កំហុសសាមញ្ញៗ ទាំង ១០ អ្នកថតរូបថ្មីថ្មោង តែងមើលរំលង

2018-07-24 01:43:34
ចំនួនមតិ 0 | ចំនួនចែករំលែក 0

ចន្លោះមិនឃើញ

បើជាអ្នកថតរូបថ្មី ឬចង់បង្កើនជំនាញទៅកម្រិតបន្ទាប់ មានទម្លាប់មិនល្អច្រើន ងាយស្រួលនឹងផុងចូលណាស់។

១) ប្រើឧបករណ៍មិនត្រឹមត្រូវ

ហាក់ធម្មតា អ្នកថតរូបជាច្រើន (ជាពិសេសចំណូលថ្មី) ចំណាយថវិកាផ្ទាល់ខ្លួន ទិញកាមេរ៉ាថ្លៃផុតលេខ តាមលទ្ធភាពខ្លួនមាន។ មានកាមេរ៉ាភ្ជាប់ជាមួយ Sensor កម្រិត Resolution ខ្ពស់ និងមុខងារល្អៗជាការល្អប្រសើរ តែបើទុកថវិកាខ្លះសម្រាប់ Lens នឹងជួយដល់គុណភាពរូបបានច្រើន។

គួរបែងចែកលុយកាក់ ឲ្យមានតុល្យភាពក្នុងការទិញឧបករណ៍។ ទិញកាមេរ៉ាល្អ តែគួរមាន Lens ល្អផងដែរ។ Lens 24-70mm f/2.8 មិនថោកទេ តែជាការវិនិយោគដ៏ល្អ។

២) មើលរំលងវត្ថុតូចតាច

គ្មាននរណាម្នាក់ចង់ឲ្យកាមេរ៉ាអស់ថ្ម ឬ Storage ពេញ ពាក់កណ្ដាលទីកំពុងថតរូបនោះទេ។ ថ្មកាមេរ៉ាបច្ចុប្បន្ន មានលក្ខណៈល្អប្រសើរ តែសូម្បីតែថ្មប្រើលើ DSLR អាយុវែង ក៏មានមួយ ឬពីរស្រគួរទុកផងដែរ ជាការចាំបាច់។

ថ្មប្រ៊េនៗ ថ្លៃ តែមានគុណភាពល្អ ក៏មានជម្រើសផ្សេងផងដែរ តាមលទ្ធភាព ប៉ុន្តែគួរប្រាកដពីសុវត្ថិភាពប្រើប្រាស់។

មេម៉ូរីកាត មានជម្រើសល្អច្រើន តែគួរប្រើរបស់ល្អ ព្រោះសមិទ្ធផលការងារទាំងប៉ុន្មាននៅទីនោះ។ កាមេរ៉ាទំនើបៗ ជាច្រើន មានរន្ធប្រើមេម៉ូរីកាតពីរ ងាយស្រួលពង្រីកទំហំផ្ទុក តែក៏គួរមាន ១ ឬ ២ស្រគួរផងដែរ។ មួយវិញទៀត មិនគួរប្រើមេម៉ូរីទំហំធំពេក តែមួយនោះទេ គួរប្រើទំហំល្មមច្រើន ព្រោះបើមេម៉ូរីខូចមានការប៉ះពាល់តិច។

៣) មិនសម្អាតឧបករណ៍ទៀងទាត់

កាមេរ៉ាជាទ្រព្យរបស់អ្នកថតរូប ទាមទារការថែទាំ។ រាល់ពេលប្រើប្រាស់រួច គួរសម្អាត ដោយប្រើក្រណាត់ទន់ៗ។ មានចំណុចមួយ មិនថាប្រយ័ត្នប៉ុណ្ណា ធូលីដីនៅតែចូលកាមេរ៉ា ទំលើ Sensor ប៉ះពាល់ដល់គុណភាពរូបភាព។

អាចទិញសម្ភារៈសម្អាត Sensor និងរៀនធ្វើដោយខ្លួនឯងបាន ឬជួលអ្នកមានបទពិសោធន៍ដោះស្រាយឲ្យ រៀងរាល់ ៦ ខែម្តង។

៤) រកទីតាំងមិនបានល្អ

បើថតរូបលក្ខណៈ Portrait ឬ ទេសភាព ដឹងពីទីតាំងល្អ អាចបង្កើតរូបភាពចេញមកគួរឲ្យទាក់ទាញ។ គួរស្វែងរកជាមុន ប្រើកម្មវិធីដូចជា Google Maps មើលតាម Street View mode ទៅលើទីតាំង ក៏ដូចជាប្លង់ចង់ផ្ដិតយក ពិតណាស់ទិន្នន័យក្នុងនោះ អាចខុសគ្នា ពីការជាក់ស្ដែង តែក៏ជួយផ្ដល់ជាគំនិតបានខ្លះដែរ។

