ហេតុផល៣ដែលអ្នកគួរទៅទស្សនារឿង "បាតដៃខ្មៅ" ចុងសប្តាហ៍នេះ

2018-07-06 07:29:23
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកនិពន្ធ ម៉ីសន សុធារី ដែលបានតាក់តែងបណ្តាភាគនិទាន ពេជ្រ បណ្ឌិត ក៏ជាម្ចាស់បទនិពន្ធបាតដៃខ្មៅ លើកឡើងប្រាប់ Sabayថា ហេតុផលមួយចំនួនដែលយុវវ័យគួរទៅទស្សនាភាពយន្ត"បាតដៃខ្មៅ" ដែលកំពុងបញ្ចាំងនៅរោង។

នៅក្នុងភាពយន្តមួយ អ្នកគួររកឃើញនូវរូបបារម្មណ៍មិនធ្លាប់មាន មិនច្រឡំ មិនប្រដំប្រសងជាមួយអ្នកណា។ «ទី១ពេលខ្ញុំសរសេររឿងមួយ ខ្ញុំសួរខ្លួនឯង វាជារឿងហុងកុង ថៃ អាមេរិក ហ្វីលីពីន ឥណ្ឌា? អត់ទេ បាតដៃខ្មៅ ជារូបភាព ជាអារម្មណ៍ ជាមនោសញ្ចេតនាថ្មី ជាសកម្មភាពពិតរបស់ខ្មែរសម័យកាលនេះ ដែលមិនដូចកុនផ្សេងៗ! ឥទ្ធិពលដ៏សំខាន់របស់ប្រលោមលោករឿង បាតដៃខ្មៅ ទៅលើភាពយន្តនេះ គឺអ្នកដែលទស្សនាមិនអាចរកឃើញភាពច្រំដែល និងសកម្មភាពដែលអាចនឹងទស្សទាយត្រូវ! ទីពីរ នៅពេលស្ទូឌីយោ៤ទទួលយកការងារនេះ យើងយល់ស្របទំាងអស់គ្នាពីការធ្វើយ៉ាងណាឲ្យភាពយន្តនេះផ្សារភ្ជាប់ភាពជាក់ស្តែងក្នុងសង្គមខ្មែរ ចលនា ឥរិយាបថ ភាសា គឺជាអ្វីដែលពួកគាត់ធ្វើបានល្អបំផុតទំាងអ្នក Screenplay និងអ្នកដឹកនាំរឿង ទី៣ តារាចម្រៀងវ័យក្មេងរបស់យើងបានចុះសម្រុងគ្នាឥតខ្ចោះក្នុងការសម្តែងជាក្រុមតែមួយនៅក្នុងកុនដំបូងនៃជីវិតពួកគេ ហើយ សាយ ជេនរតនៈ តារាវីដ ម៉ានុត ធ្វើបានល្អបំផុត ហ្វេនទំាងអស់របស់ពួកគេនឹងមានមោទកភាពនៅពេលបានឃើញស្នាដៃរបស់ពួកគេ ដែលជាពួកគេពិតៗ មិនមែនស្រមោលនៃតួថៃ តួអាគំាង ឬស្រមោលចម្លងផ្សេងៗដែលយើងធ្លាប់ទៅមើលហើយខូចចិត្ត!»។

ភាពយន្ត បាតដៃខ្មៅ បាននាំមកនូវសន្ទុះជំនឿចិត្តថ្មីដល់បណ្តាផលិតករវ័យក្មេងរបស់ខ្មែរ ក្នុងរយៈពេលចុងក្រោយដែល Sabay បានប្រកាសពេញទំហឹងក្នុងការលើកកម្ពស់កម្លាំងចូលរួមរបស់យុវវ័យវិស័យភាពយន្តជាតិ។

នាយកប្រតិបត្តិ ជី សិលា លើកឡើងកាលពីខែមុនថា ទោះ "បាតដៃខ្មៅ" មានលទ្ធផលបែបណា កុនខ្មែរដែលជាស្នាដៃរបស់ក្រុមយុវវ័យនឹងចេញរូបរាងជាបន្តបន្ទាប់។

លោក មាស រស្មី អ្នកដឹកនាំរឿង បាតដៃខ្មៅ និងជាអ្នកបង្កើតផលិតកម្មស្ទូឌីយោ៤ ជាមួយមិត្តភក្តិ២នាក់ផ្សេងទៀត បានអះអាងថា ស្ទូឌីយោ មានមោទកភាពនឹងបញ្ចេញភាពយន្តថ្មីៗបន្ថែមក្នុងរូបភាពផ្សេងៗនាអនាគតដ៏ខ្លីខាងមុខ។

«យើងមិនអាចទៅសុំអង្វរឲ្យអ្នកណាម្នាក់ទៅទស្សនាកុនមួយដែលគេមិនចង់ រឹតតែមិនអាចបង្ខំយកទីផ្សារដោយសេចក្តីមានៈ តែយើងអាចយកឈ្នះការលំបាកអស់នេះ ដោយសារអ្នកទៅទស្សនានៅរោងជាយុវវ័យដែលឆ្លងកាត់ការទស្សនារឿងរាប់មិនអស់! គាត់ដឹងច្បាស់ ថាអ្វីទៅ Originalហើយអ្វីទៅជាស្រមោលលួចចម្លងគ្មានដួងព្រលឹងជារបស់ខ្លួនឯង!» អ្នកនិពន្ធបន្ថែម។

"បាតដៃខ្មៅ" បានចេញនៅគ្រប់រោងភាពយន្ត ចំពេលដែលកុនធំៗរបស់ថៃ និងអាមេរិកដូចជា Ant-Man អ្នកចម្បាំងញិកញ៉ក់។ល។ កំពុងសង្គ្រប់ព័ទ្ធលើ BoxOfficeកម្ពុជា។

យុវជន នី ពេញវុធ ទស្សនិកជនដែលមកទស្សនាថ្ងៃដំបូងនៅខេត្តសៀមរាបប្រាប់ Sabayថា គេរំភើបចំពោះពិធីបូជាក្បាលក្របី ប្រពៃណីយូរលង់របស់ខ្មែរ ដែលគ្មានកុនណាធ្លាប់ធ្វើ។ «ធ្លាប់តែឮពុកខ្ញុំប្រាប់ ពេលឃើញក្នុងរឿង បាតដៃខ្មៅ ព្រឺ ព្រឺមែនបង! រាងខ្លាច ខ្លាចពីក្នុងមកហ្មងបង!»។

ប្រភពពីរោងភាពយន្ត Major Cineplex ប្រាប់ Sabay នៅមុននេះបន្តិចថា តួលេខលក់សំបុត្ររបស់ បាតដៃខ្មៅ មានសន្ទុះល្អជាងការរំពឹងទុក ហើយបើធៀបនឹងកុនខ្មែរផ្សេងកាលពីពេលថ្មីៗនេះ រឿង បាតដៃខ្មៅ នៅក្រោមតែរឿងធ្មប់មួយតែប៉ុណ្ណោះ។ មកដល់សប្តាហ៍ទី២នេះ សន្ទុះអ្នកចូលមើលកើនឡើងនៅភ្នំពេញ ដែលកាលពីសប្តាហ៍មុន បណ្តាខេត្តមានខ្ពស់ជាង។

តោះ! ចាំអីទៀត? ទៅមើលរឿង បាតដៃខ្មៅ ទាំងអស់គ្នា ចុងសប្តាហ៍នេះ!

អត្ថបទៈ ពិសី