ថតរូបពេលយប់ មានការរៀបចំល្អ នឹងធ្វើឲ្យរូបភាពលេចធ្លោ

2018-08-03 07:18:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ការថតរូបមិនត្រឹមតែប្រមូលពន្លឺនោះទេ ក៏ត្រូវមានគម្រោងថតផងដែរ ជាពិសេសពេលយប់ខ្វះពន្លឺ។ រូបភាពស្អាតៗភាគច្រើន ដែលបានឃើញលើអ៊ីនធឺណិត ថតនៅស្ថានភាពខ្វះពន្លឺ ដូចជាទិដ្ឋភាព Milky Way ជាដើម។

ជ្រើសរើសកាមេរ៉ា និង Lens

ពេលជ្រើសរើសកាមេរ៉ា និង Lens សម្រាប់ការថតរូបប្រភេទនេះ មានចំណុចពីរសំខាន់គឺ Aperture និង ISO។

Aperture កំណត់កម្រិតពន្លឺចូលដល់ Image Sensor របស់កាមេរ៉ា បង្ហាញជា f stop។ តួលេខកាន់តែទាប មានពន្លឺកាន់តែច្រើននៅកម្រិត Shutter speed ផ្ដល់ឲ្យ តែគុណភាពអាស្រ័យលើ Lens អ្នកប្រើប្រាស់។

ISO ជាកម្រិតប្រែប្រួលពន្លឺនៃ Image sensor កាមេរ៉ាចាប់បានក្នុងការថតរូបទិដ្ឋភាពពេលខ្វះពន្លឺ ឬពេលយប់។ DSLR កម្រិតដំបូង និងកាមេរ៉ា Mirrorless ផលិតរូបភាព ច្រើនតែមាន Noise ពេលស្ថានភាពខ្វះពន្លឺ ឬពេលយប់។ ថតនៅពេលព្រលប់ ប្រហែលត្រូវការប្រើ Aperture-priority mode អាចសាកកែប្រែទាំង Shutter speed និង ISO settings បាន។

បើចង់ថតរូបភាពពេលយប់ អាចសាកប្រើកាមេរ៉ាប្រភេទ Full-frame មាន Image sensor ធំ ប្រមូលពន្លឺបានច្រើន និងអាចប្រើ ISO settings ខ្ពស់កាន់តែមានប្រសិទ្ធភាព។ ជារួម អាចមានពន្លឺក្នុងទិដ្ឋភាពច្រើន ដោយមិនមាន Noise។

ឧបករណ៍បន្ថែមត្រូវការ

ពិល

ចាំបាច់ត្រូវការពេលថតរូបនៅកម្រិតពន្លឺទាប ស្វែងរកទីតាំងថតនៅពេលយប់ ឬមុនពេលថ្ងៃរះ។ មួយវិញទៀត ពេលកម្រិតពន្លឺធ្លាក់ចុះ អាចមានប្រយោជន៍បំភ្លឺ Subject ផងដែរ។

Tripod

លំនឹងជាកត្តាសំខាន់ក្នុងការថតរូបពេលខ្វះពន្លឺ ឬយប់ ព្រោះត្រូវការបើកចំហ Shutter ក្នុងរយៈពេលយូរ ដើម្បីទទួលបានពន្លឺគ្រប់គ្រាន់ បើរង្គើលទ្ធផលនឹងចេញមកព្រាល។

ការជ្រើសរើស Tripod ប្រើអាចពិបាកបន្តិច គួរតែមានទម្ងន់ស្រាលល្មម ងាយស្រួលយកតាមខ្លួន។ អាចជ្រើសរើស Tripod ស្រាលផលិតពីអាលុយមីញ៉ូម ឬ Carbon fibre មានកម្ពស់ប្រហែល ១០៥ សង់ទីម៉ែត្រ ឬ ១៣២សង់ទីមែត្រ។ នេះផ្ដល់ភាពងាយស្រួល យកតាមខ្លួន ហើយពេលមើលទិដ្ឋភាពតាម Viewfinder មិនអោនខ្លាំង។

កាបូប

អាចប្រើជួយទប់លំនឹងបាន ពេលប្រើ Tripod នៅទីតាំងមានខ្យល់ខ្លាំងល្មម ពិតណាស់មិនធ្វើឲ្យដួលនោះទេ តែអាចរង្គើកាមេរ៉ា។ ធម្មតា Tripod មានជើងកណ្ដាល អាចប្រើកាបូប (មានសម្ភារៈនៅខាងក្នុង) ជួយបន្ថែមទម្ងន់បាន។

