"មនុស្សសំរាម" ជាសិល្បករកែច្នៃសំរាមធ្វើជាគ្រឿងតុបតែងលម្អ ល្បីនៅខេត្តសៀមរាប
- 2018-08-08 02:10:47
- ចំនួនមតិ 0 | ចំនួនចែករំលែក 0
"មនុស្សសំរាម" ជាសិល្បករកែច្នៃសំរាមធ្វើជាគ្រឿងតុបតែងលម្អ ល្បីនៅខេត្តសៀមរាប
ចន្លោះមិនឃើញ
"មនុស្សសំរាម" ជារហស្សនាមដែលមហាជនបានដាក់ឲ្យបុរសម្នាក់ជាសិល្បករច្នៃសំរាមធ្វើជាគ្រឿងតុបតែងលម្អ និង វត្ថុអនុស្សាវរីយ៍ នៅក្រុងសៀមរាប ខេត្តសៀមរាប។ សំរាមសិរីរាង្គ គ្រាប់ធញ្ញជាតិ ថង់ផ្លាស្ទិក បំពង់បឺត កំប៉ុងស្រាបៀរ និងវត្ថុជាច្រើនទៀត ដែលគេបោះចោល មនុស្សសំរាម តែងតែរើសយកមកច្នៃធ្វើជាវត្ថុអនុស្សាវរីយ៍យ៉ាងស្រស់ស្អាតស្ទើរមិនគួរឲ្យជឿ។ តើមនុស្សសំរាម ជានរណា? ចង់ដឹង តាមដានរឿងរ៉ាវនៅខាងក្រោមនេះ៖
១. លោក រៀម មុនីស៊ីឡុង វ័យ៣១ឆ្នាំ ជាសិល្បករកែច្នៃសំរាមធ្វើជាគ្រឿងតុបតែងលម្អ និងវត្ថុអនុស្សាវរីយ៍ នៅក្នុងក្រុងសៀមរាប ខេត្តសៀមរាប។ លោក មុនីស៊ីឡុង ចាប់ផ្ដើមមុខរបរនេះ នៅក្នុងអំឡុងឆ្នាំ ២០០៧ ឬ ២០០៨។ លោករំលឹកថា ក្រោយពីមានរបួសរហូតដល់ពិការម្រាមដៃ ដែលមិនអាចគូរគំនូរបានទៀត លោកបានអភិវឌ្ឍខ្លួនពីវិចិត្រករដែលគូរគំនូរតាមវត្តអារាម មកជាអ្នកកែច្នៃសំរាមវិញម្ដង បន្ទាប់ពីទទួលបានការបណ្ដុះបណ្ដាលពីអង្គការក្រៅរដ្ឋាភិបាលមួយ។
២. សំរាមភាគច្រើនដែល លោក រៀម មុនីស៊ីឡុង កែច្នៃមានដូចជា សំរាមសិរីរាង្គ គ្រាប់ធញ្ញជាតិ ថង់ផ្លាស្ទិក បំពង់បឺត កំប៉ុងស្រាបៀរជាដើម។ លោក មុនីស៊ីឡុង និយាយថា ការណ៍ដែលលោកយកសំរាមទាំងអស់នេះមកច្នៃគ្រឿងតុបតែងលម្អ និង វត្ថុអនុស្សាវរីយ៍ ក៏ព្រោះតែលោកចង់ពញ្ញាក់ស្មារតីពលរដ្ឋឱ្យយល់ដឹងពីបរិស្ថាន និង ចេះគ្រប់គ្រងកាកសំណល់បានល្អផងដែរ។ លោកថា បើយើងចេះគ្រង់គ្រង និង ប្រើប្រាស់កាកសំណល់បានល្អ វានឹងផ្ដល់ប្រយោជន៍ដល់យើងវិញមិនខាន។
៣. ដើម្បីបានវត្ថុធាតុដើមមកកែច្នៃ លោក រៀម មុនីស៊ីឡុង តែងដើររើសសំរាមក្នុងភូមិស្ទើររៀងរាល់ថ្ងៃ។ ទង្វើនេះ ពេលខ្លះលោកត្រូវមិត្តភក្តិដាក់រហស្សនាមថា "មនុស្សសំរាម" ផងក៏មាន។ ប៉ុន្តែ លោកថា លោកមិនខ្វល់នឹងការដាក់រហស្សនាមនេះនោះទេ ព្រោះលោកឱ្យតម្លៃទៅលើមុខរបររបស់លោក និងពេញចិត្តលើអ្វីដែលលោកកំពុងធ្វើរាល់ថ្ងៃ។
៤. ដើម្បីបានវត្ថុតែងលម្អមួយផ្ទាំងៗ ឬ វត្ថុអនុស្សាវរីយ៍មួយៗ លោក លោក រៀម មុនីស៊ីឡុង តែងគិតគូររកគំនិតច្នៃប្រឌិតថ្មីៗជានិច្ច។ ពេលគិតឃើញរូបដែលត្រូវកែច្នៃហើយ លោកតែងគិតបន្តទៀត ថាតើវត្ថុធាតុដើមអ្វីខ្លះ ដែលសក្ដិសមយកទៅប្រើដើម្បីដំឡើងរូបទាំងនោះ។ លោក មុនីស៊ីឡុង និយាយថា រូបដែលលោកដំឡើងរួចហើយ មានតែមួយផ្ទាំងតែប៉ុណ្ណោះ គឺគ្មាន២នោះទេ។ នៅក្នុងរូបនេះ លោក មុនីស៊ីឡុង កំពុងដំឡើងរូបក្តាន់ ធ្វើពីសម្បកកំប៉ុងស្រាបៀរ និង ផ្លែពោតបារាំងចាស់ៗ។
៥. បច្ចុប្បន្ន គ្រឿងតុបតែងលម្អ និង វត្ថុអនុស្សាវរីយ៍ ដែលលោកដំឡើង មិនសូវមានដាក់លក់នៅលើទីផ្សារច្រើនទេ ព្រោះមិនសូវមានអតិថិជនខ្មែរនិយមចូលចិត្ត។ ភាគច្រើនលោកទៅដំឡើងគ្រឿងតុបតែងលម្អ និង វត្ថុអនុស្សាវរីយ៍ ទាំងនោះ នៅតាមសណ្ឋាគារ រង្គសាល និង ហាងផ្សេងៗ ដែលម្ចាស់របស់គេយល់ពីតម្លៃ នៃវត្ថុកែច្នៃទាំងនោះ។ នេះជារូប សម្ដេចហ៊ុន សែន និង ភរិយា ដែលលោកមុនីស៊ីឡុង រចនាឡើង ដោយប្រើគ្រាប់ធញ្ញជាតិ ដែលមានដូចជា គ្រាប់សណ្តែក គ្រាប់ល្ពៅ ជាដើម៕