ថ្មីចែស! គ្រូគីមីជើងចាស់ រំលឹកសិស្សរឿងសំខាន់៤ បើមិនចង់ស្តាយក្រោយ ពេលប្រលងបាក់ឌុប

2018-07-13 06:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

សាស្ត្រាចារ្យមុខវិជ្ជាគីមីវិទ្យា ដែលមានបទពិសោធន៍បង្រៀនជាង៣០ឆ្នាំ បានរំលឹករឿងសំខាន់ទាំង៤ ដែលសិស្សត្រូវត្រៀម កុំឲ្យស្ដាយក្រោយ ខណៈការប្រលងសញ្ញាប័ត្រមធ្យមសិក្សាទុតិយភូមិ នៅពេលខាងមុខ កាន់តែខិតជិតចូលមកដល់ នៅសម័យប្រលង ២០ និង២១ សីហា ឆ្នាំ២០១៨។

សិស្សទាំងអស់ប្រាកដណាស់ គឺត្រៀមរឿងរៀនសូត្រ ឬគន្លឹះនានា តែក៏កុំធ្វេសប្រហែសតែ១ប៉ប្រិចភ្នែក នោះនឹងស្មើនឹងគ្មានឱកាសទៅប្រលងបាក់ឌុប ឬប្រលងហើយ តែបន្សល់នូវវិប្បដិសារី។

លោក ងិន ណៃស៊ត គ្រូបង្រៀនមុខវិជ្ជាគីមីវិទ្យា នៃវិទ្យាល័យព្រះស៊ីសុវត្ថិ បានមានប្រសាសន៍ ប្រាប់ Sabay ថា នៅពេលប្រលងសិស្សទាំងអស់ត្រូវយកចិត្តទុកដាក់ចំណុចសំខាន់ទាំង៤នេះ ដើម្បីភាពជោគជ័យ។

១. ប្រុងប្រយ័ត្នរឿងចរាចរណ៍

ចំណុចនេះសំខាន់បំផុត លោកគ្រូ ងិន ណៃស៊ត រំលឹកសិស្សគ្រប់រូប មុនថ្ងៃប្រលង ត្រូវតែប្រុងប្រយ័ត្នខ្ពស់ ឬកាត់បន្ថយការធ្វើដំណើរណាដែលមិនចាំបាច់។

ដូចយើងធ្លាប់ឃើញហើយ កាលប្រលងឆ្នាំចាស់ៗកន្លងទៅ គ្រោះថ្នាក់ចរាចរណ៍ ជាចៃដន់កើតមាន បានបង្អាក់ដំណើរ និងឆក់យកអាយុសិស្សដែលត្រៀមមកប្រលងបាក់ឌុប ដែលនេះជារឿងគួរឲ្យសោកស្ដាយបំផុត។

លោកគ្រូ សង្កត់ធ្ងន់ថា មិនថា យើងរៀន យើងត្រៀមអ្វីបានល្អគ្រប់យ៉ាងនោះទេ បើមានគ្រោះថ្នាក់ចរាចរណ៍កើតមានហើយ គឺពិតជាសោកស្ដាយ ព្រោះយើងសុទ្ធតែដឹងថា វាជារឿងចៃដន់មែន ប៉ុន្តែត្រូវចាំថា យើងសុទ្ធតែអាចបង្ការបាន ពិសេសគឺមិនប្រើត្រូវសេពគ្រឿងស្រវឹងដាច់ខាត និងកាត់បន្ថយការធ្វើដំណើរនានាដែលមិនចាំបាច់។

២. មើលសំណួរឲ្យយល់ច្បាស់មុន ចាប់ផ្ដើមសរសេរ

ក្នុងថ្ងៃប្រលង មិនថាកូនសិស្សពូកែប៉ុណ្ណាក៏ដោយ ត្រូវមើលប្រធានលំហាត់ ឬសំណួរ ២ ទៅ ៣ដងឲ្យយល់ច្បាស់សិន មុនចាប់ប៊ិចសរេសរ។ លោកគ្រូបង្រៀនគីមីវិទ្យាខាងលើ បញ្ជាក់ថា លំហាត់គីមីខ្លះ កូនសិស្សអាចច្រឡំ ព្រោះមើលវិញ្ញាសាមិនច្បាស់ រួចក៏ចាប់ផ្ដើមដោះស្រាយលំហាត់ទាំងប្រឡំ ដូច្នេះជាលទ្ធផលគឺខុស។

នោះជាចំណុចគ្រោះថ្នាក់ ព្រោះបើប៉ះចំលំហាត់ ឬសំណួរដែលបានពិន្ទុច្រើន។

៣. រៀបចំរបៀបសរសេរ

ចំពោះលំហាត់គីមី គឺមានលក្ខណៈពិបាកមួយក្នុងចំណោមមុខវិជ្ជាដទៃ ដែលមានប្រើលេខ និងរូបមន្តច្រើន។ ដូច្នេះ ចាំបាច់សិស្សត្រូវចាប់អារម្មណ៍ ពីរបៀបសរសេរ ព្រោះប្រសិនបើចម្លើយលំហាត់ខ្ជីខ្ជា សរសេរគ្មានសណ្ដាប់ធ្នាប់ ធ្វើឲ្យអ្នកកែពិបាក ឬអាចនិយាយបានថា គ្មានភាពរៀបរយ ក្នុងកិច្ចការ ឬបង្ហាញពីភាពមិនទាក់ទាញ។

ខាងក្រោមនេះ ជាឧទាហរណ៍ នៃការសរសេរមានរបៀប និងការសរសេរគ្មានរបៀប ក្នុងលំហាត់ PH ដែលសរសេរដោយ លោកគ្រូ ងិន ណៃស៊ត។

៤. ពេលធ្វើកិច្ចការរួច តែសល់ម៉ោង

មែនទែនទៅ កាលបើធ្វើកិច្ចការហើយ សល់ម៉ោង សិស្សភាគច្រើនសប្បាយចិត្ត និងដើរ ចង់ចេញមកក្រៅមុនម៉ោង។ លោកគ្រូគីមី មានបទពិសោធន៍បង្រៀនជើងចាស់រូបនេះ បញ្ជាក់ថា មិនថាជាសិស្សដែលរៀនមានកម្រិតមធ្យម និងសិស្សពូកែយ៉ាងណាទេ សូមចាំថា បើទោះជាអាចធ្វើវិញ្ញាសារួចសល់ម៉ោងក៏ដោយ សូមកុំចេញមុនម៉ោងភ្លាមៗឲ្យសោះ។

ត្រូវចំណាយពេល មើលក្រដាសវិញ្ញាសាចុះឡើងៗ ឬមើលថាតើបានបំពេញឈ្មោះ ឬលេខតុ ឬនៅ ជាដើម?

ចំណុចនេះ គឺលោកគ្រូចង់រំលឹកហើយៗទៀតថា តែប្រញាប់ហុចវិញ្ញាសាឲ្យគ្រូហើយ រួចដើរចេញ រួចមានអ្វីចង់កែកុនលើវិញ្ញាសា ថែមថយ ឬទើបដឹងថាបានធ្វើខុសចំណុចណា ចង់កែវិញ គឺចប់ហើយ មានន័យថាគ្មានផ្លូវបកក្រោយវិញទេ។

អត្ថបទ៖ ពៅ រក្សា