ខ្សែភ្ជាប់បញ្ជា ឬ Wireless remote

អាចប្រើខ្សែភ្ជាប់បញ្ជា ឬ Wireless remote ឬក៏ប្រើមុខងារ Self-timer មានស្រាប់លើកាមេរ៉ា ដើម្បីការពារការរង្គើកើតឡើងពេលចុចថតផ្ទាល់នឹងតួកាមេរ៉ា។

មាន SD Cards និងថ្មបម្រុងទុក

គួរថតរូបប្រើទម្រង់ RAW ជៀសជាង JPEG ដោយសារវាផ្ទុកទិន្នន័យជាច្រើន ល្អពេលកាត់តលើកម្មវិធី Photoshop ឬកម្មវិធីស្រដៀងគ្នាផ្សេងទៀត កាន់តែមានប្រសិទ្ធភាព។ តែនេះក៏បង្កើនទម្ងន់ File រូបភាពផងដែរ គួរមាន SD Cards បម្រុងទុក ពេលថតរូបនៅទិដ្ឋភាពខ្វះពន្លឺ។ ហើយក៏គួរមានថ្មបន្ថែមផងដែរ ជាពិសេសពេលអាកាសធាតុចុះទាប អាចបន្ថយថាមពលថ្មបានកាន់តែឆាប់។

គម្រោងថតទិដ្ឋភាពខ្វះពន្លឺ

ទិដ្ឋភាពបែបនេះភាគច្រើនកើតមានកំឡុងពេល Blue hour មុនពេលថ្ងៃរះ និងក្រោយពេលថ្ងៃលិចបន្តិច។ អ្នកប្រហែលត្រូវការ ស្គាល់ទីតាំងថតជាមុន ដូច្នេះគួរទៅពេលនៅភ្លឺ ជ្រើសរើសទីតាំង រៀបចំកាមេរ៉ា ហើយក៏គួរភ្ជាប់ត្រីវិស័យ ជួយអ្នកអាចដឹងពីទីតាំង ថ្ងៃរះ និងលិច។

គម្រោងថតទិដ្ឋភាពពេលយប់

កំឡុងពេលយប់ អ្នកប្រហែលចង់ថតទិដ្ឋភាព Milky Way។ ពីអឌ្ឍគោលខាងជើង អាចថតបាននៅនិទាឃរដូវ (ក្រោយពាក់កណ្ដាលយប់) និងរដូវក្ដៅ (មុនពេលពាក់កណ្ដាលយប់) ជាពេលដែលមានពន្លឺតូចៗបង្ហាញក្នុងមេឃបានស្អាត។

Photographer's Ephemeris (TPE) អាចឃើញកម្រិតពន្លឺជះលើទីតាំងណាមួយ។
Sky Live app អាចស្វែងរកព្រះអាទិត្យ និងព្រះចន្ទ រះ ឬលិចពេលណា។
Light Pollution Map និង Dark Site Finder ល្អសម្រាប់ស្វែងរកទីតាំងនៅឆ្ងាយពីពន្លឺរំខាននានា។
វេបសាយ Stellarium ឬ កម្មវិធី Stellarium អាចជួយស្វែងរកទិដ្ឋភាពប្រភេទ Polaris និង Milky Way។

រៀបចំថតពេលយប់

Lens អាចមានសំណើមពេលថតនៅលក្ខខណ្ឌក្ដៅ និងត្រជាក់ ដូច្នេះគួរមានការយកចិត្តទុកដាក់ ជូតសម្អាត ឬដាក់នៅទីតាំងមានសីតុណ្ហភាពល្មម។

ពេលពន្លឺតូចៗបង្ហាញក្នុងមេឃ ឬឃើញរាងរូវពន្លឺគួរឲ្យចាប់អារម្មណ៍ ត្រឹមពីរបីវិនាទី អ្នកគួរតែអាចកែប្រែ ISO និង Shutter speed ឲ្យបានរហ័ស។ ដូចនេះ គួរដឹងពីជម្រើស Menu និងចេះប្រើ មុនពេលចេញថតពេលយប់ អាចសាកអនុវត្តនៅផ្ទះ ក្នុងបន្ទប់ងងឹតបាន។ មួយវិញទៀត ក៏គួរដឹងពីរបៀបបន្ថយពន្លឺលើអេក្រង់ LCD កាមេរ៉ាផងដែរ ជួយការពារចំណាំងប៉ះនឹងភ្នែក អាចឲ្យអ្នកបញ្ជាកាមេរ៉ា និងប្រើ Viewfinder បានកាន់តែងាយស្រួល៕