លើកដំបូងក្នុងប្រវត្តិសាស្ត្រ Huawei ផ្ដួល Apple ឡើងជាក្រុមហ៊ុនទូរសព្ទធំលេខ ២
- 2018-08-01 02:37:14
- ចំនួនមតិ 0 | ចំនួនចែករំលែក 0
លើកដំបូងក្នុងប្រវត្តិសាស្ត្រ Huawei ផ្ដួល Apple ឡើងជាក្រុមហ៊ុនទូរសព្ទធំលេខ ២
ចន្លោះមិនឃើញ
ជាលើកដំបូងក្នុងប្រវត្តិសាស្ត្រ Huawei បាននាំមុខ Apple ក្លាយជាក្រុមហ៊ុនលក់ស្មាតហ្វូនបានច្រើនជាងគេលំដាប់លេខ ២ ប្រចាំត្រីមាសទី ២ ឆ្នាំ ២០១៨។ នេះបើតាមការស្រាវជ្រាវរបស់ក្រុមហ៊ុន Strategy Analytics។
នៅត្រីមាសទី ២ ឆ្នាំ ២០១៨ ក្រុមហ៊ុន Huawei អាចលក់ស្មាតហ្វូនបានសរុប ៥៤,២ លានគ្រឿង ទូទាំងសកលលោក ដោយកាន់កាប់ទីផ្សារ ១៥,៥%។ តួលេខនេះមានការកើនឡើងដល់ ៤១% បើធៀបនឹងពេលដូចគ្នាកាលឆ្នាំមុន ដែល Huawei លក់ស្មាតហ្វូនបាន ៣៨,៤ លានគ្រឿង ។
Apple ឯណោះវិញ នៅត្រីមាសទី ២ ឆ្នាំ ២០១៨ អាចលក់ស្មាតហ្វូនបានសរុប ៤១,៣ លានគ្រឿង ដោយកាន់កាប់ទីផ្សារ ១១,៨%។ តួលេខនេះមានការកើនប្រមាណ ១% ប៉ុណ្ណោះ បើធៀបនឹងឆ្នាំមុន លក់បាន ៤១ លានគ្រឿង ។
ក្រុមហ៊ុនដែលឈរនៅលំដាប់ទី ១ គឺ Samsung ដែលអាចលក់ស្មាតហ្វូនបានសរុប ៧១,៥ លានគ្រឿង និងកាន់កាប់ទីផ្សារ ២០,៤%។ ប៉ុន្តែចំនួនលក់នេះគឺមានការធ្លាក់ចុះបើធៀបនឹងឆ្នាំមុន ដែលលក់បានដល់ ៧៩,៥ លានគ្រឿង ឯណោះ។
ក្រុមហ៊ុនចិន ២ ទៀតដែលកំពុងកាន់កាប់ចំណែកទីផ្សារធំដែរនោះគឺ Xiaomi និង Oppo ដែលលក់ស្មាតហ្វូនបានសរុប ៣២ លានគ្រឿង និង ៣០,២ លានគ្រឿង ។ គេសង្កេតឃើញថាចំនួនលក់របស់ Xiaomi មិនហក់ឡើងខ្លាំងដូចពេលមុននោះទេ នេះដោយសារតែរងការប្រកួតប្រជែងពី Huawei លើទីផ្សារប្រទេសឥណ្ឌា។
នៅត្រីមាសទី ២ ឆ្នាំ ២០១៨ នេះចំនួនលក់ស្មាតហ្វូនសរុបមាន ៣៥០,៤ លានគ្រឿង ដែលមានការថយចុះ ៣% ធៀបនឹងឆ្នាំមុន មានចំនួនសរុប ៣៦០,៤ លានគ្រឿង ។
បកទៅមើលទីផ្សារស្មាតហ្វូនប្រចាំត្រីមាសទី ១ ឯណោះវិញ Samsung អាចលក់ស្មាតហ្វូនបាន ៧៨,២ លានគ្រឿង តាមពីក្រោយដោយ Apple ដែលលក់បាន ៥២,២ លានគ្រឿង និង Huawei ឈរនៅលេខ ៣ លក់បាន ៣៩,៣ លានគ្រឿង ៕