(Update) : បាក់ទំនប់ទឹកនៅឡាវ បន្តលិច១៧ភូមិនៅកម្ពុជា អាជ្ញាធរស្ទឹងត្រែង បន្តជម្លៀសពលរដ្ឋ

2018-07-25 08:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

រយៈពេលជា ១ម៉ោងមុននេះ ស្ថានភាពទឹកជំនន់ ពីការបាក់ទំនប់ទឹកនៅប្រទេសឡាវ បានបន្តលិចលង់កើនដល់ចំនួន ១៧ភូមិ នៃឃុំនានា ក្នុងខេត្តស្ទឹងត្រែង។ នេះបើតាមព័ត៌មាន ចុះក្នុងទំព័រហ្វេសប៊ុក ក្រសួងធនធានទឹក និងឧតុនិយមបានផ្សាយ។

ហេតុការណ៍នេះ កើតមាននៅក្រោយការបាក់ទំនប់វារីអគ្គិសនី Se-Pian Se Nam Noi ក្នុងខេត្ត Attapeu ប្រទេសឡាវ ដែលបានបង្កឲ្យប្រជាជនឡាវ រងគ្រោះពីការលិចលង់ ខូចខាតទ្រព្យសម្បត្តិ និងបាត់មនុស្សរាប់រយនាក់។

ក្រៅពីនេះ ទឹកជំនន់ជន់ដដែល បានបន្តហូរលិចតំបន់ខ្លះ នៃខេត្តស្ទឹងត្រែង ដែលនៅជាប់ព្រំដែនកម្ពុជា ឡាវ។

គិតត្រឹមម៉ោង ១២:៣០ នាទីនេះ ទឹកជំនន់ដែលហូរធ្លាក់ពីប្រទេសឡាវ បានបណ្ដាលឲ្យមានជំនន់ទឹកលិចចូលភូមិស្ថានប្រជាពលរដ្ឋ នៅក្នុងខេត្តស្ទឹងត្រែង ប្រទេសកម្ពុជា។

តំបន់ដែលប្រឈមខ្លាំងជាងគេ គឺនៅត្រង់ចំណុច ភូមិសាស្ត្រស្រុកសៀមប៉ាង នៃខេត្តស្ទឹងត្រែង។

មានប្រជាជនសរុបចំនួន ១៧ភូមិ នៃឃុំចំនួន ៤ កំពុងរងគ្រោះ ដែលក្នុងនោះមាន ឃុំថ្មកែវ ឃុំសន្តិភាព ឃុំសេកុង និងឃុំស្រែសំបូរ។

លោក ប៉ាង ប៉េង ប្រធានមន្ទីរធនធានទឹក និងឧតុនិយមខេត្តស្ទឹងត្រែង បានប្រាប់ Sabay តាមទូរសព្ទថា មិនទាន់ដឹងតួលេខសរុប នៃប្រជាជនខេត្តស្ទឹងត្រែង ដែលត្រូវបានជម្លៀសនោះទេ ដោយសារលោក និងក្រុមការងារ កំពុងជាប់ការងារបន្ទាន់ មិនទាន់អាចឆ្លើយបានទេ។