រូបគំនូរស្រមើស្រមៃ ឃើញហើយនឹកដល់ជីវភាពខ្មែរសម័យដើម

2018-08-13 03:15:41
ចំនួនមតិ 0 | ចំនួនចែករំលែក 0

ចន្លោះមិនឃើញ

រូបគំនូររំលេចទិដ្ឋភាព និងសកម្មភាពនៃជិវិតរស់នៅតាមទីជនបទ ស្រុកស្រែចម្ការ ជាទិដ្ឋភាពស្រមើស្រមៃរបស់វិចិត្រករវ័យជិត៤០ឆ្នាំមួយរួបរស់នៅទឹកដីខេត្តបាត់ដំបង។

(រូបគំនូររបស់លោក ស្រី បូរ៉ា/រូបភាព៖ផ្តល់ឲ្យ)

រូបគំនូរបែបស្រមើស្រមៃទាំងនេះកើតចេញពីបទពិសោធន៍នៃជីវិតរស់នៅជនបទ របស់វិចិត្រកររស់នៅស្រុកគាស់ក្រឡ ខេត្តបាត់ដំបង ហើយរូបគំនូរទាំងនេះក៏បានទទួលការគាំទ្រមិនតិចនាក់ដែរពេលបង្ហោះលើបណ្តាញសង្គមម្តងៗ។

(រូបគំនូររបស់លោក ស្រី បូរ៉ា/រូបភាព៖ផ្តល់ឲ្យ)

លោក ស្រី បូរ៉ា វ័យ៣៨ឆ្នាំ បានទទួលការបណ្តុះបណ្តាលជំនាញសិប្បកម្ម-គំនូរនៅខេត្តបាត់ដំបងកាលពីឆ្នាំ១៩៩៨ ក្រោមការបណ្តុះបណ្តាលរបស់អង្គការយូណេស្កូ និងមន្ទីរអប់រំខេត្ត។

ក្រោយបញ្ចប់ការសិក្សាក្នុងរយៈពេលមួយឆ្នាំ លោក បូរ៉ា បានបន្តសិក្សាស្រាវជ្រាវលើជំនាញគំនូរនេះដោយខ្លួនឯងបន្តទៀត ទើបតែរយៈពេល១០ឆ្នាំចុងក្រោយនេះទេដែលលោកបានបញ្ចញស្នាដៃជាសាធារណៈ និងទទួលបានការគាំទ្រជាបន្តបន្ទាប់។

(រូបគំនូររបស់លោក ស្រី បូរ៉ា/រូបភាព៖ផ្តល់ឲ្យ)

រូបភាពដែលលោក បូរ៉ា បានគូរគឺរំលេចនូវទិដ្ឋភាពរស់នៅជនបទរបស់ប្រជាពលរដ្ឋខ្មែរ ដែលពុំសូវមានឃើញទេនាពេលបច្ចុប្បន្ន។ វិចិត្រករគូររូបតាមការស្រមើស្រមៃរូបនេះលើកឡើងថាលោកចង់បង្ហាញថាជិវិតកាលពីសម័យមុនហាក់មានក្តីសុខម្យ៉ាងតាមបែបជនបទ។

(រូបគំនូររបស់លោក ស្រី បូរ៉ា/រូបភាព៖ផ្តល់ឲ្យ)

លោកបន្តថា៖ «ចង់ឲ្យមានការប្រៀបធៀបពីការរីកចម្រើននាពេលបច្ចុប្បន្ន និងពេលមុន...មានអ្វីខ្លះ បាត់បង់ ខុសគ្នាយ៉ាងម៉េច...ឥឡូវហាក់បាត់បង់ទំនាក់ទំនងបែបធម្មជាតិ ប្រពៃណីប្រើរទេះគោ...ទាំងនេះជាសញ្ញាណមួយបង្ហាញពីវប្បធម៌ ប្រពៃណីរបស់យើង...កាលមុនហាក់មានការរស់នៅដោយចេះជួយគ្នា ជាជាងការគិតពីលុយសំខាន់ ជួយគ្នាទៅវិញទៅមក»។

(រូបគំនូររបស់លោក ស្រី បូរ៉ា/រូបភាព៖ផ្តល់ឲ្យ)

ការគូររូបរបៀបនេះ កើតចេញពីបទពិសោធន៍ដែលលោក បូរ៉ា ធ្លាប់បានរស់នៅទីជនបទ និងការសាកសួរពីចាស់ទុំក្នុងមូលដ្ឋានផងដែរ។ បើតាមវិចិត្រករខាងលើ រូបគំនូររបស់លោក មានការបញ្ជាទិញមិនត្រឹមតែអ្ននៅខេត្តបាត់ដំបងទេ តែក៏មានដែរអ្នកនៅតាមបណ្តាខេត្តផ្សេងៗ។

ចំពោះតម្លៃវិញ លោកថាអាស្រ័យលើទំហំ និងគុណភាពនៃរូបដែលអតិថិជនចង់បាន ដែលអាចពី១០០ដុល្លារ រហូតដល់៣០០ដុល្លារក្នុងមួយផ្ទាំងក៏មាន៕

អត្ថបទ៖ ទូច សុខា