ភា សុភក្ត្រា៖ នៅសល់៩០នាទីទៀត ទើបដឹងសខ្មៅជាមួយ ស្វាយរៀង

2018-08-03 06:49:45
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ភា សុភក្ត្រា គ្រូបង្វឹកក្រុមក្រសួងការពារជាតិថាការប្រកួតជាមួយក្រុមព្រះខ័នរាជស្វាយរៀង នៅពានរង្វាន់ Hun Sen Cup 2018 នេះមិនទាន់បញ្ចប់នោះទេ នៅសល់៩០នាទីទៀត ទើបដឹងនរណាឈ្នះ។

លោក ភា សុភក្ត្រា

នៅជើងទី១ ពានរង្វាន់ Hun Sen Cup វគ្គ៨ក្រុមចុងក្រោយនាកីឡដ្ឋានស្ដាតចាស់ ក្រុមម្ចាស់ផ្ទះបានចាញ់ក្រុមភ្ញៀវក្នុងលទ្ធផល ១-២ ដែលគ្រានោះ លោក ភា សុភក្ត្រា យល់ថាក្រុមរបស់លោកក៏មានឱកាសច្រើនដែរ ប៉ុន្តែធ្វើមិនសម្រេច។ ស្របពេលដែលជើងទី២ នៅទឹកដីស្វាយរៀងវិញ លោករំពឹងថាក្រុមទាំងមូលនឹងតស៊ូបន្ថែមទៀត ព្រោះថាលទ្ធផលចាញ់ជើងទី១ នឹងធ្វើឱ្យក្រុមលេងបានល្អនៅជើងទី២។

គ្រូបង្វឹកដែលជាអតីតកីឡាករជម្រើសជាតិកម្ពុជាខាងលើបានបញ្ជាក់បន្ថែមទៀតថា ចាញ់នៅជើងទី១ គឺជាការចាញ់៩០នាទីប៉ុណ្ណោះ ព្រោះថាការប្រកួតពានរង្វាន់នេះលេង២ជើង។ ដូច្នេះក្រុមក្រសួងការពារជាតិ នៅមានឱកាស៩០នាទីទៀត ដើម្បីលេងជាមួយក្រុមស្វាយរៀង យកចាញ់ឈ្នះ ឡើងវគ្គបន្ដ។ ដោយការប្រកួតនោះ នឹងធ្វើឡើងនៅកីឡដ្ឋានខេត្តស្វាយរៀង នាថ្ងៃពុធសប្ដាហ៍ក្រោយនេះ៕

អត្ថបទ៖ មុន្នីរម្យ