ភ្នាក់ងារ Ronaldo និយាយយ៉ាងណា អំពីពាក្យចចាមអារ៉ាមកីឡាករទៅចូលរួមជាមួយ Juventus?

2018-07-06 11:20:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ភ្នាក់ងារខ្សែប្រយុទ្ធ Cristiano Ronaldo លោក Jorge Mendes ថា បើកីឡាករពិតជាចាកចេញពី Real Madrid មែន គឺចេញដើម្បី "ដំណាក់កាល និងការប្រកួតប្រជែងថ្មីមួយទៀត"។

ភ្នាក់ងារខ្សែប្រយុទ្ធ Cristiano Ronaldo លោក Jorge Mendes

លោក Mendes បាននិយាយសារព័ត៌មានព័រទុយហ្គាល់ Record ថា៖ "ប្រសិន Cristiano Ronaldo ពិតជាចាកចេញពីក្លឹប Real Madrid មែន គេនឹងសម្ដែងការគោរពដឹងគុណជារៀងរហូតដល់ក្លឹប ប្រធាន ក្រុមទាំងមូល ក្រុមគ្រូពេទ្យ ព្រមទាំងអ្នកគាំទ្រទាំងអស់ទូទាំងពិភពលោក។ បើមានការចាកចេញពិតមែន គឺមកពី Ronaldo ចង់បានដំណាក់កាល និងការប្រកួតប្រជែងថ្មីមួយទៀត ក្នុងអាជីពដ៏ជោគជ័យរបស់គេ"។

សំដីដូច្នេះរបស់ភ្នាក់ងារ Ronaldo ធ្វើឡើង បន្ទាប់ពីមានរបាយការណ៍ជាច្រើនដែលថា Juventus កំពុងតាមទិញកីឡាករពីក្លឹប Ronaldo ក្នុងតម្លៃ ១០០ លានអឺរ៉ូ (ប្រមាណ ១១៦ លានដុល្លារសហរដ្ឋអាមេរិក)។ លើសពីនេះ កាលពីម្សិលមិញ អតីតថ្នាក់ដឹកនាំ Juventus ម្នាក់ ក៏បានបង្ហើបដែរថា បន្ទាប់ពីបាននិយាយជាមួយ "មនុស្សសំខាន់មួយចំនួន" លោកយល់ថា Ronaldo បានចុះ "កុងត្រារួចរាល់" ជាមួយក្លឹបយក្សអ៊ីតាលី។

សូមបញ្ជាក់ផងដែរថា Ronaldo បានចូលរួមជាមួយក្លឹបអេស្ប៉ាញ Real Madrid កាលពីឆ្នាំ ២០០៩។ ក្នុងរយៈពេល ៩ ឆ្នាំនៅក្លឹប កីឡាករស៊ុតចូល ៤៥០ គ្រាប់ ក្នុងការបង្ហាញខ្លួន ៤៣៨លើក៕

ប្រភព៖ Four Four Two ប្រែសម្រួល៖ ហ៊ីម រស្មី