៦ក្បាច់ងាយៗរៀនមិនពូកែក៏ប្រឡងបាក់ឌុបជាប់ ពីសិស្សឆ្នើមលេខ១ពីថ្នាក់ទី១ដល់ទី១២
- 2018-08-03 03:15:11
- ចំនួនមតិ 0 | ចំនួនចែករំលែក 0
៦ក្បាច់ងាយៗរៀនមិនពូកែក៏ប្រឡងបាក់ឌុបជាប់ ពីសិស្សឆ្នើមលេខ១ពីថ្នាក់ទី១ដល់ទី១២
ចន្លោះមិនឃើញ
អ្នកដែលរៀនពូកែ ឬនិយាយបានថា ចាប់បានច្រើនជាងអ្នកធម្មតាៗ មិនសូវជាព្រួយបារម្ភប៉ុន្មានឡើយរឿងប្រឡងមិនជាប់។ តែក្នុងនោះដែរសិស្សមួយចំនួនដែលរៀនមិនសូវពូកែកំពុងបុកពោះភឹបៗ ខ្លាចប្រឡងមិនជាប់ហើយមិនដឹងថាគួរធ្វើបែបណាទេ ព្រោះទឹកដល់ច្រមុះហើយ។ តទៅនេះជាការចែករំលែកពីយុវតីវ័យក្មេង រស់ ចាន់ត្រា ជាសិស្សឆ្នើមមួយរូប ហើយប្រឡងបាក់ឌុបជាប់និទ្ទេសA ៖
**១. ធ្វើលំហាត់តូចៗងាយៗឲ្យអស់សិន**
ចាប់ពីថ្ងៃនេះទៅមិនមានពេលវេលាច្រើនទៀតឡើយ ហើយក៏មិនអាចបង្ខំខ្លួនឯងឲ្យត្រូវតែចេះគ្រប់លំហាត់នោះដែរ។ ដូច្នេះយកល្អគួរតែរៀនធ្វើលំហាត់ងាយៗ ដែលគិតថាអាចដោះស្រាយបានឲ្យស្ទាត់ឲ្យច្បាស់តែម្ដង ហើយដល់ពេលប្រឡងក៏ដូចគ្នាមិនគួរចាប់ផ្ដើមភ្លាមសង្វាតធ្វើលំហាត់ធំ នាំឲ្យស្មុគស្មាញធ្វើឲ្យកាន់តែភ័យឡើយ។ លំហាត់តូចៗងាយៗ គួរប្រញាប់ធ្វើឲ្យអស់ក៏អាចយកពិន្ទុបានដូចគ្នា។ នេះបើតាមបទពិសោធន៍យុវតី រស់ ចាន់ត្រា ប្រឡងជាប់និទ្ទេសA កាលពីឆ្នាំ២០១៦។
២. គន្លឹះក្នុងការសរសេរ
ពាក់ព័ន្ធផ្នែកគណនាដដែលនេះ សិស្សឆ្នើមនិទ្ទេសA ២០១៦រូបនេះប្រាប់ថា មិនគួរសរសេរកាត់ៗ ហើយដាក់ចម្លើយយកទាំងមិនដឹងថាត្រូវឬខុសនោះទេ។ គួរតែសរសេរមួយៗឲ្យច្បាស់ៗ ហើយសឹមគណនារកចម្លើយដែលត្រឹមត្រូវល្អជាងទើបអាចរកពិន្ទុបាន។ ចាន់ត្រា បន្តថាសិស្សមួយចំនួន បាត់បង់ពិន្ទុក៏ដោយសារមូលហេតុនេះដែរ។ សរសេរឲ្យក្បោះក្បាយ ច្បាស់ៗ ចំចំណុចទើបអាចរកពិន្ទុបាន។
៣. លះបង់រឿងដែលមិនសូវមានប្រយោជន៍
