កម្ពុជារកឃើញផលិតផលក្លែងក្លាយពីរមុខ កាហ្វេ និង ម្រេច ត្រូវបានជនល្មើសប្រើសារធាតុផ្សំប្លែកៗ

2018-08-08 07:36:23
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងហោចមានផលិតផលក្លែងក្លាយ ដែលបង្កគ្រោះថ្នាក់ ដល់សុខភាពចំនួនពីរមុខស្មើនឹង២៥តោន ត្រូវសមត្ថកិច្ចបង្ក្រាបបានជាបន្តបន្ទាប់។ ផលិតផលទាំងពីរមុខនេះរួមមាន កាហ្វេ និងម្រេច ត្រូវបានជនល្មើសប្រើប្រាស់វត្ថុធាតុដើមប្លែកៗ ដើម្បីកែច្នៃដាក់លក់នៅលើទីផ្សារ។

រូបតំណាង ដែលក្រុមការងារបានចុះទៅថតសកម្មភាព សមត្ថកិច្ចត្រៀមកម្ទេចផលិតផលក្លែងក្លាយ កន្លងមក

លោក មៀច សុផាន់ណា អនុរដ្ឋលេខាធិការក្រសួងមហាផ្ទៃ និងជាប្រធាន គណៈកម្មាធិការប្រយុទ្ធប្រឆាំងផលិតផលក្លែងក្លាយថ្លែង នៅក្នុងឱកាសសន្និសីទសារព័ត៌មានកាលពីរសៀលថ្ងៃទី៦ ខែសីហានេះថា ករណីទី១ សមត្ថកិច្ចចុះបង្រ្កាបកាលពីថ្ងៃទី ១៣ ខែឧសភា ឆ្នាំ ២០១៨ ដោយក្រុមប្រតិបត្តិការពិសេស នៃគណៈធម្មាធិការ បានចុះបង្រ្កាបករណី លើសិប្បកម្មផលិតកាហ្វេក្លែងក្លាយ និងខុសច្បាប់ ស្ថិតនៅភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ដកហូតបានវត្ថុតាង ចំនួន ១០មុខ ស្មើនឹង០៧តោន ឃាត់ខ្លួនជនសង្ស័យបានចំនួន ០១នាក់។ ករណីទី២ កាលពីថ្ងៃទី០៦ ខែកក្កដា ឆ្នាំ២០១៨ ក្រុមប្រតិបត្តិការពិសេសបានចុះបង្រ្កាបករណីបើកសិប្បកម្មផលិតម្រេច និងកាហ្វេ មិនអនុលោមតាមច្បាប់ ស្ថិតនៅផ្ទះលេខ២អឺ០ ផ្លូវ២២៦ ភូមិ១៣ សង្កាត់ ផ្សារដើមគរ ខណ្ឌទួលគោក រាជធានីភ្នំពេញ ដកហូតបានវត្ថុតាង ចំនួន ១៣មុខ ស្មើនឹង១៨តោន។

លោក មៀច សុផាន់ណា អនុរដ្ឋលេខាធិការក្រសួងមហាផ្ទៃ

“អញ្ចឹង ករណីទី១នេះ គឺជនល្មើសបានផលិតកាហ្វេក្លែងក្លាយ ដោយប្រើប្រាស់ សណ្ដែកដី អំបិល សារធាតុធ្វើឱ្យប្រែជាពណ៌ខ្មៅ ចេញពពុះ និងមានរស់ជាតិចាប់មាត់ ដែលអាចធ្វើឱ្យប៉ះពាល់ដល់សុខភាពអ្នកប្រើប្រាស់។ ករណីទី២ ជនល្មើសផលិតកាហ្វេ និងម្រេចក្លែងក្លាយ ហើយអ្វីដែលយើងចាប់អារម្មណ៍នោះគឺការផលិតម្រេចក្លែងក្លាយ ដោយយកម្រេចធម្មតាមួយគីឡូក្រាមកិនលាយជាមួយនឹងបាយក្ដាំង សារធាតុពណ៌ខ្មៅ និងថែមម្ទេសឱ្យហិលខ្លាំង”។

គណៈកម្មាធិការប្រយុទ្ធប្រឆាំងផលិតផលក្លែងក្លាយបានទទួលព័ត៌មានរួចហើយថា នៅមានកន្លែងផលិតផលិតផលក្លែងក្លាយផ្សេងៗទៀត និងកំពុងកំណត់អាទិភាពជាបន្តបន្ទាប់ដោយមិនបន្ធូរដៃនោះទេ។ នេះបើតាមប្រសាសន៍លោក មៀច សុផាន់ណា។

បន្ថែមលើនេះ កាលពីថ្ងៃម្សិលមិញ គណៈកម្មាធិការប្រយុទ្ធប្រឆាំងផលិតផលក្លែងក្លាយក៏បានឱ្យដឹងថា គិតត្រឹមខែឧសភា ដល់ខែកក្កដាខ្លួនបានរឹបអូសផលិតផលក្លែងក្លាយប្រមាណជិត៩០ តោន និងឃាត់ខ្លួនមនុស្សជាង ១០នាក់ ខណៈវត្ថុតាង ដែលអាជ្ញាធររឹបអូសបាននេះ ក៏នឹងត្រូវកំទេចចោលនាពេលខាងមុខផងដែរ។ ផលិតផលក្លែងក្លាយទាំងនោះរួមមាន ជាសម្ភារៈសម្រាប់ ផលិតសាច់ប៉ាតេមិនអនុលោមតាមច្បាប់ ករណីបើកសិប្បកម្មផលិតម្រេច និងកាហ្វេមិនអនុលោមតាមច្បាប់ និងករណី នាំចូលផលិត វេចខ្ចប់ខុសច្បាប់លើផលិតផលម៉ាក Saint Amand ទឹកបរិសុទ្ធ Evian ស្រាបៀរម៉ាក Corona និងផលិតមួយចំនួនទៀត ដែលផលិតផលទាំងនេះនឹងធ្វើឲ្យប៉ះពាល់ដល់សុខភាពអ្នកបរិភោគយ៉ាងខ្លាំង៕

សូមចុចអាន៖ កិនកម្ទេចគ្រឿងសម្អាងក្លែងក្លាយខុសច្បាប់ និងសារធាតុគីមី សរុបជាង ១០០តោន នៅព្រឹកមិញ

អត្ថបទ៖ សុផល