តិចច្រឡំនៅស្រុកគេ! ផ្កាចាហួយដ៏ស្អាតបំផុតនៅសៀមរាប កំពុងរីកយ៉ាងស្គុះស្គាយ

2018-08-04 03:30:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្កាចាហួយដ៏ស្រស់បំព្រងរំលេចពណ៌ផ្កាឈូកខ្ចីគួរឲ្យចង់គយគន់នៅភ្នំអំពិលខេត្តសៀមរាប ចាប់ផ្ដើមដល់រដូវរីកទៀតហើយ ពោលចាប់ពីខែសីហានេះតទៅរហូតដល់ខែតុលា។ នេះបើតាមលោកពូ ព្រឿង ង៉ិក ជាអ្នករស់នៅភូមិពាក់ស្នែងក្បែរជើងភ្នំពិលប្រាប់មកកាន់ Sabay នៅព្រឹកនេះ។

បុរសវ័យ៤២ឆ្នាំរូបនេះប្រាប់ថា បច្ចុប្បន្ននៅទីនោះមិនទាន់បានអភិវឌ្ឍ ជាតំបន់ទេសចរណ៍នោះទេ ភាគច្រើនអ្នកទៅលេងកម្សាន្តជាអ្នកស្រុកក្បែរនោះដែលស្គាល់តៗគ្នា។ ចំពោះភ្ញៀវទេសចរ ចង់ទៅលេងកម្សាន្តមិនអាចធ្វើដំណើរតាមរថយន្តឡើងភ្នំបានទេ អាចជួលគោយន្តអ្នកភូមិពាក់ស្នែង ឬលោកពូផ្ទាល់ជិះពេញមួយថ្ងៃតម្លៃ១០ម៉ឺនរៀលប៉ុណ្ណោះ អាចជិះបានគ្នា១៥នាក់ ហើយប្រសិនបើចង់បានអ្នកនាំផ្លូវម្នាក់ទៀតត្រូវចំណាយ៤ម៉ឺនរៀលបន្ថែម។ ទៅដល់ទីនោះភ្ញៀវទេសចរប្រាកដជាលង់នឹងសម្រស់ធម្មជាតិដ៏ស្រស់ស្អាតបំផុត មានវាលស្មៅខៀវស្រងាត់ដាច់កន្ទុយភ្នែក ជាពិសេសផ្កាចាហួយរំលេចពណ៌ផ្កាឈូកគួរឱ្យគយគន់ក្រៃលែង។ អ្នកទៅលេងកម្សាន្តវេចខ្ចប់អាហារយកទៅញ៉ាំ ឬក៏អាចឱ្យអ្នកភូមិចម្អិនឱ្យក៏បានដែរក្នុងតម្លៃសមរម្យ និងជាអាហាររបស់ភូមិផ្ទាល់។

ភ្នំអំពិលមានទីតាំងនៅ ភូមិពាក់ស្នែង ឃុំពាក់ស្នែង ស្រុកអង្គរធំ ខេត្តសៀមរាប មានចម្ងាយប្រមាណ ៥០គីឡូម៉ែត្រ ពីទីរួមខេត្ត៕