ត្រឹមពាក់កណ្ដាលឆ្នាំ ២០១៨ តារាល្បីៗកម្ពុជា ហក់ចូលជំនួញដីធ្លីបន្តកន្ទុយគ្នា
- 2018-08-07 03:19:24
- ចំនួនមតិ 0 | ចំនួនចែករំលែក 0
ត្រឹមពាក់កណ្ដាលឆ្នាំ ២០១៨ តារាល្បីៗកម្ពុជា ហក់ចូលជំនួញដីធ្លីបន្តកន្ទុយគ្នា
ចន្លោះមិនឃើញ
នៅពេលសកម្មភាពពុះដីឡូត៍លក់នៅក្នុងស្រុក ពិសេសនៅតំបន់ជាយរាជធានីបាន និងកំពុងផុសផុលខ្លាំង គេឃើញតារាល្បីៗរបស់កម្ពុជាប៉ុន្មាននាក់ សុទ្ធជាតារាចម្រៀងបានហក់ចូលមកវិនិយោគក្នុងវិស័យអចលនទ្រព្យគួរឲ្យភ្ញាក់ផ្អើល បន្តកន្ទុយគ្នា។
១.ព្រាប សុវត្ថិ៖ កំពូលតារាចម្រៀងរូបនេះ បានបើកទំព័រប្រវត្តិសាស្ត្រមុនគេ ក្នុងនាមជាតារាចម្រៀងអាជីព ដែលបានងាកមកវិនិយោគបន្ថែមលើជំនួញដីធ្លី។ លោកបានធ្វើឲ្យមានការភ្ញាក់ផ្អើល ក្រោយលេចមុខធ្វើជាម្ចាស់គម្រោង "មហាព្រហ្ម" នៅតំបន់ភ្នំបាសិត កាលពីអំឡុងខែមិថុនា។ ត្រឹមរយៈប្រមាណ ២ខែ គម្រោងដីឡូត៍របស់លោក លក់អស់គ្មានសល់។
ក្រោយបិទបញ្ចប់គម្រោងនៅតំបន់ភ្នំបាសិត លោក ព្រាប សុវត្ថិ បានមកដោយចាប់ដៃគូជាមួយ ឧកញ៉ាវ័យក្មេង ឡេង ណាវ៉ាត្រា វិនិយោគលើគម្រោងថ្មីនៅក្បែរផ្សារថ្នល់ទទឹងខេត្តកំពង់ស្ពឺបន្តទៀត។ គម្រោងថ្មីនេះ តារាចម្រៀងហង្សមាស បានវិនិយោគជាង ៥លានដុល្លារជាមួយនឹងដៃគូ។
២. ខេមរៈ សិរីមន្ត៖ លោក សិរីមន្ត បានក្លាយជាតារាចម្រៀងល្បីទី២របស់កម្ពុជា ក៏ដូចជាតារាហង្សមាសទី២ បន្ទាប់ពីលោក ព្រាប សុវត្ថិ បានចូលខ្លួនក្នុងវិនិយោគលើវិស័យអចលនទ្រព្យ។ សកម្មភាពម្ចាស់បទ "ស្ទឹងត្រែងបងអើយ" បានធ្វើឲ្យមានការភ្ញាក់ផ្អើលខ្លាំង នាថ្ងៃម្សិលមិញនៅតំបន់ក្បែរដីឡូត៍លោក ព្រាប សុវត្ថិ ឈានចូលមកកាន់ជំនួញដីធ្លី។
ខុសប្លែក ពីរៀមច្បងខាងលើ លោក សិរីមន្ត បានប្រើប្រាស់ឧទ្ធម្ភាគចក្រធ្វើជាមធ្យោបាយបោះជំហានមកកាន់សមរភូមិជំនួញដីធ្លី។ សហការជាមួយឧកញ៉ា ឡេង ណាវ៉ាត្រា ដែរ លោក ខេមរៈ សិរីមន្ត បានវិនិយោគរួមនូវទឹកប្រាក់ប្រមាណ ១០លានដុល្លារឯណោះ លើផ្ទៃដី ៤០ហិចតា និងអនុវត្តគម្រោងតាម៣តំណាក់កាល។
៣.អ៊ីណូ៖ តារាចម្រៀង អ៊ីណូ គឺតារាចម្រៀងល្បីទី៣របស់កម្ពុជា និងជាតារាសាន់ដេទី១ដែលបានសម្រេចចូលមកលុកលុយក្នុងជំនួញដីធ្លីជាមួយសិស្សច្បងទាំងពីរខាងលើ។ ដូចគ្នានឹងលោក ព្រាប សុវត្ថិ ម្ចាស់បទ "ក្បាច់គុនមនុស្សស្មោះ" ចាប់ផ្ដើមចេញដំណើរវិនិយោគទិញដីពុះឡូតិ៍លក់ នៅតំបន់ភ្នំបាសិត ជាច្រើនកន្លែង។
ខុសពីមិត្តរួមអាជីពទាំងពីរខាងលើ តារាចម្រៀង អ៊ីណូ មិនទាន់ប្រកាសចេញមុខផ្លូវការចំពោះវត្តមានរបស់លោកក្នុងវិស័យអចលនទ្រព្យនៅឡើយទេ។ ប៉ុន្តែបែបនេះក្ដី មានព័ត៌មានមកថា ដីឡូត៍របស់លោកនៅតំបន់មានសក្ដានុពលមួយរបស់កម្ពុជានេះ បានលក់ដាច់ចង់អស់នូវគម្រោងចាស់ៗរបស់លោកទៅហើយ ហើយក៏បាន និងកំពុងវិនិយោគបន្តបន្ទាប់ទៀតដែរ។
មិនទាន់មានតួលេខផ្លូវការពីទំហំទឹកប្រាក់វិនិយោគរបស់ អ៊ីណូ នៅឡើយ។ ប៉ុន្តែក្រោយពីធ្លាយចេញពីផែនការវិនិយោគរបស់ខ្លួនលើគម្រោងដីឡូត៍ខាងលើ តារាចម្រៀងមកពីខេត្តបាត់ដំបង បានបង្ហើបទៀតថា លោកគ្រោងនឹងធ្វើសន្និសីទធំមួយក្នុងពេលឆាប់ៗខាងមុខនេះ ដូចគ្នានឹងការហក់ចូលរបស់សិស្សច្បងទាំងពីរខាងលើមកកាន់វិថីជួញដូរអចលនទ្រព្យនេះដែរ៕