អ្នកសារព័ត៌មានបង់ក្លាដេសម្នាក់ត្រូវបញ្ឈប់ពីការងារ ដោយសារបង្ហោះរូបគូស្នេហ៍ថើបគ្នា ក្រោមដំណក់ទឹកភ្លៀង

2018-08-11 08:33:40
ចំនួនមតិ 0 | ចំនួនចែករំលែក 0

ចន្លោះមិនឃើញ

រូបមួយសន្លឹករបស់គូស្នេហ៍ថើបគ្នាក្រោមដំណក់ភ្លៀងមូសុង បានល្បីទូទាំងប្រទេសបង់ក្លាដេស បន្ទាប់ពីអ្នកសារព័ត៌មានរូបថត Jibon Ahmed បង្ហោះនៅលើទំព័រ Facebook page របស់លោកកាលពីពេលថ្មីៗនេះ។

មនុស្សជាច្រើននៅលើប្រព័ន្ធផ្សព្វផ្សាយសង្គម បានប្រតិកម្មជាវិជ្ជមានចំពោះពេលវេលាដ៏មានសុភមង្គល និង កម្រនៃទិដ្ឋភាពបរិវេណសាកលវិទ្យាល័យដាកា ដែលប៉ុន្មានខែធ្លាប់តែជាកន្លែងតវ៉ាដោយហិង្សា។

ប៉ុន្តែមនុស្សមួយចំនួនទៀត ក្នុងប្រទេសបង់ក្លាដេស ដែលជាប្រទេសកាន់សាសនាអ៊ីស្លាមដ៏តឹងរឹងមួយ គិតថារូបថតនោះមិនសមរម្យ។

យោងតាមសារព័ត៌មានបង់ក្លាដេស មានវេបសាយ១៨ និង អ្នក blogger អភិរក្សនិយមម្នាក់ទៀតបានរិះគន់យ៉ាងធ្ងន់ធ្ងរទៅលើអត្ថន័យរូបថតនោះថា "ស្នេហាឥឡូវគេបើកចំហណាស់។ ពីមុនគេធ្វើឡើងដោយសម្ងាត់។ ឥឡូវពួកគេមកស្នេហានៅកណ្តាលថ្ងៃ។ វាជារឿងមិនល្អ ដែលពួកគេមកស្នេហានៅទីសាធារណៈដូច្នេះ"។

Ahmed បាននិយាយថាគូស្នេហ៍នេះមិនបានខុសទាស់អ្វីទេនៅក្នុងរូបថតនេះ។ លោកនិយាយថាអំណាចខាងសីលធម៌មិនអាចបញ្ឈប់លោកមិនឲ្យផ្តិតចេញនូវការងារសិល្បៈថតរូបរបស់លោកបានឡើយ។

Jibon Ahmed អ្នកសារព័ត៌មានរូបថត

អ្នកសារព័ត៌មានរូបថតខាងលើ បាននិយាយថា នៅពេលឃើញគូស្នេហ៍នេះកំពុង "ថើបគ្នា" ធ្វើឲ្យលោកពេញចិត្តមែនទែន។ ភ្លាមនោះបន្ទាប់ពីថតបានទិដ្ឋភាពដ៏អស្ចារ្យនេះ លោកបានបញ្ជូនរូបទៅឲ្យបន្ទប់ពត៌មានរបស់លោកភ្លែត។ ប៉ុន្តែរឿងនឹកស្មានមិនដល់បានកើតឡើង។ Editor របស់លោកមិនត្រឹមតែមិនផ្សាយរូបនោះ ហើយថែមទាំងស្តីឲ្យធ្ងន់ៗថាជារូបនាំឲ្យប៉ះពាល់សង្គម។ Ahmed និយាយនៅក្នុងបទសម្ភាសន៍ជាមួយកាសែត The Washington Post។

ក្រោមយមក អ្នកសារព័ត៌មានវ័យ៣០ឆ្នាំខាងលើបានបង្ហោះវាចូលទៅក្នុងគណនី Instagram និង Facebook របស់លោក។ ត្រឹមរយៈពេល១ម៉ោងមាន share រហូតដល់ទៅ ៥ ០០០ ដង។

ថ្ងៃបន្ទាប់ ប្រធានធំរបស់លោក បានដកហូតកាតបុគ្គលិក និង កុំព្យូទ័រយួរដៃពីលោកដោយមិនប្រាប់ពីមូលហេតុអ្វីទាំងអស់។ នៅពេលដឹងរឿងនេះ editor របស់ Ahmed គឺលោក Khujista Nur-e-Naharin នៃគេហទំព័រព័ត៌មាន Purboposhchimbd បានរៀបរាប់ថា គ្រប់គ្នានៅបន្ទប់ព័ត៌មានពេញចិត្តជាខ្លាំងនឹងរូបថតរបស់ Ahmed ហើយថា ប្រធានធំ បណ្តេញ Ahmed មិនមែនមកពីមូលហេតុវិជ្ជាជីវៈការងារទេ តែបណ្តាលមកពី Ahmed មិនបង្ហាញខ្លួននៅ office។

Ahmed និយាយថាលោកលោកមានការខកចិត្តចំពោះរបៀបដោះស្រាយបញ្ហាមកលើខ្លួនលោក។ "គូស្នេហ៍ដែលថើបគ្នាគ្មានអ្វីខុសទាស់ឡើយ ហើយ ក៏មិនអាសអាភាសដែរ។ ខ្ញុំពិតជាខកចិត្ត។ មនុស្សមួយចំនួននៅក្នុងប្រទេសរបស់យើងបានទទួលការអប់រំតែនៅលើក្រដាសប៉ុណ្ណោះ ប៉ុន្តែពួកគេមិនបានទទួលការអប់រំក្នុងន័យពិតប្រាកដមួយឡើយ។ ពួកគេបរាជ័យក្នុងការស្វែងយល់ពីអត្ថន័យមូលដ្ឋាននៃរូបថតរបស់ខ្ញុំ។ ខ្ញុំក៏មានការព្រួយបារម្ភបន្តិចបន្តួចដែរចំពោះខ្លួនឯង"៕

ប្រភព៖ Washingtonpost ប្រែសម្រួល៖ សុខ លាងហ៊ត