មជ្ឈមណ្ឌល "សូត្រខ្មែរ" ដំបូងបង្អស់ បង្ហាញខ្លួននៅសាកលវិទ្យាល័យ១នៅភ្នំពេញ

2018-07-10 08:45:39
ចំនួនមតិ 0 | ចំនួនចែករំលែក 0

ចន្លោះមិនឃើញ

មជ្ឈមណ្ឌលស្រាវជ្រាវ ដង្កូវនាងផលិតសូត្រខ្មែរដំបូងបង្អស់នៅកម្ពុជា គ្រោងនឹងបញ្ចប់ជាស្ថាពរក្នុងពេលឆាប់ៗនេះ។ គម្រោងនេះ បានសាងសង់នៅក្នុងបរិវេណសាកលវិទ្យាល័យភូមិន្ទភ្នំពេញ ក្រោមជំនួយរបស់រដ្ឋាភិបាលជប៉ុនប្រមាណ ៩ម៉ឺនដុល្លារ។

រូបគំរូ

លោកបណ្ឌិត ម៉ី កល្យាណ ជាអ្នកដឹកនាំគម្រោង និងប្រធានក្រុមប្រឹក្សាភិបាលសាកលវិទ្យាល័យភូមិន្ទភ្នំពេញ លើកឡើងថា ការបង្កើតមជ្ឈមណ្ឌលស្រាវជ្រាវនេះ នឹងជួយលើស្ទួយជីវភាពកសិករ ជាពិសេសស្ត្រីខ្មែរកំពុងប្រកបរបរត្បាញសូត្រ ឲ្យឆ្លើយតបនឹងតម្រូវការសូត្រខ្មែរ។

លោកបណ្ឌិត ម៉ី កល្យាណ

កត្តាម្យ៉ាងទៀត ដោយសារប្រទេសធំៗធ្លាប់ផលិតសូត្រ ដូចជា ជប៉ុន កូរ៉េ ចិន និង ថៃ ជាដើមគេលែងធ្វើហើយ ងាកទៅរកផលិតកម្មផ្សេងដែលចំណេញច្រើនជាងព្រោះតម្លៃពលកម្មខ្ពស់។ វាជាឱកាសសម្រាប់ខ្មែរយើង ដែលត្រូវធ្វើឧស្សាហកម្មនេះឲ្យបាន ព្រោះយើងនៅមានថ្លៃផលិតកម្មទាប។ លោកបណ្ឌិតបន្ថែម។

សំណង់សាងសង់នៅក្នុងបរិវេណសាកលវិទ្យាល័យភូមិន្ទភ្នំពេញ

លោកបណ្ឌិត ថ្លែងប្រាប់អ្នកសារព័ត៌មានថា គម្រោងសាងសង់បានជំនួយធំពីរដ្ឋាភិបាលជប៉ុន ប៉ុន្តែក្នុងនោះក៏មានការចំណាយពីសាកលវិទ្យាល័យផងដែរ។ យើងរំពឹងថា មជ្ឈមណ្ឌលនេះ នឹងចំណែកចូលរួមអភិវឌ្ឍសហគមន៍មូលដ្ឋាន ព្រោះយើងមានធនធានមនុស្សគ្រប់គ្រាន់សម្រាប់ការងារក្នុងខ្សែចង្វាក់ផលិតកម្មសូត្រនេះ យើងមានផ្ទៃដីដាំដើមមនលើ ប្រមាណ១១ ហិកតានៅខេត្តកំពង់ស្ពឺ និងមានរោងសម្រាប់ចិញ្ចឹមដង្កូវនាងដែលទើបចាប់ផ្តើមដំណើរការ។ តែអ្វីដែលសំខាន់ទៀតនោះ គឺយើងត្រូវការចូលរួមពីសហគមន៍មូលដ្ឋានផងដែរ។

ក្រៅពីនេះ និស្សិតនៃដេប៉ាតឺម៉ង់ជីវវិទ្យា នៃសាកលវិទ្យាល័យភូមិន្ទភ្នំពេញ បានកំពុងស្រាវជ្រាវ និងរកឃើញនូវវិធីសាស្រ្តចិញ្ចឹមដង្កូវនាង មានសុខភាពល្អ និងប្រកបដោយគុណភាព សម្រាប់ផ្គត់ផ្គង់ដល់អ្នកប្រកបអាជីវកម្មសូត្រខ្មែរទ្រង់ទ្រាយតូចៗនៅតាមសហគមន៏។

សត្វដង្កូវនាង

គួរបន្ថែមថា វិស័យសូត្ររបស់កម្ពុជាស្ទើរតែផុតជីវិតទៅហើយ ដោយសារតែវាត្រូវបានគេទុកចោលមិនអភិវឌ្ឍ ហើយមានតែកសិករតិចតួចប៉ុណ្ណោះដែលបន្តកិច្ចការដាំដុះមកសម្រាប់សិប្បកម្មជាលក្ខណៈគ្រួសារ។ ជាមួយគ្នានោះ កម្ពុជាបាននាំចូលសូត្រយ៉ាងហោចណាស់ ៤០០ តោនក្នុងមួយឆ្នាំដែលមានតម្លៃ ៣០ លានដុល្លារ៕

អត្ថបទ៖ ស៊ិន សាវ៉េត

រូបភាព៖ មជ្ឈមណ្ឌលសូត្រ-Silk Center RUPP