ក្លឹបAjax ផ្ញើសារទៅ Barca ថា ទោះឲ្យថ្លៃប៉ុនណា ក៏ក្លឹបមិនលក់កីឡាករពីរនេះដែរ
- 2018-07-19 11:23:45
- ចំនួនមតិ 0 | ចំនួនចែករំលែក 0
ក្លឹបAjax ផ្ញើសារទៅ Barca ថា ទោះឲ្យថ្លៃប៉ុនណា ក៏ក្លឹបមិនលក់កីឡាករពីរនេះដែរ
ចន្លោះមិនឃើញ
ក្លឹប Ajax ក្នុងថ្ងៃនេះបានឲ្យដឹងថា ក្លឹបនឹងមិនលក់ ខ្សែការពារ Matthijs de Ligt និង ខ្សែបម្រើ Frenkie de Jong ឡើយ ទោះក្លឹបដែលចាប់អារម្មណ៍ឲ្យតម្លៃប៉ុនណាក៏ដោយ។
ពេលដែលត្រូវបានអ្នកសារព័ត៌មានសួរទាក់ទងនឹងពាក្យចចាមអារ៉ាមទាក់ទងនឹងកីឡាករទាំងពីរខាងលើ នាយកផ្នែកកីឡារបស់ក្លឹបហុល្លង់ លោក Marc Overmars បាននិយាយថា៖ "យើងនឹងមិនលក់ Frenkie ទេ ក្នុងរដូវកាលដោះដូរលើកនេះ ហើយខ្ញុំបានប្រាប់ភាគីពាក់ព័ន្ធរួចរាល់អស់ហើយ។ Matthijs ក៏អ៊ីចឹងដែរ។ ក្លឹបដែលចាប់អារម្មណ៍ ចាំឆ្នាំក្រោយ ចាំមកទាក់ទងទៀត"។
លោកនាយករូបនេះ ក៏បានបង្ហាញពីការលំបាកដែរ ក្នុងការរក្សាទុកកីឡាករល្អក្នុងស្ថានភាពទីផ្សារផ្ទេរបច្ចុប្បន្ន។ ទោះជាយ៉ាងណា កីឡាករទាំងពីរខាងលើ គឺជាកីឡាករដែលក្លឹបត្រូវទុកឲ្យបានក្នុងរដូវកាលដោះដូរនេះ។
លោក Overmars បន្ត៖ “Frenkie de Jong, Donny van de Beek និង Matthijs de Ligt នឹងមិនត្រូវបានក្លឹបលក់ឡើយ ក្នុងរដូវកាលដោះដូរលើកនេះ ទោះជាមានក្លឹបឲ្យតម្លៃច្រើនប៉ុនណាក៏ដោយ។ ពួកគេគួរត្រៀមលេង ៤០ ប្រកួតឲ្យ Ajax នារដូវកាល ២០១៨/១៩"។
សូមបញ្ជាក់ផងដែរថា ខ្សែបម្រើ Frenkie de Jong ត្រូវបានគេរាយការណ៍ថា បានបង្ហាញទម្រង់លេងបានយ៉ាងល្អនៅ Ajax។ កីឡាករវ័យ ២១ ឆ្នាំ លេងសរុប ២៦ ប្រកួតឲ្យក្លឹបកាលពីរដូវកាលមុន។
ចំណែកខ្សែការពារ Matthijs de Ligt វិញ ក៏បានបង្ហាញទម្រង់លេងល្អ មិនធម្មតាដែរឲ្យក្លឹបហុល្លង់។ ទោះជាមានវ័យក្មេងទើប ១៨ ឆ្នាំ កាលពីរដូវកាលមុន កីឡាករបានលេងដល់ទៅ ៣៧ ប្រកួត និងស៊ុតចូល ៣ គ្រាប់។
កន្លងមក មានក្លឹបធំៗជាច្រើន ជាពិសេស Barcelona ត្រូវបានគេរាយការណ៍ថា បានកំពុងតាមទិញកីឡាករទាំងពីរ។
ជំហរមាំរបស់ Ajax នេះ ធ្វើឡើងបន្ទាប់ពីក្លឹបទើបលក់កីឡាករប្រយុទ្ធវ័យ ១៩ ឆ្នាំ Justin Kluivert ក្នុងតម្លៃប្រមាណ ១៧ លានអឺរ៉ូ (ជិត ២០ លានដុល្លារសហរដ្ឋអាមេរិក) ទៅឲ្យ Roma កាលពីខែមុន៕