ប្រធានសមាគម១ថា និស្សិតខ្មែរ មានសុវត្ថិភាព ខណៈទឹកជំនន់ដ៏អាក្រក់នៅជប៉ុន
- 2018-07-10 05:30:00
- ចំនួនមតិ 0 | ចំនួនចែករំលែក 0
ប្រធានសមាគម១ថា និស្សិតខ្មែរ មានសុវត្ថិភាព ខណៈទឹកជំនន់ដ៏អាក្រក់នៅជប៉ុន
ចន្លោះមិនឃើញ
ប្រធានសមាគមនិស្សិតខ្មែរ នៅប្រទេសជប៉ុន បានបញ្ជាក់ថាមកទល់ពេលនេះ មិនទាន់មានរបាយការណ៍និស្សិតខ្មែររងគ្រោះថ្នាក់ នៅក្នុងចំណោមខេត្តចំនួន៣ ក្នុងគ្រោះធម្មជាតិទឹកជំនន់ដ៏ធំ នៅភាគខាងលិច និងភាគកណ្ដាល នៃប្រទេសជប៉ុន។
គ្រោះធម្មជាតិនេះ បានបណ្ដាលឲ្យមានមនុស្សជាច្រើនបានបាត់ខ្លួន ស្លាប់ និងអាជ្ញាធរជម្លៀសមនុស្សជាង ៥លាននាក់ ទៅកាន់ទីសុវត្ថិភាព។
តាមរយៈសារអេឡិចត្រូនិក ឆ្លើយឆ្លងពីប្រទេសជប៉ុន លោក កាន់ ផាន់ណារិទ្ធ ប្រធានសមាគមនិស្សិតខ្មែរ នៅប្រទេសជប៉ុន បានផ្ដល់ព័ត៌មានមកកាន់ Sabay ថា ជំនន់ទឹកភ្លៀង និងការបាក់ដីដ៏ធំ បានកើតមាន នៅប្រទេសជប៉ុន ហើយខេត្តចំនួន៣ បានរងគ្រោះខ្លាំង ក្នុងចំណោមតំបន់ផ្សេង គឺខេត្ត Hiroshima, Okayama និង Ehime។
ក្នុងចំណោមខេត្តទាំង៣ មាន២ខេត្ត ដែលមាននិស្សិតខ្មែរ កំពុងមានវត្តមាន។ ហេតុការណ៍ដដែលនេះ មិនមាននិស្សិតខ្មែរ ណា១ មានបញ្ហា ឬរងគ្រោះថ្នាក់ទេ គឺសុខទុក្ខធម្មតា និងមានសុវត្ថិភាព។
នេះបើតាមព័ត៌មាន ដែលលោក កាន់ ផាន់ណារិទ្ធ និងក្រុមការងារ ទទួលបានតាមការហៅទូរសព្ទ។
លោកបន្តថា និស្សិតខ្មែរដែលមានសុវត្ថិភាព មានចំនួន១៣នាក់ កំពុងនៅក្នុងខេត្តចំនួន២ ដែលជាចំណុចកើតមានគ្រោះទឹកជំនន់។ នៅ ខេត្ត Hiroshima មាននិស្សិតខ្មែរ ៩នាក់ និង ៤នាក់ទៀត នៅខេត្ត Okayama។
លោកបញ្ជាក់ថា តួលេខនេះ គឺគិតតាមចំនួននិស្សិត ដែលធ្លាប់ផ្ដល់ព័ត៌មានស្ទង់មតិ មកកាន់សមាគមលោក កន្លងទៅ។
បើទោះជាយ៉ាងនេះក្ដី លោក កាន់ ផាន់ណារិទ្ធ បានបញ្ជាក់ថា បច្ចុប្បន្នសមាគមលោក កំពុងសហការជាមួយស្ថានទូតខ្មែរនៅប្រទេសជប៉ុន ក្នុងករណីមាននិស្សិត ឬជនជាតិខ្មែរធ្វើការផ្នែកផ្សេងទៀតទាំងអស់ ជួបបញ្ហា ឬករណីបន្ទាន់ ណាមួយ នៅក្នុងតំបន់ដែលកំពុងទទួលរងឥទ្ធិពលទឹកជំនន់ និងបាក់ដី។
សូមទាក់ទងស្ថានទូតជាបន្ទាន់តាមរយៈ ហ្វេសប៊ុក របស់ស្ថានទូត ដែលមានឈ្មោះ Royal Embassy of Cambodia in Japan ឬតាមរយៈ
១. ឯកឧត្ដម តាំង ផេងរិទ្ធី ទីប្រឹក្សាទទួលបន្ទុកពលករ លេខទូរសព្ទ ០៨០ ៣៤៥៩ ៧៨៨៩
២. លោក ឆេង ចំរើន លេខទូរសព្ទ ០៨០ ៤៦៨៩ ៩៣៧៤
៣. លោក ឌឿក វណ្ណរិទ្ធិ លេខទូរសព្ទ ០៨០ ៤៤៣៩ ៥៧០៤
សូមបញ្ជាក់ថា បើគិតមកត្រឹមពេលនេះ ព្យុះទីហ្វុង និងភ្លៀងឥតឈប់ឈរបានធ្វើឲ្យប្រទេសជប៉ុន ទទួលកម្រិតទឹកភ្លៀងច្រើនលើសលប់ រហូតបង្កជាទឹកជំនន់ និងការបាក់ដី ដែលសម្លាប់មនុស្សច្រើនជាង ១២៦នាក់។
នាយករដ្ឋមន្ត្រីជប៉ុន លោក Shinzo Abe បានបង្កើតកងកម្លាំងសង្គ្រោះបន្ទាន់មួយ មានអ្នកជួយសង្គ្រោះប្រមាណ ៥៤០០០នាក់ ដើម្បីដោះស្រាយស្ថានភាព ដែលកាន់តែអាក្រក់។