បារាំង ជម្លៀសមនុស្សជិត២ពាន់នាក់ ក្រោយជួបគ្រោះទឹកជំនន់ធ្ងន់ធ្ងរ
- 2018-08-11 02:06:43
- ចំនួនមតិ 0 | ចំនួនចែករំលែក 0
បារាំង ជម្លៀសមនុស្សជិត២ពាន់នាក់ ក្រោយជួបគ្រោះទឹកជំនន់ធ្ងន់ធ្ងរ
ចន្លោះមិនឃើញ
យោងតាមអាជ្ញាធរបារាំង បានឲ្យដឹងថា បុរសជនជាតិអាល្លឺម៉ងម្នាក់វ័យខ្ទង់ ៧០ឆ្នាំបានបាត់ខ្លួន ហើយមនុស្ស ១ ៦០០នាក់ផ្សេងទៀត ត្រូវបានជម្លៀសចេញពីផ្ទះ ដោយសារទឹកជំនន់នៅប្រទេសបារាំង។
លោកFrançoise Souliman អភិបាលស្រុក Haute-Marne បានប្រាប់ទីភ្នាក់ងារសារព័ត៌មានអាល្លឺម៉ង់ កាលពីថ្ងៃសុក្រថា បុរសនេះទំនងបានធ្លាក់ចូលទឹកទន្លេ Aube ដែលយូរយ៉ាងលឿន កាលពីរសៀលថ្ងៃព្រហស្បតិ៍។
ទោះបីជាយ៉ាងណា ក្រុមអ្នកមុជទឹក និងឧទ្ធម្ភាគចក្រមួយគ្រឿង ត្រូវបានគេដាក់ពង្រាយដើម្បីស្វែងរកបុរសដែលបាត់ខ្លួននោះ។
បើយោងតាមសេចក្តីថ្លែងការណ៍របស់រដ្ឋាភិបាលកាលពីថ្ងៃព្រហស្បតិ៍ បានឲ្យដឹងថា នៅភាគអាគ្នេយ៍ប្រទេសបារាំង មនុស្សទាំង ១ ៦០០នាក់នោះ ត្រូវបានជម្លៀសចេញដោយសារតែខ្យល់ព្យុះបក់បោកខ្លាំង។ ការជម្លៀសត្រូវបានចូលរួមដោយឧទ្ធម្ភាគចក្រ ៤គ្រឿង , អ្នកពន្លត់អគ្គីភ័យជាង ៤០០នាក់ និងមន្រ្តីប៉ូលិសជាច្រើនត្រូវបានកេណ្ឌសម្រាប់ប្រតិបត្តិការជួយសង្គ្រោះនេះ។
គួរបញ្ជាក់ឲ្យដឹងថា ភ្លៀងបានធ្លាក់យ៉ាងខ្លាំងនៅទូទាំងទ្វីបអឺរ៉ុបកណ្តាល ក្នុងរយៈពេលប៉ុន្មានថ្ងៃមកនេះ បន្ទាប់ពីអាកាសធាតុក្តៅខ្លាំង និងរាំងស្ងួត៕