ដែនដីអច្ឆរិយមែន! នេះហើយគំនូរអាថ៌កំបាំងអាយុកាលរាប់ពាន់ឆ្នាំ២កន្លែង រកឃើញនៅកម្ពុជា
- 2018-07-13 02:56:16
- ចំនួនមតិ 0 | ចំនួនចែករំលែក 0
ដែនដីអច្ឆរិយមែន! នេះហើយគំនូរអាថ៌កំបាំងអាយុកាលរាប់ពាន់ឆ្នាំ២កន្លែង រកឃើញនៅកម្ពុជា
ចន្លោះមិនឃើញ
មរតកដូនតាខ្មែរបន្សល់ទុករាប់ពាន់ឆ្នាំ បានក្លាយជារឿងរ៉ាវអាថ៌កំបាំង និងចម្ងល់មិនចេះចប់ដល់មនុស្សជំនាន់ក្រោយនៅតែបន្តសិក្សាស្រាវជ្រាវតាមរយៈសិលាចារិកនានា។ ប្រាង្គប្រាសាទបុរាណ មានគ្រប់បណ្ដាខេត្តនានាក្នុងព្រះរាជាណាចក្រកម្ពុជា ហើយមានទីតាំងខ្លះទើបតែរកឃើញនូវរឿងរ៉ាវគួរឲ្យភ្ញាក់ផ្អើល។ តួយ៉ាងផ្ទាំងគំនូរ និងចម្លាក់លើផ្ទាំងថ្មពីរកន្លែងផ្សេងគ្នានៅកម្ពុជាមានអាយុកាលរាប់ពាន់ឆ្នាំ ហើយកូនខ្មែរមួយចំនួននៅមិនទាន់បានស្គាល់នៅឡើយ។
១. រកឃើញគំនូរអាយុជាង ៣០០០ឆ្នាំនៅកម្ពុជាក្នុងតំបន់មួយគ្មានមនុស្សទៅដល់
កាលពីចុងឆ្នាំ២០១៧ ក្រុមសិក្សាស្រាវជ្រាវឧទ្យានុរក្សបានទៅកាន់កន្លែងគំនូរប្រវត្តិសាស្ត្ររបស់មនុស្សមានអាយុកាលជាង៣០០០ឆ្នាំនៅចំណុចក្រសាំង-កាណម តំបន់ឧទ្យានជាតិជួរភ្នំក្រវាញកណ្តាល ស្ថិតនៅឃុំរកាត ស្រុកភ្នំក្រវាញ ខេត្តពោធិ៍សាត់។
មន្ត្រីឧទ្យានុរក្សបានចុះដល់ទីតាំងដើម្បីពិនិត្យ ទីតាំងនោះមិនមានប្រជាជនណាបានមកដល់កន្លែងនេះនៅឡើយទេព្រោះទីតាំងស្ថិតក្នុងព្រៃស្រោងឆ្ងាយពីភូមិ ផ្លូវលំបាកខ្លាំង។
តាមការបញ្ជាក់របស់លោកប្រធានមន្ទីរវប្បធម៌ និងវិចិត្រសិល្បះខេត្តបានបញ្ជាក់ថា ក្រុមការងារបច្ចេកទេសរបស់ក្រសួងវប្បធម៌ និងវិចិត្រសិល្បះបានទៅសិក្សាទីតាំងនេះដោយបញ្ជាក់ថាគំនូរនេះមានអាយុកាលប្រហែលជាង៣០០០ឆ្នាំមកហើយ និងបន្តស្រាវជ្រាវតាមលក្ខណៈវិទ្យាសាស្ត្របន្ថែមទៀត។
២. ពើងគំនូរ អាយុកាលជាងពាន់ឆ្នាំនៅខេត្តសៀមរាប
លោក នួន សិរីរតន៍ ជាប្រជាពលរដ្ឋរស់នៅខេត្តសៀមរាប ទើបតែបានទៅដល់ទីតាំងមួយកន្លែងនៅជាប់ជម្រាលភ្នំគូលែន មានឈ្មោះថា ពើងគំនូរ បានរៀបរាប់ពីអារម្មណ៍ពិតទាំងរំភើបនៅពេលដែលបានឃើញទស្សនីយភាពដ៏គួរព្រឺសម្បុរ ព្រោះអស្ចារ្យខ្លាំងពេកនឹកស្មានមិនដល់។
