បរាជ័យឆ្នាំមុន ម៉ម ពេជ្ជរិទ្ធ បញ្ជាក់ជំហរប្រឡងបាក់ឌុបជាថ្មី

2018-07-17 00:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្មានអ្នកណាចង់ប្រឡងធ្លាក់នោះទេ តែនេះក៏ជាបទពិសោធន៍មួយដែលសិស្សប្រលងជាប់គ្មានថ្ងៃនឹងយល់ នេះជាអារម្មណ៍មួយដែលភ្ញាក់ក្រញាង ហើយពិចារណាឡើងវិញថារយៈពេលមួយឆ្នាំកន្លង ថាតើអ្នកបានធ្វើអ្វីខ្លះបានយ៉ាងច្បាស់ដូចថ្ងៃ? នេះជាពាក្យសម្ដីរបស់ សិល្បករតន្ត្រីករវ័យក្មេង ម៉ម ពេជ្ជរិទ្ធ។

ម៉ម ពេជ្ជរិទ្ធ ពេលដើរតាមខេត្តដើម្បីនិពន្ធបទ បុណ្យភូមិ

ជាក់ស្ដែង ម៉ម ពេជ្ជរិទ្ធ បានបំពេញកិច្ចការជាច្រើនក្នុងវិស័យសិល្បៈ ពិសេសការតែងនិពន្ធបទចម្រៀងថ្មីៗ ដើម្បីលើកទឹកចិត្តដល់មនុស្សគ្រប់គ្នា និងការកម្សាន្តប្រកបដោយចំណេះដឹង។ បទចម្រៀង នីមួយៗ ទាមទារពេលវេលា និងអារម្មណ៍បូករួមនឹងការច្នៃប្រឌិត។ ដូចនេះហើយ ទើបធ្វើឱ្យ សិល្បករវ័យក្មេងរូបនេះខកខាន ឬប្រើប្រាស់ពេលវេលារៀនសូត្រមិនបានដិតដល់ ហើយក៏ភ្លាត់ស្នៀតប្រឡងធ្លាក់កាលពីឆ្នាំ ២០១៧។

សកម្មភាពសម្តែងបទចម្រៀងរបស់ ម៉ម ពេជ្ជរិទ្ធ កាលពីឆ្នាំ ២០១៧

តែក៏មានសិស្សមួយចំនួនផ្សេងទៀតក៏ធ្លាក់ដែរ នោះអាចដោយសារតែពួកគាត់ខ្វះខាតក្នុងគ្រួសារ និងមិនមានលទ្ធភាពគ្រប់គ្រាន់ទៅរៀនបន្ថែម ឬក៏មកពីបញ្ហាណាមួយស្រាប់តែកើតឡើងភ្លាមពេលជិតប្រឡងធ្វើឱ្យពួកគេមិនអាចប្រឡងបាន ហើយក៏ធ្លាក់ ដូចនេះហើយទើប ម៉ម ពេជ្ជរិទ្ធ លើកទឹកចិត្តថា៖ «មិនត្រូវបោះបង់ជំហាននៃការឆ្លងកាត់ វិទ្យាល័យនេះឡើយ បើអ្នកមានឱកាស បើងាកមើលមកក្រោយវិញ អ្នកនឹងអាចប្រាប់ខ្លួនឯងបានថា អ្នកបានធ្វើរឿងល្អៗជាច្រើនសម្រាប់គ្រួសារ ក្នុងពេលដែលអ្នកប្រឡង ដូចនេះបើសិនជាធ្លាក់ ក៏កុំអស់សង្ឃឹម ត្រូវតែព្យាយាមម្តងទៀត»។

ម៉ម ពេជ្ជរិទ្ធ

បច្ចុប្បន្នទោះជាមានការមមាញឹកនឹងការងារផលិតបទចម្រៀងថ្មី និងការឡើងសម្ដែងបទចម្រៀងក្នុងក្រុមចម្រៀង Original Small World Small Band ក៏ពិតមែន តែ ពេជ្ជរិទ្ធ ក៏ប្រាប់ដែរថាខ្លួនឆ្លៀតពេលដែលអាចធ្វើបានដើម្បីរៀនត្រៀមដោយខ្លួនឯង និងមានគ្រូមកបង្រៀនបង្រៀនបន្ថែម ដើម្បីត្រៀមប្រឡងជាលើកទី ២នេះ៕

រីករាយទស្សនាបទចម្រៀងរបស់ ម៉ម ពេជ្ជរិទ្ធ ខាងក្រោម៖