CEO ជនជាតិថៃម្នាក់ ទទួលគ្រឿងឥស្សរិយយសពីមហាក្សត្រខ្មែរ ព្រោះហេតុផលយ៉ាងពិសេស

2018-07-20 08:18:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រះករុណាព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានសព្វព្រះរាជហឬទ័យប្រោសប្រទានគ្រឿងឥស្សរិយយសសហមេត្រី ថ្នាក់មហាសេរីវឌ្ឍន៍ ដល់នាយកក្រុមហ៊ុនSCG ប្រចាំប្រទេសកម្ពុជា។

ការផ្ដល់ជូនខាងលើកើតឡើងដោយសារ ពហុសាជីវកម្មឈានមុខគេនៅក្នុងតំបន់អាស៊ាននេះ បានទទួលខុសត្រូវលើបញ្ហាសង្គមនានាក្នុងប្រទេសកម្ពុជា ដោយបរិច្ចាកថវិកាជាហូរហែដល់មន្ទីរពេទ្យគន្ធបុប្ផា ស្ថាប័នកីឡាជាតិ និងផ្ដល់អាហារូបករណ៍ដល់សិស្សក្រីក្រជាដើម។

សម្ដេចព្រះមហាសង្ឃរាជនៃគណៈធម្មយុត្តិកនិកាយ បួរ គ្រី បានតំណាងព្រះមហាក្សត្រ យាងនិមន្តចូលរួមក្នុងពិធីប្រគល់គ្រឿងឥស្សរិយយសនេះដល់លោក Somwang Manpimonchai នាយកក្រុមហ៊ុន SCG ប្រចាំកម្ពុជា។

លោក Somwang មានប្រសាសន៍ថា៖ "នេះមិនត្រឹមតែជាការលើកទឹកចិត្តដ៏ធំធេងសម្រាប់រូបខ្ញុំប៉ុណ្ណោះទេ ប៉ុន្តែក៏ជាគ្រឿងលើកទឹកចិត្តសម្រាប់បុគ្គលិកទាំងអស់គ្នានៅឯក្រុមហ៊ុន SCG ផងដែរ"។

លោកបន្តថា រូបលោកនិងបុគ្គលិកទាំងអស់ មិនត្រឹមតែយកចិត្តទុកដាក់លើការធ្វើអាជីវកម្មឲ្យទទួលជោគជ័យប៉ុណ្ណោះទេ តែក៏យកចិត្តទុកដាក់ចំពោះភាពចម្រុងចម្រើននៃសហគមន៍ដែលខ្លួនកំពុងធ្វើប្រតិបត្តិការអាជីវកម្មផងដែរ។ គ្រប់គ្នាសុទ្ធតែមានសេចក្ដីតាំងចិត្តក្នុងការធ្វើជាក្រុមហ៊ុនអាជីវកម្មល្អ តាមរយៈការដាក់ចេញនូវកម្មវិធីទំនួលខុសត្រូវសង្គមផ្សេងៗ។

កាលពីពេលថ្មីៗ បុគ្គលិក និងដៃគូផ្គត់ផ្គង់របស់ SCG ក៏បានធ្វើការបរិច្ចាគប្រាក់ជាលើកទី២ដល់មន្ទីរពេទ្យគន្ធបុប្ផា ដើម្បីគាំទ្រដល់ប្រតិបត្តិការសង្គ្រោះជីវិតកុមារនៅកម្ពុជា។ ក្រុមហ៊ុនក៏បានបន្តការគាំទ្រដល់សហព័ន្ធកីឡាបាល់ទាត់កម្ពុជាដើម្បីជួយអភិវឌ្ឍវិស័យកីឡាបាល់ទាត់នៅប្រទេសនេះផងដែរ៕

អត្ថបទ៖ សុខណា

ពាក្យទាក់ទង