អ្នកចូលចិត្តប្រមាញ់រូបភាពប្លែកៗនេះ បានរៀបរាប់បន្តទៀតថា នេះជាលើកទី១ហើយដែលលោកបានទៅឃើញទិដ្ឋភាពដ៏កម្រនេះ ទៅដល់ទីនោះមានដើមឈើត្រឈឹងត្រឈៃ ហ៊ុមព័ទ្ធដោយផ្ទាំងថ្មធំៗ ហើយមានចម្លាក់ជាប់ផ្ទាំងថ្មដ៏អស្ចារ្យ ដែលបន្សល់ទុកតាំងពីសតវត្សទី១១មក។ ចំណែកឯផ្លូវចូលមានដើមឫស្សីដុះយ៉ាងក្រាស់ឃ្មឹកអមសងខាងគ្របលើផ្លូវចូល ប្រៀបដូចជាល្អាងភ្នំមួយយ៉ាងវែងអន្លាយរហូតដល់ទៅ៣គីឡូម៉ែត្រឯណោះ។ លោក រតន៍បន្តថា នៅទីនោះត្រជាក់ស្រឹប ព្រោះតែឥទ្ធិពលនៃផ្ទាំងថ្ម និងដើមឈើធំៗធ្វើឲ្យយើងមានអារម្មណ៍ថា កំពុងស្ថិតនៅទីតាំងមួយដូចគេប្រសិទ្ធឡើងយ៉ាងដូច្នោះ។
រូបចម្លាក់ប្លែកៗខុសពីគ្នាជាច្រើន មានកម្ពស់ចាប់ពី១ម៉ែត្រឡើង ត្រូវបានដាប់ឆ្លាក់នៅជាប់នឹងផ្ទាំងថ្ម កម្ពស់ប្រមាណចាប់ពី៥ម៉ែត្រឡើង។ នេះបើតាមការរៀបរាប់បន្ថែមទៀតរបស់លោក នួន សិរីរតន៍។
បុរសវ័យ៣៤ឆ្នាំរូបនេះ ប្រាប់ថា ដើម្បីអាចទៅដល់ទីតាំងនោះ គឺត្រូវធ្វើដំណើរតាមផ្លូវទៅប្រាសាទបឹងមាលា ជិះទៅត្រង់រហូតដល់ផ្លូវបំបែកស្វាយលើ បត់ទៅទិសខាងកើត (ស្ដាំដៃ) ប្រហែល១គីឡូម៉ែត្រ នោះនឹងទៅដល់ជើងភ្នំគូលែន។ ទៅដល់ទីនោះត្រូវធ្វើដំណើរតាមផ្លូវមួយដែលគ្របដណ្ដប់ដោយឫស្សីប្រមាណ៣គីឡូម៉ែត្រទៀត ទើបទៅដល់ទីតាំងដ៏អស្ចារ្យនេះ។
តាមក្រសួងទេសចរណ៍ នៃព្រះរាជាណាចក្រកម្ពុជា ពើងគំនូរត្រូវបានកសាងឡើងនៅសតវត្សទី១១ នៃគ.ស ស្ថិតនៅភូមិត្រពាំងទឹម ឃុំតាសៀម ស្រុកស្វាយលើខេត្តសៀមរាប។ ជាទីតាំងដ៏សំខាន់មួយនៅសតវត្សទី១១ ដោយទីនោះមានចម្លាក់ផ្សេងៗដូចជា ចម្លាក់ព្រះគណេសដៃ៨ ចម្លាក់លឹង្គ ចម្លាក់ព្រះវិស្ណុ ចម្លាក់ព្រះឥសូ រូបគំនូរត្រីប្រវែងប្រមាណ១ម៉ែត្រគូដោយប្រើពណ៌ក្រហមព្រាល។
សិលាចារឹកប្រហែលចារនៅសតវត្សទី១១ នៃគ.ស បង្ហាញថា ពើងគំនូរជាទីតាំងរបស់ព្រះរាជគ្រូ របស់មហាក្សត្រព្រះនាមថា «ព្រះសិវៈសោម» ក្នុងនោះសិលាចារឹកក៏បានបង្ហាញពីព្រះបាទជ័យវរ្ម័នទី២ ក្នុងឈ្មោះជាមរណនាមថា ព្រះបរមេស្វរៈ និងភ្នំមហេន្ទ្រ (ភ្នំគូលែន)៕