម្ពុជារំពឹងថានឹងទទួលបានទេសចរចិនបានចំនួនជាង ១ លាននាក់ ទៅ ២លាននាក់នៅឆ្នាំ ២០២០ខាងមុខ៕

អត្ថបទ៖ សុផល