អ្នកញៀន Facebook នឹងដឹងខ្លួន ជិតមានមុខងារពិសេស ទប់ទល់អ្នកញៀន Facebook

2018-08-03 01:46:28
ចំនួនមតិ 0 | ចំនួនចែករំលែក 0

ចន្លោះមិនឃើញ

បោះជំហានតាមគន្លង Apple និង Google ក្រុមហ៊ុន Facebook បានប្រកាសចេញពីមុខងារថ្មីឲ្យឈ្មោះ Digital Health សម្រាប់បណ្តាញសង្គមរបស់ខ្លួន។ ត្រៀមដាក់ឲ្យប្រើប្រាស់ជាផ្លូវការ ទាំងលើកម្មវិធី Facebook ក៏ដូចជា Instagram រំពឹងបញ្ចូលក្នុងការ Update នាថ្ងៃពុធសប្តាហ៍ក្រោយ។

ជាមុខងារប្រាប់ឲ្យអ្នកប្រើប្រាស់ដឹងពីការចំណាយពេលវេលាលើកម្មវិធី គួបផ្សំមធ្យោបាយ Mute សារជូនដំណឹង និងប្រព័ន្ធដាស់តឿនពេលអ្នកលេងដល់ម៉ោងកំណត់។ នេះបើយោងតាមសារព័ត៌មាន CNN បានចុះផ្សាយ។

ស្រដៀងនឹងមុខងារ Screen Time និង Digital Wellbeing ក្រុមហ៊ុន Apple/Google ប៉ុន្តែសម្រាប់ Facebook នឹងពុំបើកឲ្យប្រើលើជំនាន់ Desktop នៃកម្មវិធី Facebook Messenger នោះទេ។ អ្នកស្រី Gretchen Sloan ប្រធានផ្នែកទំនាក់ទំនងនៃក្រុមហ៊ុនយក្សរបស់អាមេរិកបានមានប្រសាសន៍ថា៖ "តាមដែលយើងសិក្សាពីទំនាក់ទំនងរបស់មនុស្សជាមួយប្រព័ន្ធផ្សព្វផ្សាយបច្ចេកវិទ្យា ដែលអាចជះឥទ្ធិពលដល់សុខុមាលភាពនៃការរស់នៅ បែបនេះយើងក៏កំពុងព្យាយាមជួយពួកគេឲ្យមានការគ្រប់គ្រងច្រើនជាងនេះ"។

យ៉ាងណាមិញក្រោយការដាក់ឲ្យប្រើប្រាស់ពេញលេញ អ្នកនឹងបានឃើញមុខងារនោះស្ថិតក្នុងប្រភេទឈ្មោះខុសពីគ្នាក្នុងទីតាំង Settings នៃកម្មវិធី ប៉ុន្តែ Sabay ក៏នឹងចុះផ្សាយពីវិធីប្រើប្រាស់លំអិតនាពេលនោះព្រមគ្នា។