ប្រភេទភាពយន្តហូលីវូដទាំង៤ យោងទៅតាមដើមទុននិងដំណើរការផលិត

2018-07-18 08:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រសិនជាអ្នកស្រលាញ់និងគាំទ្រវិស័យភាពយន្ត អ្នកប្រាកដជាអាចទាយដឹងខ្លះៗ ហើយថាសព្វថ្ងៃនេះមានភាពយន្តប្រភេទណាខ្លះនៅហូលីវូដ។ ទោះបីជាភាពយន្តមានប្រភេទបែបបទខុសគ្នា មិនថាជាភាពយន្តបែប រន្ធត់ មនោសញ្ចេតនា ឬវិទ្យាសាស្ត្រ ភាពយន្តទាំងនោះសុទ្ធសឹងតែត្រូវចែកជាបួនប្រភេទសំខាន់ៗ គឺប្រភេទភាពយន្តផលិតដោយគ្មានដើមទុន ប្រភេទដើមទុនតិច ប្រភេទដើមទុនមធ្យម និងភាពយន្តបែប Blockbuster។

១. ប្រភេទគ្មានដើមទុន

ឈុតមួយពីក្នុងរឿង "Clerks"

ភាពយន្តប្រភេទនេះ ភាគច្រើនជាភាពយន្តផលិតដោយនិស្សិតសិក្សាផ្នែកភាពយន្ត ដោយចំណាយទឹកប្រាក់ដោយខ្លួនឯងផ្ទាល់ ឬពេលខ្លះមិនចាំបាច់ចំណាយទឹកប្រាក់ក៏មាន។ តួអង្គភាពយន្តប្រភេទនេះអាចចូលរួមថតដោយស្ម័គ្រចិត្ត ឬផលិតករប្រភេទនេះអាចជួលតារាៗកម្រិតក្រោមមកជួយតាមរយៈទឹកប្រាក់បានមកពីការរៃអង្គាស។ ទឹកប្រាក់ប្រភេទនេះ អាចបានច្រើនរហូតដល់ជាង ៥០ម៉ឺនដុល្លារ។ ជាក់ស្ដែងភាពយន្ត "Clerks" របស់អ្នកដឹកនាំរឿង Kevin Smith ចំណាយដើមទុនតែជាង ២ម៉ឺនដុល្លារតែប៉ុណ្ណោះ ប៉ុន្តែអាចរកចំណូលបានដល់ទៅ ៣,២លានដុល្លារ។

២. ប្រភេទដើមទុនតិច

ភាពយន្តប្រភេទនេះគឺភាគច្រើនត្រូវបានគេចាត់ទុកថា ជាភាពយន្តលក្ខណៈឯករាជ្យ ដែលអាចចំណាយដើមទុនពី ១០ម៉ឺនដុល្លារ ដល់ជាង៣លានដុល្លារ។ ភាពយន្តលក្ខណៈ Low Budget ជាប្រភេទភាពយន្តមានការពេញនិយមជាខ្លាំង ចំពោះផលិតករជំនាន់ថ្មី ដែលពួកគេអាចសាកល្បងផលិតនូវអ្វីដែលថ្មី ដោយមិនប្រឈមមុខនឹងការខាតបង់ច្រើនហួសហេតុ។ ជាក់ស្ដែងភាពយន្តលក្ខណៈ Low Budget មួយចំនួនពិតជាទទួលបានភាពជោគជ័យខ្លាំង។

ភាពយន្ត "Another Earth"

ភាពយន្ត "Another Earth” បញ្ចេញឆ្នាំ ២០១១ ចំណាយដើមទុនផលិត ១០ម៉ឺនដុល្លាររកចំណូលបាន ១,៣១៦,០៧៤ដុល្លារ។ ភាពយន្ត "Paranormal Activities” បញ្ចេញឆ្នាំ ២០០៧ ចំណាយដើមទុនផលិត ១ម៉ឺន៥ពាន់ដុល្លារហើយមានលទ្ធភាពរកចំណូលបានដល់ទៅជាង ១៩៣លានដុល្លារទូទាំងពិភពលោក។ ភាពយន្ត "Buried” ឆ្នាំ២០១០ចំណាយដើមទុន ៣លានដុល្លារ រកចំណូលបានជាង ១៩លានដុល្លារ។

