ស្ងាត់ៗ! កំពង់ផែទេសចរខ្នាតអន្តរជាតិធំមួយតម្លៃ១០ លានដុល្លារអាមេរិកបើកការដ្ឋាន ម្សិលមិញ

2018-08-09 13:55:51
ចំនួនមតិ 0 | ចំនួនចែករំលែក 0

ចន្លោះមិនឃើញ

កំពង់ផែទេសចរដ៏ធំមួយ ដែលមានតម្លៃប្រមាណ ១០ លានដុល្លារអាមេរិកស្ថិតនៅខេត្តកំពតត្រូវបានបើកការដ្ឋានសាងសង់កាលពីម្សិលមិញនេះ ក្រោមអធិបតីភាពឯកឧត្ដម ថោង ខុន រដ្ឋមន្ត្រីក្រសួងទេសចរណ៍ និងឯកឧត្ដម ជាវ តាយ អភិបាលខេត្តកំពត។

កំពង់ផែទេសចរ ដែលមានតម្លៃ ១០លានដុល្លារអាមេរិកនេះ ក្រោមជំនួយរបស់ធនាគារអភិវឌ្ឍន៍អាស៊ី ហៅកាត់ថា (ADB) ស្ថិតនៅក្នុងភូមិជំគ្រាល ឃុំជំគ្រាល ស្រុកទឹកឈូ ខេត្តកំពត ក្នុងចម្ងាយដីប្រមាណជា ៦គីឡូម៉ែត្រពីទីរួមខេត្ត។

ឯកឧត្ដម ថោង ខុន រដ្ឋមន្ត្រីក្រសួងទេសចរណ៍បានថ្លែងថា ការកសាងកំពង់ផែទេសចរណ៍នឹងបើកច្រកសមុទ្រកម្ពុជា ឆ្ពោះទៅកាន់ពិភពលោក និងធ្វើឱ្យខេត្តកំពតក្លាយជាទិសដៅទេសចរណ៍គួរឲ្យ ទាក់ទាញ នៅពេលខាងមុខ។

ឯកឧត្ដមបានបន្ថែមថា កំពង់ផែទេសចរណ៍អន្តរជាតិខេត្តកំពត និងឆ្នេរខ្សាច់ កម្សាន្តខេត្តកំពត នឹងសាងសង់ឲ្យរួចរាល់ មុនការរៀបចំបុណ្យសមុទ្រជុំទី២ ដែលនឹងត្រូវរៀបចំឡើងក្នុងខេត្តកំពត នៅឆ្នាំក្រោយ។ ឆ្នាំ២០១៨ នេះខេត្តកោះកុងនឹងធ្វើជាម្ចាស់ផ្ទះរៀបចំបុណ្យសមុទ្រជុំទី២។

កំពង់ផែទេសចរណ៍អន្តរជាតិខេត្តកំពត ជាគម្រោងហេដ្ឋារចនាសម្ព័ន្ធ ទេសចរណ៍សម្រាប់កំណើនប្រកបដោយបរិយាបន្នកម្ម ក្នុងមហាអនុតំបន់មេគង្គ ដើម្បីជំរុញការអភិវឌ្ឍទេសចរណ៍តំបន់ឆ្នេរ ឲ្យមាននិរន្តរភាព និងការទទួលខុសត្រូវខ្ពស់ តាមទស្សនាទាន សំខាន់បី គឺ “បៃតង ស្អាត និង ឆ្លាត” (Green Clean and SMART) ក្នុងផែនការអភិវឌ្ឍន៍ទេសចរណ៍កំពតថ្មី (២០១៦-២០២០) ឲ្យមានប្រសិទ្ធភាពខ្ពស់ ដើម្បីរួមចំណែកអភិវឌ្ឍសេដ្ឋកិច្ច-សង្គម ធ្វើឲ្យទឹកដីកម្ពុជា ក្លាយទៅជាកន្លែងដ៏ប្រសើរបំផុត សម្រាប់ការរស់នៅរបស់ប្រជាពលរដ្ឋ និងការទស្សនារបស់ភ្ញៀវទេសចរ។

ឯកឧត្ដម ជាវ តាយ អភិបាលខេត្តកំពត បានបង្ហាញអារម្មណ៍រីករាយ និងចាត់ទុកការសាងសង់កំពង់ផែនេះពិតជាមានសារៈសំខាន់ ក្នុងការតភ្ជាប់ទេសចរណ៍តាមផ្លូវទឹកពីប្រទេសនានាក្នុងតំបន់ និងលើសកលលោក ហើយភ្ញៀវទេសចរពិតជាមានការកើនឡើងសម្រាប់ខេត្ត តំបន់ឆ្នេរ និងព្រះរាជាណាចក្រកម្ពុជាផងដែរ។

គម្រោងសំណង់នេះ រួមមាន អគារអ្នកដំណើរ ផែចតកាណូត កំពង់សាឡង់ ម៉ារីនា អាងប្រព្រឹត្តកម្មទឹកកខ្វក់ បញ្ជរព័ត៌មានទេសចរ ផ្លូវជុំវិញកំពង់ផែ និងផ្លូវតភ្ជាប់ជាមួយផ្លូវខេត្ត បង្គន់ អនាម័យសាធារណៈ ចំណតទោចក្រយានយន្ត រថយន្តតូច រថយន្តក្រុង អគារស្នាក់នៅ អគារសន្តិសុខ កន្លែងទុកដាក់សំរាម និងសួនច្បារ៕

អត្ថបទ៖ សុផល