មើលទៅឡូយហ្មង! សាយ សៀរ៉ា ពេលគ្រងឈុត "ម៉ឺនឯក"
- 2018-07-25 03:14:18
- ចំនួនមតិ 0 | ចំនួនចែករំលែក 0
មើលទៅឡូយហ្មង! សាយ សៀរ៉ា ពេលគ្រងឈុត "ម៉ឺនឯក"
ចន្លោះមិនឃើញ
សាយ សៀរ៉ា បានធ្វើឲ្យទស្សនិកជន ក៏ដូចជាអ្នកគាំទ្រជាច្រើន ពោលសរសើរស្ទើរគ្រប់គ្នា ក្រោយលេចចេញនូវរូបភាពលោក គ្រងសំលៀកបំពាក់សម័យបារាំង ហៅថាឈុត "ម៉ឺនឯក"។
រូបភាពប៉ុន្មានសន្លឹកត្រូវបានលោកបញ្ចេញនៅលើបណ្ដាញសង្គមផ្ទាល់ខ្លួន គេឃើញ សាយ សៀរ៉ា គ្រងឈុត "ម៉ឺនឯក" ពណ៌ស មើលទៅសមជាអ្នកមានអំណាចយសស័ក្ដិ។ ត្បិតថាជាឈុតក្នុងភាពយន្ត ប៉ុន្តែអ្នកគាំទ្ររបស់លោកបានពោលសរសើរថាស្អាត ក្នុងនោះ សូម្បីតែលោក សៀរ៉ា ខ្លួនឯង ក៏យល់ថា លោកហាក់មានភាពទាក់ទាញជាងធម្មតាដែរ។
“ពេលស្លៀកពាក់ឈុតនេះ មើលខ្លួនឯងមានអារម្មណ៍ថាប្លែក ព្រោះកន្លងមកមិនធ្លាប់ស្លៀកអីចឹង ហើយកន្លងមកខ្ញុំដូចធ្លាប់ឃើញរាជបុត្រប្រទេសម៉ាឡេស៊ីដឹងទេ ស្លៀកឈុតស្រដៀងគ្នាដែរ មើលទៅស្អាត"។
តារាប្រុសរូបនេះ បញ្ជាក់ថា សំលៀកបំពាក់ដែលខ្លួនស្លៀកនេះ ជាឈុត "ម៉ឺនឯក" មានក្នុងរឿង "រនាតឯក" បច្ចុប្បន្នកំពុងដំណើរថតនៅក្នុងខេត្តបាត់ដំបង ហើយលោកគឺជាតួឯក "ម៉ឺនឯក" នេះតែម្ដង។ និយាយពីរឿង "រនាតឯក" គឺជាវីដេអូភាគទូរទស្សន៍ប្រភេទបូរាណលាយសម័យ ត្រៀមនឹងបញ្ចប់ការថតនៅដើមខែកញ្ញាខាងមុខ។
សាយ សៀរ៉ា បានឲ្យដឹងថា "រនាតឯក" ឆ្លុះបង្ហាញពីចំណងស្នេហ៍មួយកើតឡើងនាសម័យលោកម្ចាស់ ដែលបង្កើតឲ្យមានបញ្ហាជាច្រើន។ បញ្ហាចាក់ស្រេះទាំងឡាយ មានតាំងពីនៅឋានមនុស្ស រហូតដល់ឋានខ្មោច ក្នុង សាយ សៀរ៉ា ត្រូវបានគេសម្លាប់ ដោយសារតែបញ្ហាកើតក្នុងចំណងស្នេហ៍ជាមួយនាង នួន ជាតួឯកសម្ដែងដោយ មុន្នីនាថ។
សៀរ៉ា ជាតួម៉ឺនឯក បញ្ជាក់ថា លោកស្លាប់ទៅព្រមជាមួយគំនុំពេញទ្រូង ព្រោះមើលខុសលើនារីម្នាក់ដែល លោកគិតថាផូរផង់។ “រនាតឯក" មានខ្លឹមសារយ៉ាងណាទៀត រង់ចាំទស្សនាទាំងអស់គ្នានៅពេលខាងមុខ!