ភាពយន្ត "Paranormal Activity"

ភាពយន្ត "Buried"

៣. ភាពយន្តលក្ខណៈដើមទុនមធ្យម

ភាពយន្តប្រភេទនេះ អាចត្រូវគេចាត់ទុកថាជាប្រភេទភាពយន្តដែលអាចប្រឈមមុខនឹងហានិភ័យខ្ពស់។ ដូច្នេះមុននឹងចាប់ផ្ដើមដំណើរការផលិត ផលិតករនិងអ្នកនិពន្ធតែងតែចំណាយពេលជាច្រើន ដើម្បីសិក្សាឲ្យបានដិតដល់ មុននឹងចាប់ផ្ដើមគម្រោង។ ភាពយន្តដែលត្រូវចាត់ទុកថាជា Medium Budget គឺអាចស្ថិតនៅចន្លោះពី ៥លានដុល្លារទៅដល់ ៣០លានដុល្លារ។ ចំពោះដើមទុនចំនួននេះក៏ត្រូវគេចាត់ទុកថាជាភាពយន្តបែបឯករាជ្យផងដែរ ប៉ុន្តែមានតិចតួចចំពោះដើមទុនកម្រិតនេះ។

ភាពយន្ត "The Conjuring"

ភាពយន្ត "The Conjuring” បញ្ចេញឆ្នាំ ២០១៣ មានលទ្ធភាពរកចំណូលដល់ទៅជាង ៣០០លានដុល្លារទូទាំងពិភពលោក ដោយចំណាយដើមទុនតែ ២០លានដុល្លារ ព្រមទាំងមានលទ្ធភាពបញ្ចេញភាពយន្តសែស្រឡាយនេះជាបន្តបន្ទាប់។ ភាពយន្ត "Juno” បញ្ចេញឆ្នាំ ២០០៨ ចំណាយដើមទុនជាង ៧លានដុល្លារ ហើយរកចំណូលបានដល់ទៅជាង ២៣០លានដុល្លារ។ ភាពយន្ត "Slumdog Millionaire” ចំណាយដើមទុនផលិត ១៥លានដុល្លារ រកចំណូលបានជាង ៣៧៧លានដុល្លារ។

ភាពយន្ត "Juno"

ភាពយន្ត "Slumdog Millionaire"

៤. ភាពយន្តចំណាយដើមទុនខ្ពស់ (Blockbuster)

ភាពយន្តប្រភេទនេះជាប្រភេទភាពយន្តដែលកំណត់ទុកស្រេចថា នឹងរកចំណូលបានខ្ទង់រយលានដុល្លារ ពេលខ្លះដល់ពាន់លានដុល្លារ។ ភាគច្រើនជាប្រភេទសែស្រឡាយភាពយន្តល្បីៗ ដូចជា "Avengers”, “Avatar” និង "Jurassic World” ជាដើម។ ភាពយន្តប្រភេទនេះចូលរួមសម្ដែងដោយតារាសម្ដែងលំដាប់កំពូលនៅហូលីវូដ ហើយដើមទុនដែលគ្រោងទុកសម្រាប់ផលិតគឺខ្ទង់ជាង ៥០លានដុល្លារ និងច្រើនជាងនេះ។ ជាក់ស្ដែងភាពយន្ត "Pirates of the Caribbean: Dead Man's Chest” បញ្ចេញឆ្នាំ ២០០៦ ចំណាយដើមទុនជាង ២២៥លានដុល្លារ និងភាពយន្ត "Avengers: Infinity War” បញ្ចេញឆ្នាំ ២០១៨ នេះចំណាយដើមទុនជាង ៣២១លានដុល្លារ៕