ស្ត្រីខ្មែរមួយរូប ឈ្នះពានរង្វាន់ដល់ទៅ៣ ក្នុងវិស័យអចលនទ្រព្យ

2018-07-08 09:07:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីខ្មែរមួយរូប អ្នកនាង អាន សុធីតា ថ្នាក់ដឹកនាំជាន់ខ្ពស់នៃក្រុមហ៊ុនអចលនទ្រព្យលំដាប់អន្តរជាតិ CBRE Cambodia បានឈ្នះពានរង្វាន់ក្រុមហ៊ុនភ្នាក់ងារឆ្នើមចំនួន៣ ក្នុងកម្មវិធីម្ចាស់ពានរង្វាន់ភា្នក់ងារអចលនទ្រព្យកម្ពុជាលើកទី១ ឆ្នាំ២០១៨។

ស្ត្រីវ័យក្មេងរូបនេះ បញ្ចប់ការសិក្សាផ្នែកគណនេយ្យ តែមកចាប់ជំនាញលក់ក្នុងក្រុមហ៊ុនអចលនទ្រព្យអន្តរជាតិ ឲ្យដឹងថា ពានរង្វាន់ចំនួន ៣ រួមមាន ពានរង្វាន់ក្រុមហ៊ុនភ្នាក់ងារគ្រប់គ្រងអចលនទ្រព្យឆ្នើមប្រចាំឆ្នាំ ពានរង្វាន់ក្រុមហ៊ុនភ្នាក់ងារអចលនទ្រព្យអាជីវកម្មឆ្នើមប្រចាំឆ្នាំ និងពានរង្វាន់ភ្នាក់ងារឆ្នើម។

អ្នកនាង អាន សុធីតា

អ្នកជំនាញអចលនទ្រព្យស្ត្រីរូបនេះ បានចាប់ផ្ដើមការងារពីបុគ្គលិកសាមញ្ញ រហូតក្លាយជានាយិកាក្រុមហ៊ុនបរទេស រកស៊ីក្នុងវិស័យអចលនទ្រព្យ មិនមែនជាការងាយស្រួលឡើយ។ អ្នកនាងប្រាប់ថា ការជោគជ័យមកទល់ថ្ងៃនេះ ផ្ដើមចេញភាពស្មោះត្រង់ គោរពក្រមសីលធម៌វិជ្ជាជីវៈ និងធ្វើការងារដោយការស្រឡាញ់ចេញពីបេះដូង។

អ្នកនាងអាន សុធីតា គឺជាស្ត្រីកម្ពុជាពូកែម្នាក់ ដែលបានប្រឡូកក្នុងវិស័យអចលនទ្រព្យ និងបានកាន់កាប់គម្រោងលក់ជាច្រើនឲ្យក្រុមហ៊ុនអភិវឌ្ឍន៍នៅកម្ពុជាភាគច្រើនជាគម្រោងខុនដូ អគារការិយាល័យ និងផ្សារទំនើបជាដើម។

គួរជម្រាបថា ពានរង្វាន់ភា្នក់ងារអចលនទ្រព្យកម្ពុជាលើកដំបូងរបស់កម្ពុជានេះ មានចំនួន ៣០ ដែលមានក្រុមហ៊ុនភ្នាក់ងារចំនួន ១៥ បានឈ្នះ និងបានប្រកាសជាផ្លូវការកាលពីថ្មីៗ ក្រោមការរៀបចំដោយក្រុមហ៊ុន Realetstate.com ប្រចាំនៅកម្ពុជា ដោយគាំទ្រពីក្រសួងសេដ្ឋកិច្ច និងហិរញ្ញវត្ថុ និងសមាគមអ្នកវាយតម្លៃ និងភ្នាក់ងារអចលនទ្រព្យ។

អត្ថបទ៖ ស៊ិន សាវ៉េត

រូបភាព៖ Phearun Yin