តិចអត់ដឹងចុះ! អង្គរវត្តកម្ពុជាជាប់ចំណាត់ថ្នាក់លេខ១ ៥ឆ្នាំផ្ទួនៗគ្នាលើវេបសាយកំពូលៗទាំងនេះ
- 2018-08-06 03:23:46
- ចំនួនមតិ 0 | ចំនួនចែករំលែក 0
តិចអត់ដឹងចុះ! អង្គរវត្តកម្ពុជាជាប់ចំណាត់ថ្នាក់លេខ១ ៥ឆ្នាំផ្ទួនៗគ្នាលើវេបសាយកំពូលៗទាំងនេះ
ចន្លោះមិនឃើញ
ប្រាសាទអង្គរវត្តរបស់កម្ពុជាត្រូវបានជាប់ចំណាត់ថ្នាក់លេខ១ផ្ទួនគ្នា គិតត្រឹមចាប់ពីឆ្នាំ២០១៤មក នៅលើគេហទំព័រល្បីៗនៅលើពិភពលោក ឈ្នះប្រាសាទ និងទីតាំងល្បីៗនានាក្នុងបណ្ដាប្រទេសមួយចំនួនជុំវិញពិភពលោក។ តទៅនេះគឺជាចំណាត់ថ្នាក់លេខ១ រយៈពេល៥ឆ្នាំជាប់គ្នា ដែលប្រាសាទអង្គរវត្តទទួលបាន៖
១. ចំណាត់ថ្នាក់លេខ១ជាសំណង់ប្រវត្តិសាស្ត្រដ៏អស្ចារ្យបំផុតឆ្នាំ២០១៨
ក្រោយការចូលរួមបោះឆ្នោតពីភ្ញៀវទេសចររាប់លាននាក់ជុំវិញពិភពលោក គេហទំព័រដ៏ល្បីល្បាញ TripAdvisor បានផ្តល់ចំណាត់ថ្នាក់លេខ១ដល់ប្រាសាទអង្គរវត្តរបស់កម្ពុជា ជាសំណង់ដ៏មានសារៈសំខាន់ផ្នែកប្រវត្តិសាស្ត្រអស្ចារ្យបំផុត។ ក្រសួងទេសចរណ៍ សហការជាមួយអាជ្ញាធរជាតិអប្សរា និងភ្នាក់ងារប្រឹក្សាយោបល់លើការធ្វើដំណើរ (TripAdvisor) នឹងរៀបចំពិធីប្រគល់ពានរង្វាន់ចំណាត់ថ្នាក់លេខ១ ដល់ប្រាសាទអង្គរវត្តកម្ពុជា ដែលជាសំណង់ប្រវត្តិសាស្ត្រដ៏អស្ចារ្យបំផុតក្នុងចំណោមសំណង់ប្រវត្តិសាស្ត្រដ៏ល្បីៗក្នុងពិភពលោក ចំនួន ២៥ សម្រាប់ឆ្នាំ២០១៨។
ពិធីប្រគល់ពានរង្វាន់ចំណាត់ថ្នាក់លេខ១នេះ នឹងត្រូវរៀបចំឡើងនៅក្រុងសៀមរាប ទីតាំងខាងមុខបរិវេណប្រាសាទអង្គរវត្ត នាពេលពេលព្រឹក និងពិធីអបអរសាទរ រាំលេងសប្បាយជាមួយការប្រគំតន្ត្រីនៅតំបន់ Pub Street ពេលរាត្រី នាថ្ងៃទី៩ ខែសីហា ឆ្នាំ២០១៨ ខាងមុខនេះ។
២. ចំណាត់ថ្នាក់លេខ១ ជាសំណង់ប្រវត្តិសាស្ត្រដ៏អស្ចារ្យបំផុតលើលោកឆ្នាំ២០១៧
គេហទំព័រដ៏ល្បីល្បាញ TripAdvisor បានផ្តល់ចំណាត់ថ្នាក់លេខ១ដល់ប្រាសាទអង្គរវត្តរបស់កម្ពុជា ជាសំណង់ដ៏មានសារៈសំខាន់ផ្នែកប្រវត្តិសាស្ត្រអស្ចារ្យបំផុតរបស់ពិភពលោកសម្រាប់ឆ្នាំ២០១៧កន្លងទៅ។ ការជាប់ចំណាត់ថ្នាក់លេខ១នេះ ក្រោយការចូលរួមបោះឆ្នោតពីភ្ញៀវទេសចររាប់លាននាក់ជុំវិញពិភពលោក។
៣. ជាប់ចំណាត់ថ្នាក់លេខ១ជារមណីយដ្ឋានទេសចរណ៍វប្បធម៌ដ៏ល្បីល្បាញលើពិភពលោកឆ្នាំ២០១៦
នៅឆ្នាំ២០១៦ អង្គរបានបន្តជាប់លេខ១បន្ថែមទៀត នៅលើគេហទំព័ររបស់ក្រុមហ៊ុន Lonely Planet ដែលជាគេហទំព័រផ្សព្វផ្សាយ និងជាប្រភពព័ត៌មានទេសចរណ៍ដ៏ល្បីមួយលើពិភពលោក មានទាំងព័ត៌មានតាមរយៈវែបសាយ ទស្សនាវដ្តី និងសៀវភៅ ជាដើម។
៤. ជាប់ចំណាត់ថ្នាក់លេខ១ជាតំបន់ទេសចរណ៍ប្រវត្តិសាស្ត្រល្បីល្បាញលើពិភពលោក
នៅដើមឆ្នាំ២០១៥ អង្គរវត្តទទួលបានចំណាត់ថ្នាក់លេខ១ នៅលើគេហទំព័រអន្តរជាតិ ដែលជាគេហទំព័រផ្សព្វផ្សាយតំបន់ទេសចរណ៍ល្បីៗលើពិភពលោក នោះគឺ គេហទំព័រ TripAdvisor។
៥. ជាប់ចំណាត់ថ្នាក់លេខ១ជាតំបន់បុរាណវិទ្យា និងប្រវត្តិសាស្ត្រដែលទាក់ទាញបំផុតលើពិភពលោក
កាលពីឆ្នាំ២០១៤ អង្គរបានជាប់ចំណាត់ថ្នាក់លេខ១ នៅលើគេហទំព័រមួយដែលតែងតែយកតំបន់បុរាណវិទ្យា និងប្រវត្តិសាស្ត្រទាំងអស់លើពិភពលោកមកប្រៀបធៀបគ្នា នោះគឺគេហទំព័រ ArchaeoMadness៕