ប្រហិតចែម៉ីបាត់ដំបងបើកនៅភ្នំពេញមិនដល់២អាទិត្យ លក់ដាច់ខ្លាំងដល់តម្រង់ជួរចាំ

2018-07-17 03:38:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រហិតចិញ្ច្រាំពីសាច់គោស្រស់ធ្វើដោយខ្លួនឯងសម្រាប់លក់មួយថ្ងៃកំពុងល្បីខ្លាំង បានបន្តមកបើកសាខារបស់ខ្លួននៅក្បែរផ្សារធំថ្មីរាជធានីភ្នំពេញមិនដល់២សប្ដាហ៍ផង មនុស្សម្នាសម្រុកទៅញ៉ាំរកកន្លែងអង្គុយសឹងមិនបានដល់ថ្នាក់ឈរតម្រង់ជួរចាំទិញ។ ចែម៉ីដែលម្ចាស់ហាង និងជាអ្នកផ្សំរូបមន្តធ្វើប្រហិតតែម្ដងប្រាប់ Sabay គ្មានលាក់លៀមថា មួយកំប្លេតែម្ដងគឺយកពីបាត់ដំបងទាំងអស់មិនឲ្យខុសគ្នាឡើយ។ អ្នកបាត់ដំបងរូបនេះ ធានាកម្រិត ISO តែម្ដងថាមិនឲ្យខុសគ្នាឡើយ ទាំងសាច់គោ នំប៉័ង សម្ភារៈប្រើប្រាស់ ទឹកជ្រលក់ និងអ្វីៗគ្រប់បែបយ៉ាងដឹកមកពីបាត់ដំបងទាំងអស់ គ្មានជាតិគីមីស្នាដៃខ្មែរសុទ្ធសាធ។

ចែម៉ីមកពីបាត់ដំបង

ចែម៉ីនិយាយថា បើកនៅភ្នំពេញដាច់ទ្វេគុណជាងនៅបាត់ដំបងទៅទៀត។ ម្ចាស់ស្នាដៃប្រហិតសាច់គោស្រស់ធ្វើភ្លាមបំពងភ្លាមរូបនេះ ប្រាប់ថាពិតជាលឿននឹកស្មានមិនដល់ ព្រោះអ្នកស្រីគិតថាបើកដំបូងប្រហែលជាដាច់មួយៗ តែផ្ទុយស្រឡះពីការគិត គឺមានអ្នកមកញ៉ាំយ៉ាងច្រើនកុះករសឹងតែធ្វើមិនទាន់។ ក្នុងមួយថ្ងៃ ត្រូវចំណាយសាច់គោចូលរយគីឡូតែម្ដង បើមិនអ៊ីចឹងមិនឈ្នះមាត់អតិថិជននោះទេ។ ចែម៉ីថា បើកលក់ចាប់ពីម៉ោង១២ថ្ងៃត្រង់ រហូតដល់ម៉ោង៨យប់ តែត្រឹមម៉ោង៥ល្ងាចគឺអស់តែម្ដង។

និយាយទាំងសើចកក្អឹកចែម៉ីបន្តថា រំភើបណាស់ដែលឃើញបងប្អូនខ្មែរគាំទ្រផលិតផលខ្មែរ ដែលគ្មានលួចចម្លងតាមអ្នកណា គឺធ្វើចេញពីដៃអ្នកស្រី។ តែពេលលក់ដាច់ខ្លាំងពេកទៅជាភ័យទៅវិញខ្លាចធ្វើមិនទាន់ឲ្យគេ តែម្នាក់ៗរត់ខ្វែងដៃខ្វែងជើង ធ្វើយ៉ាងណាឲ្យគ្រប់គ្នាបានភ្លក់ប្រហិតសាច់គោធ្វើសាច់គោស្រស់ពិតៗ មិនក្លាសសេ ធ្វើភ្លាមលក់ភ្លាម។

បើចង់សាកប្រហិតចែម៉ីមកពីបាត់ដំបងកុំភ្លេចទៅសាកទាំងអស់គ្នាណា នៅម្ដុំបេនឡានផ្សារធំថ្មី ផ្លូវ៦៧ ផ្ទះលេខ១៧E0 នៅក្បែរឆៀងខាងមុខធនាគារANZ។ តែកុំភ្លេចយកបន្លែទៅផង ព្រោះប្រហិតចែម៉ីមិនមានបន្លែទេ៕