ក៏គួរគិតគូរពីលក្ខខណ្ឌពន្លឺផងដែរ ដឹងពីទីតាំងព្រះអាទិត្យបង្ហាញនៅពេលវេលាដ៏ល្អ នៃថ្ងៃនីមួយៗ ដោយប្រើកម្មវិធីដូចជា PhotoPills អាចប្រាប់ពីពេលណា កន្លែងណា ថ្ងៃនឹងរះនៅពេលវេលា ឬទីតាំងបានជ្រើសរើស។

៥) តែងតែថតពីលើ

អ្នកថតថ្មីថ្មោង ភាគច្រើនបង្កើតកំហុសលើប្លង់ថត។ រូបមន្ត Rule of Thirds អាចជួយសម្រួលបញ្ហានេះបាន តែវិធីលឿនអាចអនុវត្ត គឺថតមុំផ្សេងក្រៅពីខាងលើទៅ។ បើចង់ អាចប្រើ Drone ល្អសម្រាប់ថតទិដ្ឋភាពធម្មជាតិ ពីខាងលើ ងាយស្រួលទាញការចាប់អារម្មណ៍ពីអ្នកមើល។

៦) ចម្លងស្ទិលពីអ្នកថតដទៃ

ស្នាដៃថតរូបនានា មានលើអ៊ីនធឺណិតរាប់ភ្លេច ជាមួយវិធីថតផងដែរ។ ឃើញគេល្អ មិនប្រាកដថាថតដូចគេចេញមកបានស្អាតប្លែកនោះទេ ប្រហែលពន្លឺអាចខុសគ្នា។ ចម្លងស្នាដៃ ជាការលើកទឹកចិត្តជំរុញការងារល្អ តែព្យាយាមធ្វើឲ្យដូចគេ ជាលទ្ធផលតែម្ដង ជាកំហុសគួរជៀសវាង។

គួរព្យាយាមបង្កើតស្ទិលផ្ទាល់ខ្លួន ហើយជំនាញនឹងអភិវឌ្ឍន៍ជាបន្តបន្ទាប់។

៧) ក្នុងដៃគ្មានកាមេរ៉ា

ប៉ុន្មានដងហើយភ្លេចកាមេរ៉ានៅផ្ទះ ខណៈជួបទិដ្ឋភាពល្អប្លែកភ្នែក។ ការកាន់កាមេរ៉ានឹងដៃ អាចចាប់យករូបភាពបានគ្រប់ពេល ឲ្យតែឱកាសមកដល់ ជាពិសេសទិដ្ឋភាពភ្ជាប់នឹងពន្លឺធម្មជាតិដ៏ល្អ។ ពិតណាស់ មិនងាយស្រួលនោះទេកាន់កាមេរ៉ា DSLR ទៅមកៗ ដូចនេះ គួរមានកាមេរ៉ាតូចល្មមប្រើ បើអាច។

៨) អាងកាត់ត

បច្ចុប្បន្នកាមេរ៉ាជាច្រើន អាចថតទម្រង់ File RAW ភ្ជាប់ព័ត៌មានជាច្រើន អាចកែប្រែបាន តែក៏មិនគួរពឹងលើការកាត់តច្រើនពេកដែរ។ នៅតែល្អ កំណត់កម្រិត Exposure ឲ្យបានត្រឹមត្រូវពេលថត ជាងពឹងលើកម្មវិធីដូចជា Adobe Lightroom។ ការកែប្រែ Saturation និង Clarify មិនត្រឹមត្រូវ អាចប៉ះពាល់ដល់គុណភាពរូប។

៩) ចង់សម្គាល់ស្នាដៃ ពេលចែករំលែក

Watermark ប្រើសម្គាល់ម្ចាស់រូប មិនចង់ឲ្យនរណាម្នាក់យកទៅប្រើ ជាជម្រើសផ្ទាល់ខ្លួន តែតិច ឬច្រើន អាចរំខានដល់អ្នកមើល ចំពោះរូបភាពដ៏ស្រស់ស្អាត។ មួយវិញទៀត បើនរណាម្នាក់ចង់យក អាចតម្រឹម ឬលុបផ្នែកសម្គាល់បាន មិនពិបាកនោះទេ។

ជាការការពារ ពេល Upload រូបភាពគួរប្រើទំហំតូច កុំប្រើទំហំដើម។

១០) ឆាប់បោះបង់ងាយស្រួលពេក

អាកាសធាតុមិនល្អ គ្មាននរណាម្នាក់អាចដឹងបាននោះទេ នេះអាចរំខានដល់ដំណើរការ ឬការរៀបចំដ៏ល្អរបស់អ្នកក្នុងការផលិតរូបភាព។ តែកុំធ្វើឲ្យបញ្ហានេះ បំបាក់ទឹកចិត្តអ្នក។

សម្របតាមអាកាសធាតុ ជ្រើសរើសប្លង់ថតតាមការគួរ ទាំងខាងក្រៅ ឬខាងក្នុង អាចសរ ខ្មៅ, ប្រើ ND Filter ឬរៀបចំថតលក្ខណៈ Macro ឬ Portrait៕