មេ Bayern ប្រតិកម្មធ្ងន់ៗទៅនឹងការចូលនិវត្តន៍របស់ Ozilពីក្រុមជម្រើសជាតិអាល្លឺម៉ង់
- 2018-07-23 11:10:27
- ចំនួនមតិ 0 | ចំនួនចែករំលែក 0
មេ Bayern ប្រតិកម្មធ្ងន់ៗទៅនឹងការចូលនិវត្តន៍របស់ Ozilពីក្រុមជម្រើសជាតិអាល្លឺម៉ង់
ចន្លោះមិនឃើញ
ប្រធានក្លឹប Bayern Munich លោក Uli Hoeness ក្នុងថ្ងៃនេះ បានចេញមុខប្រតិកម្មអវិជ្ជមានទៅនឹងការចូលនិវត្តន៍របស់ខ្សែបម្រើប្រយុទ្ធ Mesut Ozil។
លោក Hoeness បាននិយាយ៖ "ខ្ញុំសប្បាយចិត្តណាស់ដែលរឿងគួរឲ្យខ្លាចនេះបានបិទបញ្ចប់។ Ozil បានលេងអន់រាប់ឆ្នាំមកហើយ។ លើកចុងក្រោយដែលគេអាចដណ្ដើមបាល់ពីគូប្រកួត ក្នុងការប្រកួតជាមួយក្រុមជម្រើសជាតិ គឺមុន World Cup២០១៤។ ឥឡូវគេលាក់បាំង ការលេងដ៏អន់របស់គេ នៅពីក្រោយរូបភាពមួយនោះ (ការបង្ហោះសារចូលនិវត្តន៍របស់ Ozil)"។
លោកប្រធានក្លឹបយក្សអាល្លឺម៉ង់ បានបន្តវាយប្រហារ៖ "នៅពេលពួកយើង (Bayern Munich) បានលេងប៉ះជាមួយ Arsenal យើងតែងវាយសម្រុកកន្លែងដែល Ozil ទទួលខុសត្រូវ ព្រោះយើងដឹងថាកន្លែងនោះ គឺជាកន្លែងដែលខ្សោយ"។
លោក Hoeness ថែមទាំងឌឺដងថា អ្នកគាំទ្រនៅតាមបណ្ដាញគណនីទំនាក់ទំនងសង្គមរបស់ Ozil ដែលមានជាង ៣៥ លាននាក់នោះ មិនមែនជាមនុស្សពិតឡើយ។ លោកថា ពួកអ្នកគាំទ្រទាំងនោះ ជឿថា Ozil លេងបានល្អអស្ចារ្យណាស់ ពេលដែលកីឡាករ Cross បាល់មួយចេញ។
ប្រធានក្លឹប Bayern ថាទៀតថា៖ "Ozil ឈប់មានកន្លែងតាំងពីយូរឆ្នាំមកហើយ"។
យ៉ាងនេះក្ដី ប្រធានក្លឹបរូបនេះ មិនបានបកស្រាយភ្ជាប់ជាមួយភស្តុតាងឲ្យច្បាស់ទេ ថាម៉េចបានជាលោកអះអាងបែបនេះ។
សូមបញ្ជាក់ផងដែរថា ក្នុងថ្ងៃនេះ ទោះទើបមានវ័យ ២៩ឆ្នាំ Ozil បានប្រកាសចូលនិវត្តន៍ពីក្រុមជម្រើសជាតិអាល្លឺម៉ង់។ កីឡាករបានលើកឡើងថា "ការរើសអើងពូជសាសន៍ និងការមិនគោរព" ចំពោះខ្លួន ពីសំណាក់មន្ត្រីធំក្នុងសហព័ន្ធបាល់ទាត់អាល្លឺម៉ង់ អ្នកនយោបាយ ដៃគូសហការ និងប្រព័ន្ធផ្សព្វផ្សាយមួយចំនួនរបស់ប្រទេសអាល្លឺម៉ង់ ជាមូលហេតុចម្បងនៅពីក្រោយការសម្រេចចិត្តបែបនេះ។
Ozil កើតនិងធំដឹងក្ដីនៅអាល្លឺម៉ង់ តែមានឪពុកម្ដាយជាជនជាតិទួរគី។ ការណ៍ដែលកីឡាករបានជួបថតរូបជាមួយប្រធានាធិបតីទួរគីកាលពីខែឧសភា កន្លងទៅ បង្កឲ្យមានការខឹងសម្បាជាច្រើនពីសំណាក់អ្នកនយោបាយ (ភាគច្រើនអ្នកស្ដាំនិយម) ប្រជាពលរដ្ឋ និងប្រព័ន្ធផ្សព្វផ្សាយអាល្លឺម៉ង់មួយចំនួនដែលមិនចូលចិត្តទួរគី។
ក្នុង World Cup ២០១៨ អាល្លឺម៉ង់បានធ្លាក់តាំងពីវគ្គ Group Stage។ ការចាកចេញយ៉ាងរហ័សនេះ ធ្វើឲ្យប្រព័ន្ធផ្សព្វផ្សាយអាល្លឺម៉ង់មួយចំនួនចង្អុលចំៗថា Ozil គឺជាមូលហេតុចម្បងដែលធ្វើឲ្យក្រុមលេងមិនល្អ។
Ozil លេង ៩២ លើក និងស៊ុតចូល ២៣ គ្រាប់ឲ្យជម្រើសជាតិអាល្លឺម៉ង់។ កីឡាករបានឈ្នះពានរង្វាន់កីឡាករអាល្លឺម៉ង់ល្អបំផុតប្រចាំឆ្នាំចំនួន ៥ លើក គឺ ២០១១, ២០១២, ២០១៣, ២០១៥ និង ២០១៦៕