ចាប់ពីពេលនេះតទៅទម្លាប់មួយចំនួន ដែលតែងអនុវត្តរាល់ថ្ងៃ ដូចជា៖ វក់លេងហ្វេសប៊ុក ហ្គេម ដើរលេង គួរតែបំបាត់ចោលឲ្យអស់។ រឿងដែលត្រូវធ្វើគឺថែរក្សាសុខភាពឲ្យល្អ គេងឲ្យបានគ្រប់គ្រាន់ ហើយព្យាយាមរំលឹកមេរៀនគោលៗឲ្យយល់ ឲ្យចាំទើបជាការប្រសើរ។
៤. កុំព្យាយាមមើលវិញ្ញាសាព្រោះចម្លើយខុសៗគ្នា
យុវតីវ័យក្មេងរូបលើកឡើងថា កាលណាទិញវិញ្ញាសាមកមើលកាន់តែច្រើន ធ្វើឲ្យស្មុគស្មាញកាន់តែខ្លាំងទៅវិញទេ ព្រោះជាទូទៅវិញ្ញាសាទាំងនោះពេលខ្លះ មានសំណួរដូចគ្នា តែបែរចម្លើយខុសគ្នា។ បែបនេះហើយមិនដឹងមើលអាណាទុកអាណីទេ។ ជាជម្រើសដ៏ល្អ គួរមើលមេរៀន និងអ្វីដែលធ្លាប់បានប្រឡងប្រចាំខែ ប្រចាំឆមាស យកមករំលឹក គឺជារឿងល្អបំផុត។ តាមបទពិសោធន៍ដែលចាន់ត្រា ឆ្លងកាត់ក្រសួងមិនដែលចេញអ្វីក្រៅពីមេរៀនឡើយ គ្រាន់តែចំណុចខ្លះយើងមិនបានចាំ ឬមិនបានមើលចំតែប៉ុណ្ណោះ។
៥. មុន១ថ្ងៃ២ថ្ងៃគួរតែនៅផ្ទះ
មុនប្រឡង១ថ្ងៃ ឬ២ថ្ងៃ មិនគួរចេញក្រៅ ឬចំណាយពេលធ្វើធ្វើនោះល្ហេចល្ហូតនោះឡើយ។ រយៈពេលនេះគួរតែនៅផ្ទះត្រៀមរៀបចំខ្លួនឲ្យបានល្អ ពិនិត្យមើលឲ្យសព្វគ្រប់មិនថាតែសំលៀកបំពាក់ ប៊ិចបន្ទាត់ និងអ្វីដែលត្រូវមានពេលទៅប្រឡងឲ្យអស់។ ក្នុងពេលនេះដែរគួរតែមើលមេរៀនគោលៗ ចំណុចខ្លឹមៗក្នុងមេរៀននីមួយៗ ដើម្បីត្រៀមប្រឡង។
៦. ពេលដល់ម៉ោង១៥នាទីចុងក្រោយ
ជាធម្មតាពេលគេគោះជួងម៉ោងចុងក្រោយ គឺមានន័យថា បេក្ខជនប្រឡងគួរពិនិត្យមើលលើក្រដាសកិច្ចការ ផ្ទៀងផ្ទាត់ឡើងវិញក្រែងលោខ្វះចន្លោះត្រង់ណា។ ប៉ុន្តែករណីនៅមិនទាន់បានបញ្ចប់កិច្ចការរបស់ខ្លួន គួរតែសរសេរតាមសម្រួលកុំស្លន់ស្លោ តែសរសេរឲ្យចំៗ បើជាវិញ្ញាសាសរសេរគួរតែឆ្លើយចំណុចខ្លឹមយកតែម្ដងមិនចាំបាច់បើកក្បាលចម្លើយវែងឆ្ងាយឡើយ។ ម្យ៉ាងវិញទៀត បើសល់សំណួរច្រើនគួរព្យាយាមឆ្លើយឲ្យអស់ កុំទុកចោល គ្រាន់តែថាមិនចាំបាច់រៀបរាប់វែងឆ្ងាយបែកអូរហូរស្ទឹងឡើយ ដឹងចម្លើយហើយសរសេរយកតែម្ដង៕
ទស្សនាវីដេអូសម្ភាសន៍ខាងក្រោមនេះ៖