អតីតតារាចម្រៀងថៃម្នាក់ វិះនឹងបាត់បង់ជីវិត ដោយសារការចាក់បំពេញដើមទ្រូង
- 2018-07-17 03:01:06
- ចំនួនមតិ 0 | ចំនួនចែករំលែក 0
អតីតតារាចម្រៀងថៃម្នាក់ វិះនឹងបាត់បង់ជីវិត ដោយសារការចាក់បំពេញដើមទ្រូង
ចន្លោះមិនឃើញ
អតីតតារាចម្រៀងថៃជំនាន់ឆ្នាំ ២០០០ ម្នាក់ បានត្រឡប់មកក្លាយជាចំណាប់អារម្មណ៍របស់មហាជនសាជាថ្មី ក្រោយរូបនាងបានទម្លាយរឿងដែលធ្វើឲ្យនាងស្ទើរតែបាត់បង់ជីវិត ក្រោយធ្វើការវះកាត់ចាក់បំពេញដើមទ្រូងនៅប្រទេសកូរ៉េ។
តាមវីដេអូដែលបានបង្ហោះកាលពីថ្ងៃសុក្រលើគណនី ហ្វេសប៊ុករបស់អតីតតារាចម្រៀងរូបនេះ ដែលមានឈ្មោះថា May Jeeranan បានបញ្ជាក់ថា នាងបានសម្រេចចិត្តឆ្លងកាត់មុខកាំបិតជាលើកដំបូងក្នុងជីវិតរបស់នាងកាលពីចុងខែធ្នូ ដើម្បីចាក់បំពេញដើមទ្រូងឲ្យបានធំស្រស់ស្អាតដូចគេ។ អតីតតារាចម្រៀងស្រីរូបនេះ បាននិយាយទៀតថា ការវះកាត់នេះ បានធ្វើឲ្យនាងសន្លប់បាត់ស្មារតី និងមានសង្ឃឹមដឹងខ្លួនឡើងវិញតែ ១០ ភាគរយប៉ុណ្ណោះ។
អតីតតារាចម្រៀង Jeeranan បានបន្ថែមទៀតថា នាងបានចំណាយប្រាក់ចំនួន ៨០ ម៉ឺនបាត (២៤ ០០០ដុល្លារ) ក្នុងការវះកាត់ដើមទ្រូងរបស់នាង នៅឯមន្ទីរពេទ្យ Grand Plastic Surgery ក្នុងទីក្រុងសេអ៊ូល។ ប៉ុន្តែក្រោយបញ្ចប់ការវះកាត់ នាងមានអារម្មណ៍ថាដើមទ្រូងនាងហាក់ដូចជារលាកដូចអាស៊ីដរត់ពេញដើមទ្រូង និងហូរឈាមខុសធម្មតា ប៉ុន្តែក្រោយនាងសាកសួរទៅកាន់គ្រូពេទ្យ ពួកគេនិយាយថានាងមិនមានបញ្ហាអ្វីនោះទេ។
ក្រោយត្រឡប់មកប្រទេសថៃវិញបាន១សប្ដាហ៍ ដើមទ្រូងនាង បានហូរឈាមកាន់តែខ្លាំង រួចនាងក៏បន្តសម្រាកព្យាបាលក្នុងមន្ទីរពេទ្យកែសម្ផស្សមួយនៅក្នុងប្រទេសថៃនេះដែលមានឈ្មោះថា KTOP Clinic។ ជាថ្មីម្ដងទៀត ក្រុមគ្រូពេទ្យនៅតែនិយាយថា នាងមិនមានបញ្ហាអ្វីនោះទេ។
រហូតដល់ពាក់កណ្ដាលខែមករា ដើមទ្រូងរបស់នាងចាប់ផ្ដើមប្រែប្រួលរហូតដល់ចេញខ្ទុះ។ នៅពេលនោះហើយ ទើបខាងបុគ្គលិកមន្ទីរពេទ្យបានប្រាប់នាងថា ពួកគេត្រូវដកស៊ីលីកូនដែលចាក់បំពេញដើមទ្រូងរបស់នាងចេញជាបន្ទាន់។
ការវះកាត់លើកទី ២នេះហើយ បានធ្វើឲ្យនាងសន្លប់បាត់ស្មារតីរហូតមានសង្ឃឹមរស់តែ ១០ ភាគរយនោះ។ ក្រោយបញ្ចប់ការវះកាត់ហើយភ្លាម ម្ដាយរបស់ Jeeranan បានបញ្ជូននាងទៅកាន់មន្ទីរពេទ្យ Bumrungrad វិញ ដើម្បីធ្វើការព្យាបាលបន្ត។ បច្ចុប្បន្ន នាងមានសុវត្ថិភាព និងបានដឹងខ្លួន អាចនិយាយបានឡើងវិញ៕
ទស្សនាវីដេអូខាងក្រោម៖