អេង មុនីរ័ត្ន ជាប់ជាអ្នកធ្វើការលើយន្តហោះថ្មីៗ ប្រាប់គន្លឹះសំខាន់ៗបំផុតសម្ភាសន៍ឲ្យជាប់

2018-07-20 05:09:58
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញារូបស្រស់ អេង មុន្នីរ័ត្ន ទើបតែសម្ភាសន៍ និងធ្វើតេស្តជាប់ជាស្ថាពរក្លាយជាអ្នកធ្វើការលើយន្តហោះ ( Cabin Crew) ឲ្យក្រុមហ៊ុនជើងហោះហើរ JC International Airline កាលពីដើមឆ្នាំ២០១៨ ថ្មីៗនេះបានចែករំលែកពីជីវិតតស៊ូ ការអត់ធ្មត់ រហូតទទួលបានការងារមួយដែលនារីៗជាច្រើនប្រាថ្នាចង់ធ្វើ។ ជាពិសេសនោះក៏បានចែករំលែកគន្លឹះសំខាន់ៗ ដើម្បីសម្ភាសន៍ឲ្យទទួលបានជោគជ័យនៅក្នុងក្រុមហ៊ុនជើងហោះហើរ។ តទៅនេះ Sabay សូមបង្ហាញគន្លឺះសំខាន់ៗ និងជីវិតតស៊ូដូចខាងក្រោមនេះ៖

១. ពេលដាក់ពាក្យសំខាន់បំផុតការជ្រើសរើសរូបថតភ្ជាប់ជាមួយ

ជាធម្មតាក្រុមហ៊ុនជើងហោះហើរនានា តែងតម្រូវឲ្យភ្ជាប់រូបថតមួយជំហរខ្លួន១សន្លឹក ឬ២សន្លឹក។ ជាបទពិសោធន៍របស់កញ្ញា យកល្អមិនចាំបាច់ទៅថតនៅក្នុង Studio ឡើយព្រោះដឹងតែគេមិនយកតែម្ដង គួរតែប្រើរូបធម្មជាតិបង្ហាញសម្រស់ពិតៗវិញល្អជាង។ ជាក់ស្ដែងកញ្ញាបានដាក់រូបដែលថតនៅពេលធ្វើដំណើរកម្សាន្ត ជារូបដែលមិនមានការ Make Up អ្វីឡើយគឺរូបសាមញ្ញបែបធម្មជាតិ។ ចំណែកឯកសារសំខាន់ៗត្រូវភ្ជាប់ទៅជាមួយដែរនោះ គឺលិខិតឆ្លងដែន និងអត្តសញ្ញាណបណ្ណ។

២. ភាសាបរទេស

ចំពោះភាសាបរទេសវិញគេតម្រូវឲ្យចេះច្រើនភាសា តែចំពោះមុនីរ័ត្ន ចេះតែភាសាអង់គ្លេសតែមួយគត់ ប៉ុន្តែនៅតែអាចជាប់បានឲ្យតែចេះច្បាស់លាស់។ ដូច្នេះមានន័យថា ពេលខ្លះមិនចាំបាច់តែចេះច្រើនភាសាទើបជាប់នោះទេ ឲ្យតែមានលក្ខណៈសម្បត្តិច្រើន និងចំណុចពិសេសក៏អាចជាប់ដូចគ្នា។ អ្វីដែលសំខាន់បើមិនចេះច្រើនភាសា សូមឲ្យតែអង់គ្លេសចេះឲ្យច្បាស់ បើចេះលំៗមិនជាប់ឡើយ ព្រោះអង់គ្លេសប្រើប្រាស់ច្រើនជាងភាសាណាទាំងអស់នៅលើយន្តហោះ។

៣. រោះរាយរាក់ទាក់ និងមានភាពចាស់ទុំច្រើន

ជាអំណោយផលពីធម្មជាតិរបស់កញ្ញាស្រាប់ ដូច្នេះវាអាចជាភាពទាក់ទាញមួយសម្រាប់ មុនីរ័ត្ន។ ស្នាមញញឹម រោះរាយ ក្លាហាន និងមានភាពចាស់ទុំក្នុងពេលទៅសម្ភាស គឺសំខាន់បំផុតប្រសិនបើចង់ឲ្យមានការចាប់អារម្មណ៍ខ្ពស់ពីអ្នកសម្ភាស។ ព្រោះនៅលើយន្តហោះត្រូវជួបមនុស្សជាច្រើន មានជាតិសាសន៍ផ្សេងគ្នា ហើយមានបញ្ហាជាច្រើនដែលត្រូវប្រឈម។ ដូច្នេះភាពរោះរាយ ការអត់ធ្មត់ មិនឆេវឆាវ ឥរិយាបថថ្លៃថ្នូរសុភាពរាបសាគឺសំខាន់បំផុត។

