វីដេអូខ្លី៖ របរបចិញ្ចឹមចង្រិតដំបូងគេបង្អស់ នៅខេត្តតាកែវ

2018-08-11 03:06:04
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ញឿក ភារម្យ អាយុ២៨ឆ្នាំ ជាម្ចាស់កសិដ្ឋានចិញ្ចឹមចង្រិត នៅភូមិត្រពាំងឫស្សី ឃុំបារាយ ស្រុកដូនកែវ ខេត្តតាកែវ។ ដោយរាប់ទាំងសាខានៅតាមបណ្ដាខេត្តមួយចំនួនផង បច្ចុប្បន្ន លោកមានអាងចិញ្ចឹមចង្រិតចំនួន៤០០អាង លោកក៏មានទទួលទិញចង្រិតពីកសិដ្ឋាននានា ដើម្បីយកទៅលក់បន្តផងដែរ។

ទស្សនាវីដេអូ

ដើម្បីជោគជ័យដូចរាល់ថ្ងៃនេះ តើនរណាជឿបានថា លោក ភារម្យ មិនដែលបានឆ្លងកាត់ការបណ្ដុះបណ្ដាលពីបច្ចេកទេសចិញ្ចឹមចង្រិតនៅសាលារៀនណាមួយឲ្យជាក់លាក់នោះ ។

លោកភារម្យ បានស្គាល់ហើយចាប់ផ្ដើមរៀនចិញ្ចឹមចង្រិតតាមប្រព័ន្ធអ៊ីនធឺណិត និងយូធូប មុននឹងដាច់ចិត្តឈប់ធ្វើការងារ ដែលមានប្រាក់ខែ ៨០ដុល្លារ ហើយបោះទុនធ្វើអាងចិញ្ចឹមចង្រិតដោយខ្លួនឯង។

លោក ញឿក ភារម្យ អាយុ២៨ឆ្នាំ ជាម្ចាស់កសិដ្ឋានចិញ្ចឹមចង្រិត នៅភូមិត្រពាំងប្ញស្សី ឃុំបារាយណ៍ ស្រុកដូនកែវ ខេត្តតាកែវ

ការចាប់ផ្ដើមដំបូងនៅឆ្នាំ ២០១១ លោកប្រមែប្រមូលអស់ហើយប្រាក់សន្សំបានសរុប ១ពាន់ដុល្លារ ដើម្បីយកទៅប្រកបរបរចិញ្ចឹមចង្រិត បើទោះបីជាក្រុមគ្រួសាររបស់លោក មិនចង់ឲ្យលោកធ្វើក៏ដោយ។

ប៉ុន្តែដោយចិត្តពុះកញ្ជ្រោលចង់ធ្វើទៅហើយ លោកភារម្យ ដាក់គំនិតថាលែងខ្វល់ពីពាក្យសម្ដីរបស់អ្នកនៅជុំវិញខ្លួន ហើយប្ដេជ្ញាចាប់ផ្ដើមអាជីវកម្មនេះដោយខ្លួនឯងរហូតចិញ្ចឹមចង្រិតលក់បានជោគជ័យ និងមានទុនពង្រីកអាជីវកម្មព្រមទាំងអាងចិញ្ចឹមចង្រិតរបស់លោក បានដល់ទៅ ៤០០អាង។

ទៅថ្ងៃមុខ លោក ញឿក ភារម្យ មិនត្រឹមតែចង់ចិញ្ចឹមចង្រិតសម្រាប់លក់ប៉ុនណោះទេ។ លោកមានផែនការខ្ចប់ចង្រិតលក់ឲ្យក្មេងៗនៅតាមសាលា យ៉ាងហោចណាច់ឲ្យបាន៣លានកញ្ចប់នៅក្នុង១ខែ។ ក្រៅពីនោះ លោកក៏មានគម្រោងផលិតម្សៅចង្រិតសម្រាប់នាំចេញទៅក្រៅប្រទេស ដោយសហការជាមួយដៃគូ នៅប្រទេសកាណាដា និងអង់គ្លេសជាដើម។

សម្រាប់យុវជនដែលចង់ធ្វើអាជីវកម្មដោយខ្លួនឯង លោក ភារម្យផ្ដល់យោបល់ថា គួរកុំស្ទាក់ស្ទើរ មានប្រាក់តិច ធ្វើតាមតិច មានច្រើនធ្វើតាមច្រើន។ សំខាន់គួរសិក្សាឲ្យបានច្រើន ហើយមិនត្រូវខ្លាចបរាជ័យទេ។ លោកថា បរាជ័យគឺជារឿងល្អ ព្រោះវាជាគន្លឹះទៅកាន់ជោគជ័យ៕