ខ្សែប្រយុទ្ធកំពូល៤រូបដែលលេងបានតិចជាង៩០នាទីនៅ World Cup
- 2018-07-20 08:05:21
- ចំនួនមតិ 0 | ចំនួនចែករំលែក 0
ខ្សែប្រយុទ្ធកំពូល៤រូបដែលលេងបានតិចជាង៩០នាទីនៅ World Cup
ចន្លោះមិនឃើញ
World Cup បានបញ្ចប់ទៅជិត១សប្ដាហ៍ហើយ ក្រោយប្រកួតគ្នាយ៉ាងតានតឹងអស់ពេលប្រហែល១ខែ។ ការប្រកួតនៅរុស្ស៊ីលើកនេះត្រូវបានគេចាត់ទុកជា World Cup ដ៏គួរឲ្យចាប់អារម្មណ៍មួយដោយសារក្រុមខ្លាំងៗជាច្រើនត្រូវធ្លាក់ចេញពីកម្មវិធីតាំងពីវគ្គចែកពូល និងបន្តធ្លាក់នៅវគ្គ១៦ក្រុមចុងក្រោយ រហូតចុងក្រោយបារាំងបានក្លាយជាជើងឯក។
ក្រូអាត, អង់គ្លេស និង បែលហ្សិក បានឡើងរហូតដល់វគ្គ៤ក្រុមចុងក្រោយគ្មាននរណានឹកស្មានដល់ស្របពេល ប្រេស៊ីល អេស្ប៉ាញ អាហ្សង់ទីន អាល្លឺម៉ង់ និងអ៊ុយរ៉ាហ្គាយជាដើម ធ្លាក់ខ្ទេចគ្មានសល់។ ការដើរចេញពីកម្មវិធីលឿនពេករបស់ក្រុមខ្លាំងៗធ្វើឲ្យខ្សែប្រយុទ្ធឆ្នើមមួយចំនួនគ្មានឱកាសបង្ហាញសមត្ថភាពលើទីលាន ដូចការរំពឹងទុក។ ខាងក្រោមគឺខ្សែប្រយុទ្ធ៤រូបដែលលេងបានតិចជាង៩០នាទីនៅ World Cup៖
#១ Paulo Dybala
Paulo Dybala គឺជាខ្សែប្រយុទ្ធឆ្នើមវ័យក្មេងមួយរូបរបស់អាហ្សង់ទីន ប៉ុន្តែរូបគេត្រូវគ្រូបង្វឹកមើលរំលង ហើយគ្មានឱកាសលេងច្រើនជាមួយ Lionel Messi ដូច Aguero, Di Maria និង Higuain ទេក្រោយការដឹកនាំរបស់លោក Sampaoli នៅ World Cup។ កីឡាករដែលស៊ុត២២គ្រាប់ នៅ Serie A រដូវកាលមុនលេងបានត្រឹម ២២នាទីពី ៤ប្រកួតរបស់អាហ្សង់ទីន ដោយ២២នាទីនោះក្នុងការប្រកួតដែលក្រុមជើងខ្លាំងអាមេរិកឡាទីនចាញ់ក្រូអាត ៣ទល់នឹង០។
#២ Roberto Firmino
ខ្សែប្រយុទ្ធដ៏លេចធ្លោ និងលេងសឹងគ្រប់ប្រកួតឲ្យ Liverpool គឺ Roberto Firmino លេងបានត្រឹម៨១នាទីប៉ុណ្ណោះពី៤ប្រកួតរបស់ប្រេស៊ីល។ ទោះមិនបានលេងជម្រើសដំបូងឲ្យប្រេស៊ីលដូច Gabriel Jesus តែ Firmino ស៊ុតចូលទីបាន១គ្រាប់ទល់នឹងម៉ិកស៊ិកជួយក្រុមរហស្សនាមថាសាំបាឡើងទៅវគ្គ៨ក្រុមចុងក្រោយ World Cup។
#៣ Nabil Fekir
បារាំងជាជើងឯក World Cup ប៉ុន្តែ Nabil Fekir ដែលជាខ្សែបម្រើប្រយុទ្ធលេចធ្លោមួយរូបរបស់ពួកគេលេងបានតែ៦៨នាទីប៉ុណ្ណោះពី៦ប្រកួត។ Fekir ស៊ុតបញ្ចូលទី១៨គ្រាប់ និងបញ្ជូនឲ្យមិត្តរួមក្រុមស៊ុត៨ដង ពី៣០ប្រកួតនៅ Ligue 1 ជាមួយក្រុម Lyon កាលពីរដូវកាលមុន ប៉ុន្តែកីឡាករវ័យ២៥ឆ្នាំរូបនេះត្រូវគ្រូបង្វឹកមើលរំលង។
#៤ Florian Thauvin
កាន់តែកម្សត់ជាង Fekir ទៀតនោះគឺ Florian Thauvin លេងបានតែ១នាទីប៉ុណ្ណោះឲ្យក្រុមជើងឯកបារាំងនៅ World Cup។ ខ្សែប្រយុទ្ធ Marseille ស៊ុតបញ្ចូលទី២២គ្រាប់ និងបញ្ជូនឲ្យមិត្តរួមក្រុមស៊ុត១១ដងពី ៣៥ប្រកួតនៅ Ligue 1 តែត្រូវគ្រូបង្វឹក Didier Deschamps ដាក់ឲ្យលេងចុងម៉ោងកាលពីប្រកួតទល់នឹងដាណឺម៉ាក៕