គួរឲ្យបារម្ភ! Lisa សមាជិកក្រុម BLACKPINK មានអ្នកគំរាមឆក់យកជីវិត

2018-07-24 08:48:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ព័ត៌មានគួរឲ្យភ្ញាក់ផ្អើលមួយបានកើតឡើងកាលពីពេលថ្មីៗនេះទាក់ទងនឹងតារាចម្រៀង K-Pop ជនជាតិថៃ Lisa របស់ក្រុម BLACKPINK ក្រោយមានអ្នកគំរាមកំហែងយកជីវិត។

តារាស្រីវ័យក្មេង Lisa ដែលកាន់តំណែងអ្នករ៉េបប្រចាំក្រុម បានទទួលសំណើរទៅកាន់ប្រទេសឥណ្ឌូណេស៊ីនៅថ្ងៃទី ០៩ ខែសីហា ក្នុងនាមជាភ្ញៀវកិត្តិយសនៃពិធីសម្ពោធបើកផ្សារទំនើបអនឡាញថ្មីមួយរបស់ប្រទេសនេះ។ ផ្សារអនឡាញដែលជាដៃគូសហការជាមួយផលិតកម្ម YG នេះ នឹងមានលក់ទំនិញជាច្រើនមុខ ហើយវានឹងចាប់ផ្ដើមបើកដំណើរការនៅថ្ងៃទី ៣០ ខែកក្កដានេះ។

ស្របពេលមនុស្សជាច្រើនកំពូងរំភើប និងត្រៀមខ្លួនស្វាគមន៍ដំណើរមកកាន់ប្រទេសឥណ្ឌូណេស៊ីរបស់ Lisa ជាលើកដំបូង អ្នកគាំទ្រមួយចំនួនក៏មានការព្រួយបារម្ភពីសុវត្ថិភាពរបស់តារាស្រីរូបនេះដែរ គឺទាក់ទងនឹងការគំរាមយកជីវិតតែម្ដង។

ជាក់ស្ដែង ម្ចាស់គណនី Instagram មួយតែងព្យាយាមបង្ហោះពាក្យគំរាមទៅកាន់ គណនី Instagram របស់ Lisa (ប៉ុន្តែពេលនេះអ្វីដែលបានបង្ហោះនោះ ត្រូវបានលុបចោលហើយ) ជានិច្ច។ បុគ្គលម្នាក់នោះបានសរសេរថា៖ "គ្មានអ្វីអាចរារាំងការបាញ់ប្រហារនៅឯពហុកីឡដ្ឋានបានទេ គឺសំដៅលើសម្ដែងរបស់ BLACKPINK”។ ផ្អែកតាមអ្នកគាំទ្រក្នុងស្រុកជាច្រើន បានបញ្ជាក់ថា បុគ្គលម្នាក់នោះ មិនមែនចេញប្រតិបត្តិការម្នាក់ឯងទេ ព្រោះពួកគេនឹងមានគ្នីគ្នាផ្សេងទៀត។ ប៉ុន្តែសម្រាប់អ្នកដែលស្រឡាញ់ Lisa នឹងចេញមុខការពារ តទល់ជនទាំងនោះ។

ទោះបីពេលនេះ មិនទាន់មានសេចក្ដីរាយការណ៍មួយជាក់លាក់ទាក់ទងនឹងការគំរាមនេះ ប៉ុន្តែអ្នកគាំទ្រក្រុម BLACKPINK ទាំងអស់សង្ឃឹមថាទាំង ផលិតកម្ម YG ក៏ដូចជាអ្នកតំណាងផ្សារទំនើបនោះទាំងអស់នឹងគិតគូរល្អិតល្អន់បន្ថែម ឲ្យបានល្អទាក់ទងសុវត្ថិភាពរបស់តារាៗ៕

ប្រភព៖ kstarlive ប្រែសម្រួល៖ យី សុធារី