៤. ការតុបតែងខ្លួនគឺសំខាន់បំផុត

ក្នុងពេលទៅសម្ភាសន៍ ចំណុចសំខាន់បំផុតនោះ គឺការតុបតែងខ្លួនធ្វើយ៉ាងណាឲ្យបានស្អាតមានរបៀបរៀបរយបង្ហាញពីសម្រស់របស់ខ្លួនឯង។ មុនីរ័ត្ន ប្រាប់ថាពេលទៅសម្ភាសគួរពាក់អាវវាលក្លៀក ស្លៀកសំពត់ត្រឹមជង្គង់។ ចំពោះមុខត្រូវ Make up បែបធម្មជាតិឲ្យបានស្អាត បួងសក់ទៅលើ។ ព្រោះគេត្រូវមើលថាតើដៃជើង មានសន្លាក់ មានស្នាម ឬរបួសត្រង់ណាទេ។

៥. ស្រាវជ្រាវខ្លះៗពីតួនាទីរបស់អ្នកធ្វើការលើយន្តហោះ

ក្នុងពេលសម្ភាសគេនឹងសួរខ្លះៗ ពីការងាររបស់អ្នកបម្រើការលើយន្តហោះ។ ដូច្នេះគួរតែស្រាវជ្រាវខ្លះៗ ជាពិសេសសម្រាប់អ្នកមិនដែលជិះយន្តហោះសោះដូចជាកញ្ញាផ្ទាល់។

៦. បញ្ហាសុខភាព និងត្រូវចេះហែលទឹក

សុខភាពកាន់តែសំខាន់ សម្រាប់អ្នកចង់ធ្វើការលើយន្តហោះ។ គណៈកម្មការសម្ភាសន៍នឹងត្រួតពិនិត្យទៅលើកាយសម្បទា ថាតើរឹងមាំដែរឬទេ? ហើយត្រូវទៅពនិត្យសុខភាពរកមើលជំងឺផ្សេងៗទៀត។ ប្រសិនបើសុខភាពមិនល្អ ទោះមានចំណេះដឹង និងសមត្ថភាពប៉ុណ្ណាក៏ពិបាកជាប់ដែរ។ បន្ថែមលើពីនេះក៏ត្រូវចេះហែលទឹកឲ្យបានស្ទាត់ជំនាញផងដែរ។

៧. ការគោរពពេលវេលា

ក្នុងពេលទៅសម្ភាសន៍ហាមយឺតឲ្យសោះ ព្រោះនេះជាចំណុចដែលអ្នកជ្រើសរើសកត់សម្គាល់ខ្លាំងបំផុត។ ប្រសិនបើគេណាត់ម៉ោងប៉ុន្មាន គឺត្រូវតែទៅតាមការកំណត់មិនអាចលើសសូម្បីតែ១នាទី។ អ្នកធ្វើការលើយន្តហោះ គឺតឹងរ៉ឹងបំផុតពេលវេលា បើជើងហោះហើរត្រូវចេញម៉ោងប៉ុន្មាន គឺម៉ោងប៉ុណ្ណឹងហើយ មិនដូចការងារលើដីទេ។ នេះបើតាមការបញ្ជាក់ពីកញ្ញា អេង មុនីរ័ត្ន។

៨. ការហ្វឹកហាត់ក្រោយជាប់សម្ភាសន៍

ក្រោយជាប់ការសម្ភាសន៍ហើយ ក៏មិនប្រាកដថាជាប់ជាស្ថាពរនោះទេ គឺត្រូវធ្វើការអនុវត្តជាក់ស្ដែង លើយន្តហោះតែម្ដង។ ចំពោះក្រុមហ៊ុនជើងហោះហើររបស់កញ្ញា ត្រូវធ្វើការហ្វឹកហាត់៨ជើង ហើយក្នុងនោះត្រូវខិតខំប្រឹងប្រែងយកចិត្តទុកដាក់ឲ្យមែនទែន កុំធ្វេសប្រហែសឲ្យសោះ ត្រូវមានមើលមេរៀននិងឯកសារសំខាន់ៗ ដែលគេទម្លាក់ឲ្យ។ ក្រោយជាប់ការហ្វឹកហាត់នោះហើយ ទើបក្លាយជា Cabin Crew មានអាជ្ញាប័ណ្ណត្រឹមត្រូវ។

