បឺត ខាំ៖ យ៉េន ឌីណា អាចនឹងពិបាកឈ្នះខ្សែក្រវាត់បន្តិចស្អែក ព្រោះហេតុផលនេះ...
- 2018-07-13 03:48:51
- ចំនួនមតិ 0 | ចំនួនចែករំលែក 0
បឺត ខាំ៖ យ៉េន ឌីណា អាចនឹងពិបាកឈ្នះខ្សែក្រវាត់បន្តិចស្អែក ព្រោះហេតុផលនេះ...
ចន្លោះមិនឃើញ
អតីតជើងខ្លាំងប្រដាល់គុនខ្មែរ បឺត ខាំ ថា យ៉េន ឌីណា អាចនឹងពិបាកបន្តិចហើយ ក្នុងការយកឈ្នះខ្សែក្រវាត់គោលជល់រដូវកាលទី៩ ស្អែកនេះ ជាមួយថៃ Pit Noy នៅសង្វៀន CNC ព្រោះមើលឃើញចំណុចខ្សោយខ្លះៗ។
បឺត ខាំ បានលើកឡើងក្នុងកម្មវិធី Live ម្សិលមិញនេះថា កីឡាករ យ៉េន ឌីណា បើចង់ឈ្នះខ្សែក្រវាត់គោជល់ស្អែកនេះនៅសង្វៀន CNC គួរណាស់តែប្រឹងហាត់ឲ្យខ្លាំង ជាពិសេសគឺកម្លាំងតែម្ដង ព្រោះអីមើលឃើញថាការប្រកួតកន្លងមករបស់គេ មិនសូវមានកម្លាំងនោះឡើយ។
អ្នកប្រដាល់មានប្រវត្តិប្រកួតប្រហែល ៥០០ដង រូបនេះបន្ថែមថា ឌីណា ជាកីឡាករវ៉ៃក្បាច់ ឬហៅថាវ៉ៃតិចនិកម្នាក់ដែរ ដូច្នេះទាល់តែកម្លាំងខ្លាំង ល្អគ្រប់គ្រាន់ទើបអាច វ៉ៃបានល្អ វ៉ៃបានពិន្ទុឈ្នះ បើកម្លាំងខ្សោយហើយវ៉ៃចេញក៏មិនសូវល្អ និងមិនមានទម្ងន់នោះទេ។
ចំណែកសមត្ថភាពរបស់ Pit Noy វិញ ត្រកូល បឺត ខាងលើឲ្យដឹងទៀតថា អ្នកប្រដាល់ថៃរូបនេះ គេល្អ ហើយកំពុងតែឡើងកូដថែមទៀតផង ចំពោះកម្លាំង និងស្នៀតប្រយុទ្ធសុទ្ធតែល្អ។ ជាពិសេសស្អែកនេះ ច្បាស់ណាស់កីឡាករឆ្លងដែនពីថៃរូបនេះ នឹងដើរបុកចូលវ៉ៃតែម្ដង ដូច្នេះ ឌីណា ត្រូវធ្វើការធ្ងន់ហើយ។
រំលឹកដែរថា ស្អែកថ្ងៃសៅរ៍ ទី១៤ ខែកក្កដា ឆ្នាំ២០១៨ នេះ យ៉េន ឌីណា នឹងត្រូវប្រកួតផ្ដាច់ព្រ័ត្រខ្សែក្រវាត់គោជល់ នៅសង្វៀន CNC ជាមួយអ្នកប្រដាល់ថៃ Pit Noy លើប្រភេទទម្ងន់ ៦៣,៥គីឡូក្រាម។ ខណៈ ពុយ វណ្ណៈ ប្រកួតយកលេខ ៣-៤ ជាមួយថៃ Kwang Ngin ចាប់ពីម៉ោង ៦ល្ងាចតទៅ៕