ក្រោយចែកផ្លូវគ្នាបានជាងមួយសប្ដាហ៍ Conte ត្រៀមប្ដឹង Chelsea
- 2018-07-23 11:54:15
- ចំនួនមតិ 0 | ចំនួនចែករំលែក 0
ក្រោយចែកផ្លូវគ្នាបានជាងមួយសប្ដាហ៍ Conte ត្រៀមប្ដឹង Chelsea
ចន្លោះមិនឃើញ
អ្នកចាត់ការ Antonio Conte ត្រូវបានសារព័ត៌មានល្បីអង់គ្លេសមួយ រាយការណ៍ថា នឹងដាក់ពាក្យប្ដឹងក្លឹប Chelsea ព្រោះក្លឹបប្រើពេលយូរពេក ក្នុងការដេញខ្លួន។
អ្នកចាត់ការ Conte ត្រូវបានរបាយការណ៍ជាច្រើន ចុះផ្សាយថា នឹងត្រូវ Chelsea បញ្ចប់ពីការងារជាអ្នកចាត់ការនៅពេលរដូវកាល ២០១៧/១៨ ចប់នាខែឧសភា។ ទោះជាយ៉ាងណា ក្លឹបតោខៀវប្រើពេលដល់ទៅពីរខែបន្ទាប់ ទើបដាច់ចិត្តបណ្ដេញអ្នកចាត់ការអ៊ីតាលី។
Conte ត្រូវបានរាយការណ៍ថា នឹងទទួលបានប្រាក់សំណងជិត ១២ លានដុល្លារសហរដ្ឋអាមេរិកពី Chelsea បន្ទាប់ពីក្លឹបបញ្ចប់ការងារខ្លួន។
ទោះជាយ៉ាងណា អ្នកចាត់ការអ៊ីតាលី ចង់បានពី Chelsea ច្រើនជាងនេះ។ បើតាមការអះអាងរបស់សារព័ត៌មាន The Times លោក Conte កំពុងដាក់ពាក្យប្ដឹងក្លឹប ព្រោះអ្នកចាត់ការចង់បានប្រាក់សងជំងឺចិត្តបន្ថែម សងថ្លៃខូចខាតអំឡុងពេលពីរខែនេះ។ ប្រភពដដែលបានលើកហេតុផលថា លោក Conte អាចយកពេលនោះទៅប្រកបការងារអ្វីផ្សេងដើម្បីរកចំណូលបន្ថែម។ ណាមួយ Conte បានខូចខាតកិត្តិយសយ៉ាងច្រើនពីសំណាក់សារព័ត៌មាន ដោយសារតែ Chelsea មិនព្រមបញ្ចប់ការងាររបស់អ្នកចាត់ការឲ្យដាច់ស្រេចកាលពីខែឧសភា។
ទោះជាយ៉ាងណា The Times មិនបានបង្ហើបអំពីទំហំទឹកប្រាក់ Conte ចង់ទាមទារពី Chelsea នោះទេ។
សូមបញ្ជាក់ផងដែរថា កាលពីសប្ដាហ៍មុន Conte ត្រូវបាន Chelsea បញ្ចប់ពីការងារ ហើយជំនួសដោយអតីតអ្នកចាត់ការ Napoli លោក Maurizio Sarri៕