៤រឿងនេះ កុំធ្វើឲ្យសោះពេលប្រលងបាក់ឌុប ប្រយ័ត្នស៊យធំ ដូចបោះ១២ឆ្នាំ ចោលទទេរ

2018-08-13 01:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រលងសញ្ញាប័ត្រមធ្យមសិក្សាទុតិយភូមិ ហៅថាកាត់បាក់ឌុប នឹងចូលមកដល់នៅថ្ងៃទី ២០ សីហា ឆ្នាំ២០១៨ខាងមុខ។

ដើម្បីចូលប្រលងដោយរលូន ដែលបេក្ខជនចំណាយពេលបានរង់ចាំ ១២ឆ្នាំមកនោះ ក្រសួងអប់រំ យុវជន និងកីឡា បានប្រកាសនូវ បម្រាម៤យ៉ាង។

តាមទំព័រហ្វេសប៊ុកផ្លូវការ របស់ក្រសួងអប់រំ យុវជន និងកីឡា បានចុះផ្សាយថា បេក្ខជនទាំងអស់មិនត្រូវយកធ្វើរឿងទាំង៤នេះដាច់ខាត ដើម្បីចៀសវាងរាំងស្ទះ ដល់ការប្រលង ឬអាចធ្លាក់ដោយស្វ័យប្រវត្តិតែម្ដង។

១. អាវុធជាតិផ្ទុះ

បេក្ខជនទាំងអស់មិនត្រូវយកអាវុធជាតិផ្ទុះគ្រប់ប្រភេទ តាមខ្លួនចូលក្នុងបរិវេណមណ្ឌលប្រលង។

២. សំណៅឯកសារគ្រប់ប្រភេទ

ដាច់ខាត មិនត្រូវយកឯកសារគ្រប់ប្រភេទ រូបភាពកាតាប កាបូបយួរដៃ ថង់ សំពៀត កញ្ចប់ផ្សេងៗ និងទឹកលុបពណ៌ ស ក៏មិនត្រូវយកទៅតាមដែរ។

៣. ម៉ាស៊ីនគិតលេខ និងគ្រឿងអេឡិចត្រូនិក

របស់ទាំងនេះ សូមកុំច្រឡំយកទៅឲ្យសោះ បើមិនចង់មានបញ្ហា នាំខាតប្រយោជន៍ធំ។ វត្ថុទាំងនោះមាន ដូចជា ម៉ាស៊ីនគិតលេខ គ្រឿងអេឡិចត្រូនិកគ្រប់ប្រភេទ និងនាឡិកាដៃ ដែលអាចគិតលេខបាន។

៤. ប្ដូរសន្លឹក និងដាក់សញ្ញាសម្គាល់

មិនត្រូវធ្វើចម្លើយវិញ្ញាសានៅលើសន្លឹកកិច្ចការណាដែលគ្មានហត្ថលេខាអនុរក្ស។ ម្យ៉ាងវិញទៀត សិស្សានុសិស្ស មិនត្រូវប្ដូរសន្លឹកកិច្ចការ ឬក្រដាសព្រាង ឬផ្ទៀងផ្ទាត់ចម្លើយ ឬចម្លងគ្នា។

លើសពីនេះ មិនត្រូវធ្វើសញ្ញាសម្គាល់លើសន្លឹកកិច្ចការ ឬហែកសន្លឹកកិច្ចការ និងចុងក្រោយមិនត្រូវឲ្យអ្នកដទៃចូលប្រឡងជំនួសជាដាច់ខាត។

សូមបញ្ជាក់ថា ការប្រឡងសញ្ញាប័ត្រមធ្យមសិក្សាទុតិយភូមិ នឹងធ្វើឡើងនៅសម័យប្រឡង ២០ សីហា ២០១៨ ឆាប់ៗខាងមុខនេះ។

បញ្ជីឈ្មោះបេក្ខជន លេខតុ លេខបន្ទប់ និងបទបញ្ញត្តិផ្សេងៗទាក់ទងនឹងការប្រឡង នឹងបិទផ្សព្វផ្សាយ តាមមណ្ឌលប្រឡង ចាប់ពីម៉ោង ៩ ព្រឹក ថ្ងៃទី១៩ ខែសីហា ឆ្នាំ២០១៨។

អត្ថបទ៖ ពៅ រក្សា