ល្បីថាលោក Zidane នឹងទទួលបានតំណែងមួយនៅក្លឹប Juventus

2018-07-18 11:41:15
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតអ្នកចាត់ការ Real Madrid លោក Zinedine Zidane ក្នុងថ្ងៃនេះ ត្រូវបានគេរាយការណ៍ថាទទួលបានតំណែងមួយក្នុងក្លឹប Juventus។

បើតាម Libertad Digital ហើយយកមកចុះផ្សាយបន្តដោយសារព័ត៌មានល្បីឈ្មោះអេស្ប៉ាញ Marca ក្នុងថ្ងៃនេះបានឲ្យដឹងថា លោក Zidane ទទួលបានតំណែងជា "ទីប្រឹក្សា" របស់នាយកផ្នែកកីឡារបស់ក្លឹប Juventus លោក Fabio Paratici។

សារព័ត៌មានដដែលបានអះអាងថា លោក Zidane នឹងចាប់ផ្ដើមចូលបំពេញតួនាទីនេះ នៅខែតុលាខាងមុខ។

សូមបញ្ជាក់ផងដែរថា ការចុះផ្សាយនេះ ធ្វើឡើង ២ ថ្ងៃប៉ុណ្ណោះ ក្រោយខ្សែប្រយុទ្ធ Cristiano Ronaldo បានចូលរួមជាផ្លូវការជាមួយក្លឹប Juventus។

កាលនៅជាកីឡាករ អតីតខ្សែបម្រើ Zidane ធ្លាប់លេងឲ្យក្លឹប Juventus ពីឆ្នាំ ១៩៩៦ ដល់២០០១។

លោក Zinedine Zidane ត្រូវបានមជ្ឈដ្ឋានជាច្រើនទទួលស្គាល់ថា ជាអ្នកចាត់ការមួយដ៏ល្អ ដោយលោកបានជួយក្លឹប Real Madrid ឲ្យឈ្នះពាន Champions League ដល់ទៅបីលើកជាប់គ្នា ក្នុងអំឡុងពេលបីឆ្នាំដែលលោកបានដឹកនាំក្លឹប។ ទោះជាយ៉ាងណា ក្រោយពីឈ្នះពាន Champions League លើកទី ៣ កាលពីចុងខែឧសភា កន្លងទៅ ស្រាប់តែលោក បានប្រកាស "លាលែង" ពីតំណែងជាអ្នកចាត់ការក្លឹបតែម្ដង។ កាលនោះ លោកមិនបាននិយាយបកស្រាយច្រើនទេ ដោយគ្រាន់តែថា៖ "ក្រោយរយៈពេល ៣ ឆ្នាំ ការផ្លាស់ប្ដូរគឺចាំបាច់"៕

ប្រភព៖ Marca ប្រែសម្រួល៖ ហ៊ីម រស្មី