ប្រវត្តិសិក្សា និងការតស៊ូ របស់កញ្ញា អេង មុនីរ័ត្ន៖

យុវតីវ័យ២៨ឆ្នាំរូបនេះ មានស្រុកកំណើតនៅរាជធានីភ្នំពេញ មានបងប្អូន២នាក់នៅក្នុងគ្រួសារ។ មុនីរ័ត្ន ប្រឡងជាប់មធ្យមសិក្សាទុតិយភូមិនៅឆ្នាំ២០០៩ ហើយបានបន្តការសិក្សានៅសាកលវិទ្យាល័យប៊ែលធី លើជំនាញអក្សរសាស្ត្រអង់គ្លេស ទាំងខ្លួនឯងមិនទាន់ចេះភាសាអង់គ្លេសសូម្បីតែពាក្យ Hi, Hello ផងនោះ។ តែវាមិនបានធ្វើឲ្យនារីរូបស្រស់ធ្វើការលើយន្តហោះមានអាជ្ញាប័ណ្ណពីក្រសួងរូបនេះតូចចិត្តឡើយ ផ្ទុយមកវិញមុនីរ័ត្នខិតខំចាប់ជំនាញនេះយ៉ាងច្បាស់លាស់ ហើយថែមទាំងធ្វើការបណ្ដើររៀនបណ្ដើរទៀតផង។

ប្រាក់ខែដែលមុនីរ័ត្នទទួលបានដំបូងបំផុតក្នុងជីវិតការងារ ត្រឹមតែ១៥០ដុល្លារប៉ុណ្ណោះក្នុងក្រុមហ៊ុន ឯកជនមួយ។ ធ្វើការពីច័ន្ទ ដល់សុក្រ ហើយរៀនថ្ងៃចុងសប្ដាហ៍ផងនោះ មុនីរ័ត្ន មិនដែលមានពេលវេលាទំនេរដើរលេងសប្បាយជួបជុំមិត្តភក្ដិនោះទេ ហើយនេះក៏ជាមូលហេតុធ្វើឲ្យរូបនាងមិនសូវមានមិត្តភក្ដិច្រើនដូចគេ។ ពេលខ្លះក៏មានអារម្មណ៍តូចចិត្តពេលដែលក្រឡេកឃើញអ្នកដទៃ មិនបាច់ធ្វើការផងរៀនផង គេអាចរៀនដល់ទៅពីរបីជំនាញក្នុងពេលតែមួយ ខុសស្រឡះពីរូបនាងត្រូវធ្វើការ ដើម្បីរកលុយមករៀន។

លុះក្រោយមកទៀត មុនីរ័ត្ន បានផ្លាស់ប្ដូរការងារជាបន្តបន្ទាប់ពីក្រុមហ៊ុនមួយទៅក្រុមហ៊ុនមួយ ហើយប្រាក់ខែចេះតែកើនឡើងតាំងពី២០០ ដល់៣០០ដុល្លារ ដែលជាប្រាក់ខែចុងក្រោយពេលដែលរូបនាងបានធ្វើជាជំនួយការផ្នែករដ្ឋបាលនៅសាកលវិទ្យាល័យឯកជនមួយ។ ក្រោយបញ្ចប់ការសិក្សាថ្នាក់បរិញ្ញាបត្រ កញ្ញាក៏បានបន្តការសិក្សាថ្នាក់អនុបណ្ឌិតទៀតលើជំនាញដដែល ដើម្បីឲ្យចេះកាន់តែច្បាស់ ព្រោះកញ្ញាចងចាំពាក្យផ្ដាំរបស់លោកឪពុកថា បើរៀនជំនាញមួយឲ្យច្បាស់មួយ កុំចាប់នេះចាប់នោះចេះមិនច្បាស់។ ក្រោយបញ្ចប់ការសិក្សាថ្នាក់អនុបណ្ឌិត មុនីរ័ត្ន ប្រាប់ថាមិនអាចនៅតែធ្វើការប្រាប់ខែ៣០០ដុល្លារទៀតនោះទេ ទើបកញ្ញាបានសម្រេចចិត្តដាក់ពាក្យធ្វើការលើយន្តហោះតែម្ដង៕

អត្ថបទ៖ វឌ្ឍនៈ