អង្រួនចិត្តអ្នកគាំទ្រទៀតហើយ iPhone ប្រកាសខែកញ្ញានេះ មាន ៧ ចំណុចអាប់ដេតថ្មី

2018-07-27 02:43:40
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្របបាននឹងភាពជោគជ័យនៅឆ្នាំចាស់ សម្រាប់ឆ្នាំ ២០១៨ នេះ Apple រំពឹងចេញផ្សាយ iPhone បីម៉ូឌែល ដោយរួមមាន iPhone X (2018) ប្រើអេក្រង់ ៥,៨ អ៊ីញ OLED , iPhone X Plus ប្រើអេក្រង់ ៦,៥ អ៊ីញ OLED និង iPhone 9 ប្រើអេក្រង់ LCD។ ក្រៅពីនោះក៏មានចំណុចខ្លាំង ៧ ផ្សេងទៀត ដែលប្រិយមិត្ត iOS ត្រូវដឹងជាចាំបាច់។

១.បន្ទះឈីប A12:

តាំងពីដើមឆ្នាំ ២០១៨ ក្រុមហ៊ុនផ្គត់ផ្គង់ TSMC បានប្រកាសពីការចាប់ផ្តើមផលិតឈីបប្រភេទ 7nm ដោយរំពឹងជាឈីបជំនាន់ A12 ដោយអាចពង្រឹងល្បឿនដំណើរការខ្លាំងជាងមុន ២០ ភាគរយ និងសន្សំសំចៃថាមពលបានដល់ ៤០ ភាគរយ។ អ្វីដែលពិសេស CPU ជំនាន់ក្រោយនេះ បានអមមកជាមួយនូវ GPU ធុនខ្ពស់ ដែលផ្តោតសំខាន់លើការពេញនិយមវិស័យហ្គេមលើស្មាតហ្វូន។

២.ល្បឿនអ៊ីនធឺណិតលឿន:

iPhone ជំនាន់ឆ្នាំ ២០១៨ ក៏នឹងរំពឹងមកជាមួយអង់តែនគាំទ្រស្តង់ដារ 4x4 MIMI អនុញ្ញាតឲ្យបង្កើនល្បឿនផ្ទេរដល់ជីហ្គាប៊ីត LTE ធៀបនឹងឆ្នាំចាស់ទប់បានត្រឹម 2x2 MIMO ខណៈ SAMSUNG មានធុនខ្ពស់នេះតាំងពីលើជំនាន់ Galaxy S7 មកម្ល៉េះ។

៣.ដុំសាកថ្មី:

ឆ្នាំទៅ Apple រងការវាយប្រហារយ៉ាងខ្លាំងជុំវិញការមិនបន្ថែមដុំសាកថ្មរហ័សក្នុងប្រអប់ស្មាតហ្វូនតម្លៃ ១ ពាន់ដុល្លារ ដោយទាមទារឲ្យអតិថិជនចំណាយលើដុំពីខាងក្រៅថ្លៃ ៤៩ ដុល្លារ និងខ្សែ ២៥ ដុល្លារផ្សេងទៀត។ ដោយឡែកក្នុងឆ្នាំនេះ ក៏រំពឹងថា Apple នឹងថែមដុំសាកថ្មីកម្លាំង ១៨ វ៉ាត់ លើដុំសាកចាស់កម្លាំងតូចត្រឹម ៥ វ៉ាត់។

៤.គាំទ្រការប្រើស៊ីម ២:

តាមការឲ្យដឹងឆ្នាំនេះមានដំណឹងភ្ញាក់ផ្អើលត្រង់ iPhone អាចនឹងប្រើប្រាស់ស៊ីម ២ ដោយ iPhone X គាំទ្រប្រភេទ eSim (ស៊ីម ១ ) ធម្មតា ប៉ុន្តែជំនាន់ធុនខ្ពស់ iPhone X Plus អាចប្រើស៊ីម ២ មានទាំងប្រភេទ eSim និងប្រអប់ស៊ីមធម្មតា ពោលជាឧបករណ៍មានប្រព័ន្ធ Dual-SIM។

៥.ដំឡើង RAM ដល់ 4GB:

iPhone X និង X Plus នាឆ្នាំ ២០១៨ នឹងបំពាក់ RAM ធំដល់ 4GB ខ្លាំងជាង RAM ចាស់តូចត្រឹម 3GB ប៉ុន្តែធៀបនឹងការពេញនិយមលើទីផ្សារប្រភេទស្មាតហ្វូន Android ធុនខ្ពស់ភាគច្រើនហក់ដល់ 6GB រួចទៅហើយ។

៦.iOS 12:

iPhone ទាំងបីម៉ូឌែលនឹងមកស្រាប់ជាមួយប្រព័ន្ធ iOS 12 កំណែពេញលេញចេញពីប្រអប់ ដោយមានមុខងារពិសេសជាច្រើនបង្កប់លើ iOS ជំនាន់ក្រោយនេះ។

៧.កាមេរ៉ា ៣ គ្រាប់:

ធ្លាប់តែឃើញលើស្មាតហ្វូន P20 Pro របស់ក្រុមហ៊ុន Huawei ដោយឡែកលើ iPhone X Plus ក៏មានការជឿជាក់ខ្ពស់ថានឹងតាមឲ្យទាន់យុគសម័យទំនើបនៃកាមេរ៉ា ៣ គ្រាប់ ប្រភេទបញ្ឈរ។