យុវជនម្នាក់នេះបោះបង់បំណងប្រាថ្នាអ្នកមានគុណ មកចាប់យកអាជីពជាគ្រូរាំ Hip Hop

2018-07-17 04:47:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្បាច់រាំ Hip Hop ក៏អាចនាំយកវប្បធម៌ខ្មែរ និងប្រទេសខ្មែរឱ្យអន្តរជាតិបានស្គាល់ផងដែរ ពីព្រោះជាចង្វាក់អន្តរជាតិ ហើយទទួលស្គាល់លើពិភពលោក ដែលខ្មែរយើងក៏អាចធ្វើបាននេះជាពាក្យសម្ដីរបស់យុវជនវ័យ២៦ឆ្នាំ ជាគ្រូបង្ហាត់ក្បាច់រាំ Hip Hop ស៊ឹម ជីនណារ៉ូ ម្ចាស់ក្លិបរាំ Hip Hop The Cambo។

តាំងពីឆ្នាំ ២០១២ យុវជន ជីនណារ៉ូ ប្រឡូកចូលក្នុងការរាំ ចង្វាក់ Hip Hop ក្រោយបញ្ចប់ការសិក្សាផ្នែកធនាគារ ដែលជាបំណងរបស់ឪពុកម្តាយ។ ណារ៉ូ ប្រាប់ថា ខណៈនោះ អ្នកមានគុណក៏ផ្ដាច់សេដ្ឋកិច្ច ព្រោះតែ រូបគេទៅចាប់អាជីពជាអ្នករាំ ដោយសារការស្រលាញ់ ពេញចិត្ត លើសអ្វីទាំងអស់។ មិនយូរប៉ុន្មានការតស៊ូរបស់ គ្រូរាំម្នាក់នេះ បាននាំរូបគេឱ្យធ្វើដំណើរជាច្រើនប្រទេសដើម្បីបង្ហាញទេពកោសល្យ និងរៀនសូត្របន្ថែមលើសិល្បៈនៃការរាំ Hip Hop។

ណារ៉ូ និងក្រុមរាំជាច្រើនប្រទេស

ដើម្បីស្វែងយល់ពីសិល្បៈនៃការរាំ ពីអន្តរជាតិ ណារ៉ូ បានទៅធ្វើដំណើរ ៥ ប្រទេស ដូចជា ថៃ វៀតណាម ភីលីពិន ម៉ាឡេស៊ី និងប្រទេសចិនជាដើម ជួបជាមួយគ្រូរាំ Hip Hop ។ ក្នុងដំណើរៀនសូត្ររបស់ ណារ៉ូ រូបគេតែងបានសួរនាំ អំពីមនុស្សនៅជុំវិញខ្លួន ថាតើអ្នកស្គាល់កម្ពុជា ឬអត់? តែចម្លើយដ៏វិប្បយោគ បានប្រាប់ថា មិនស្គាល់ទេ ព្រោះគេមិនល្បី ហើយបរទេសទាំងអស់នោះស្គាល់ត្រឹម ប្រទេសថៃ វៀតណាម និងឡាវប៉ុណ្ណោះ។

ចម្លើយទាំងអស់នេះហើយជំរុញចិត្ត ណារ៉ូ ឱ្យគិតថា ខ្លួននឹងនាំយកទង់ជាតិខ្មែរតាមរយៈ Hip Hop ដែលខ្លួនមានជំនាញយកទៅប្រកួតជាមួយបរទេស ហើយនឹងយកសិល្បៈរបស់ខ្មែរដូចជារបាំអប្សរា របាំខ្មែរផ្សេងទៀតមកលាយបញ្ចូលគ្នានឹង Hip Hop ដើម្បីឱ្យបរទេស បានស្គាល់ពីកម្ពុជា។

គួរបញ្ជាក់ផងដែរថា ត្បិតតែយុវជនម្នាក់នេះចូលចិត្តចង្វាក់រាំ Hip Hop មែន តែក្បាច់រាំរបស់ខ្មែរ ទាំងប៉ុន្មានរូបគេចេះរាំយ៉ាងស្ទាត់ជំនាញ ហើយមានពេលខ្លះក៏ធ្លាប់បង្ហាញដល់បរទេសផងដែរ។ យុវជនរូបនេះ បន្តថា «យើងគួរចែកឱ្យដាច់អំពីសិល្បៈ និងជាតិនិយម ដែលមិនរីកចំរើន ក្នុងបណ្តាលប្រទេសរីកចម្រើនជាច្រើន គេទៅមុខ គេរកឃើញអ្វីៗថ្មីៗ ដើម្បីបំពេញតម្រូវការ ការរស់នៅ ការកម្សាន្ត ហើយគេបើកចិត្តទូលាយ និង បន្តអភិវឌ្ឍ»។

ជាគំនិតល្អ និងការតាំងចិត្តរបស់ណារ៉ូ ឆ្នាំក្រោយនេះ រូបគេនឹងដឹកនាំក្រុមរាំពីកម្ពុជាដើម្បីធ្វើការប្រកួតក្បាច់ រាំ Hip Hop តាមបណ្តាល់ប្រទេស ហើយនឹងព្យាយាមដើម្បីឈានដល់ទឹកដីសហរដ្ឋអាមេរិក ដូចនឹងក្រុមហាត់រាំ ពីប្រទេស ថៃ ដែលខ្លួនស្គាល់បានទៅដល់។ យុវជនរូបនេះក៏សង្ឃឹមទៀតថា ខ្មែរអាចធ្វើបាន នឹងអាចនាំកេត្តិ៍ឈ្មោះត្រឡប់មកគ្រួសារ និងប្រទេសជាតិរបស់ខ្លួន៕