៣ចំណុចធ្វើឲ្យអ្នកគាំទ្រចាប់អារម្មណ៍ខ្លាំងចំពោះ ចិត្រា និង ប៊ុនធី លេងប្រាក់លានអាទិត្យនេះ

2018-07-31 03:17:39
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្រាប់ការប្រកួតដណ្ដើមប្រាក់លានរបស់សង្វៀន CNC សប្ដាហ៍នេះ មានការចាប់អារម្មណ៍ពីមហាជនខ្លាំង ពោលគឺមានការចែករំលែកច្រើនលើហ្វេសបុក និយាយពីបេក្ខភាពពីររូបរបស់កម្ពុជាកំពុងមានឈ្មោះបោះសម្លេងក្នុងវិស័យប្រដាល់គុនខ្មែរ ឡៅ ចិត្រា និង សូត្រ ប៊ុនធី(សួន ចាន់នី) ដែលចូលរួម។ កត្តាដែលធ្វើឲ្យមហាជនចាប់អារម្មណ៍ខ្លាំង និងចង់ឲ្យការប្រកួតមកដល់ឆាប់ៗនោះគឺ៖

កីឡាករ ឡៅ ចិត្រា

ទី១ ពួកគេជាកីឡាករកំពុងឡើងកូដខ្លាំងទាំងពីរនាក់នាពេលបច្ចុប្បន្ននេះ ជាពិសេសគឺជើងខ្លាំង សូត្រ ប៊ុនធី តែម្ដង ព្រោះអីអ្នកប្រដាល់រូបនេះរយៈពេលជាង១ឆ្នាំនេះមានសមត្ថភាពរីកចម្រើនខ្លាំងតែម្ដង ហើយភាគច្រើនគឺផ្ដួលដៃគូឲ្យសន្លប់ផងដែរ គេប្រកួតច្រើនតែជាគូឯកនៅ CNC។ ចំណែក ឡៅ ចិត្រា វិញ គេជាកីឡាករល្អ និងឡើងតាំងពីយូរមកហើយ រាល់ការប្រកួតរបស់គេកម្រនិងចាញ់ណាស់ ហើយជើងខ្លាំងមកពីកំពង់ស្ពឺខាងលើនេះ ប្រកួតភាគច្រើនជាគូឯក ឬគូពិសេសប្រចាំកម្មវិធីផងដែរ ហើយភាគច្រើនប្រកួតនៅសង្វៀនបាយ័ន។

ឡៅ ចិត្រា(ក្រហម) សូត្រ ប៊ុនធី(ខៀវ)

ទី២ បើសិនកីឡាករទាំងពីរបានប៉ះគ្នានៅវគ្គផ្ដាច់ព្រ័ត្រម៉ារ៉ាតុងមែននោះ គឺជាជំនួបសងសឹកផងដែរ ព្រោះអី សូត្រ ប៊ុនធី ធ្លាប់សន្លប់ក្រោយផ្លែកែងរបស់ ឡៅ ចិត្រា ម្ដងនៅក្នុងកម្មវិធីផ្ដាច់ព្រ័ត្រជើងឯកជាតិកាលពីឆ្នាំ២០១៧នៅឯទឹកដីខេត្តកណ្ដាល 7NG។ ដូច្នេះអាចថាជាការសងសឹក និងវាស់ស្ទង់សមត្ថភាពគ្នាម្ដងផងដែរ។

ឡៅ ចិត្រា(ក្រហម) សូត្រ ប៊ុនធី(ខៀវ)

ទី៣ អ្នកនិយមគាំទ្រគុនខ្មែរ ចង់ឃើញអ្នកលេងកែងទាំងពីរនាក់ខាងលើនេះប៉ះគ្នាតែម្ដង ព្រោះអីទាំង ឡៅ ចិត្រា និង សូត្រ ប៊ុនធី សុទ្ធតែល្អកែង និងស្នៀតជង្គង់ដ៏គ្រោះថ្នាក់ដូចគ្នា មានកីឡាករច្រើនរូបមកហើយដែលសន្លប់ក្រោយស្នៀតទាំងនេះ ដូច្នេះហើយដែលធ្វើឲ្យមហាជនចាប់អារម្មណ៍ខ្លាំងនិងចង់ឲ្យពួកគេបានជួបគ្នាម្ដងទៀត។

ឡៅ ចិត្រា ពេលផ្ដួល សូត្រ ប៊ុនធី កាលជើងឯកថ្នាក់ជាតិ

រំលឹកដែរថា កីឡាករកម្ពុជាពីររូបរួមមាន ឡៅ ចិត្រា និង សូត្រ ប៊ុនធី នឹងត្រូវឡើងប្រកួតកម្មវិធីម៉ារ៉ាតុងនាថ្ងៃទី៤ ខែសីហា ឆ្នាំ២០១៨ នៅសង្វៀន CNC ជាមួយអ្នកប្រដាល់មកពីថៃពីររូបនេះ ដើម្បីរកម្ចាស់ប្រាក់៤លានរៀល។ កម្មវិធីនេះដែរបើសិនកីឡាកររូបណាឈ្នះនៅប្រកួតដំបូង នឹងត្រូវឡើងទៅប្រកួតទី២ផ្ដាច់ព្រ័ត្រតែម្ដង៕

អត្ថបទ៖ នួន ស៊ីណា