Update៖ ទឹកជន់លិចផ្លូវជាតិលេខ៤យ៉ាងគំហុគ ដោយសារហូរធ្លាក់ពីកំពូលភ្នំ១របស់កម្ពុជា

2018-07-17 02:32:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថានភាពទឹកហូរកាត់ផ្លូវជាតិលេខ៤នៅតែបន្តកាន់តែខ្លាំងឡើងនាព្រឹកថ្ងៃទី១៧ ខែកក្កដា ឆ្នាំ២០១៨នេះ។ អ្នកនាំពាក្យក្រសួងធនធានទឹក និងឧតុនិយម ឯកឧត្ដម ចាន់ យុត្ថា បានប្រាប់ Sabay ថាមូលហេតុបង្កឲ្យមានជំនន់កាត់តាមផ្លូវជាតិលេខ៤យ៉ាងគំហុកនេះ ដោយសារទឹកកំពុងហូរធ្លាក់ពីភ្នំឱរ៉ាល់ ដែលជាភ្នំមួយស្ថិតនៅតំបន់ជួរភ្នំឱរ៉ាល់ មានព្រំប្រទល់ជាប់នឹងខេត្តកំពង់ស្ពឺ ពោធិ៍សាត់ កំពង់ឆ្នាំង។

មកទល់នឹងពេលនេះតំបន់ជួរភ្នំក្រវាញនៅតែបន្តភ្លៀងធ្លាក់កាន់តែខ្លាំងឡើង ជាហេតុធ្វើឲ្យទឹកបន្តហូរបុកមកផ្លូវជាតិលេខ៤មិនថមថយឡើយ ហើយក៏មិនអាចព្យាករណ៍បានថា តើស្ថានភាពទឹកនឹងស្រកពេលណា ហើយអាចធ្វើដំណើរជាធម្មតាវិញនៅពេលណានោះទេ។ ឯកឧត្ដម ចាន់ យុត្ថា បញ្ជាក់បន្ថែម។

អ្នកនាំពាក្យក្រសួងធនធានទឹក និងឧតុនិយមបន្តថា ស្ថានភាពកំពុងបុកខ្លាំង មិនដឹងថាហូរច្រោះធ្លាក់ចុះយ៉ាងដូចម្ដេច និងបង្កហានិភ័យខ្ពស់ប្រសិនបើធ្វើដំណើរឆ្លងកាត់។ ហេតុដូច្នេះហើយទើបអាជ្ញាធរសម្រេចធ្វើការផ្អាកឲ្យឆ្លងកាត់ជាបណ្ដោះអាសន្ន និងមានកម្លាំងសមត្ថកិច្ច ពាក់ព័ន្ធទាំងអស់ កំពុងនៅប្រចាំការ២៤ម៉ោងលើ២៤ម៉ោង ដើម្បីរក្សាបាននូវសុខសុវត្ថិភាពជូនប្រជាពលរដ្ឋទាំងហាលភ្លៀងតែម្ដង។ ដូចនេះសូមប្រជាពលរដ្ឋសហការជាមួយកងកម្លាំងសមត្ថកិច្ច ផ្អាកធ្វើដំណើរឆ្លងកាត់តំបន់មានគ្រោះថ្នាក់នោះ ជាបណ្ដោះអាសន្នការពារកុំឲ្យមានគ្រោះថ្នាក់ណាមួយកើតឡើងជាយថាហេតុ។

សូមជម្រាបជូនថាទឹកកំពុងជន់លិចនៅផ្លូវជាតិលេខ ៤ ត្រង់ចំណុចស្ពានអូរគគី ព្រំប្រទល់ខេត្តកំពង់ស្ពឺ និងខេត្តព្រះសីហនុ (គីឡូម៉ែត្រលេខ ១០៦-១០៧) ក្នុងភូមិស្ទឹងច្រាល ឃុំអូបាក់រទេះ ត្រូវបានទឹកជន់ហូរកាត់ពីលើផ្លូវប្រវែងជាង ១០០ ម៉ែត្រ នាព្រឹកថ្ងៃទី ១៧ ខែកក្កដា ឆ្នាំ ២០១៨ នេះ ៕

អត្ថបទ៖ ថោ ច័ន្ទឬទ្ធិ

រូបភាព៖ ក្រសួងធនធានទឹក