កុំឲ្យខ្លួនឯងភ័យ មកអានវិធីល្អទាំងនេះ ពីជើងខ្លាំងនិទ្ទេស Aដើម្បីចូលប្រលង មានអារម្មណ៍ល្អ
- 2018-08-14 06:40:00
- ចំនួនមតិ 0 | ចំនួនចែករំលែក 0
កុំឲ្យខ្លួនឯងភ័យ មកអានវិធីល្អទាំងនេះ ពីជើងខ្លាំងនិទ្ទេស Aដើម្បីចូលប្រលង មានអារម្មណ៍ល្អ
ចន្លោះមិនឃើញ
នៅសល់តែ ៥ថ្ងៃទៀតទេ ការប្រលងសញ្ញាប័ត្រមធ្យមសិក្សាទុតិយភូមិនឹងចូលមកដល់។ សម័យប្រលង ២០ សីហា ២០១៨ កាន់តែកៀកថ្ងៃមែនទែនហើយ ជាហេតុធ្វើឲ្យបេក្ខជនមួយភាគធំ ភ័យ អរ ស្មុគស្មាញ ឬឈឺក្បាល ធុញថប់អារម្មណ៍ ស្រ្តេសខ្លាំងជាដើម។
សូមអាន ៦ចំណុចខាងក្រោម ដើម្បីទប់ទល់បញ្ហានេះ។
អតីតសិស្សពូកែ កញ្ញា សុខ សហស្ស ប្រលងឆ្នាំ ២០១៧ កន្លងទៅ បានចែករំលែក វិធី៦យ៉ាង ដើម្បីបង្ក្រាបអារម្មណ៍ខ្លួនឯងកុំភ័យ នាំខាតឱកាសបញ្ចេញសមត្ថភាព។ តាមរយៈបទពិសោធន៍នេះ ជើងខ្លាំងខាងរៀនរូបនេះ បានប្រាប់ Sabay ថាកាលបាក់ឌុប ឆ្នាំ២០១៧ កញ្ញា អាចធ្វើគ្រប់វិញ្ញាសាដោយងាយ គ្មានឧបសគ្គ រហូតបាននិទ្ទេស A ពិន្ទុសរុប៩៩.៧១៤ សឹងតែ ១០០ពេញ។ បន្ទាប់មកទៀត កញ្ញាបានជាប់រៀនថ្នាក់អាហារូបករណ៍នៅសាលាល្បី១ នៅភ្នំពេញ ផ្នែកវិស្វកម្ម នៃវិទ្យាស្ថានបច្ចេកវិទ្យាកម្ពុជា ឬហៅថាសាលាតិចណូ។
អតីតសិស្សពូកែរូបនេះ បញ្ជាក់ថា ការភ័យ ការព្រួយបារម្ភ អ្នកណាក៏មាន អ្នកណាក៏ចេះកើតដែរ ប៉ុន្តែសំខាន់ តើយើងដឹងពីគន្លឹះទប់ទល់ និងមិនឲ្យវាមកបញ្ជាយើងបានកម្រិតណា?
កញ្ញា សុខ សហស្ស បានរំលឹកថា កាលពេលចូលប្រលងយុវតីរូបនេះ មានបទពិសោធន៍ និងធ្លាប់ភ័យដូចគ្នា តែមិនខ្លាំងប៉ុន្មានទេ ដោយសារមានវិធីទប់ស្កាត់ ៦នេះ។
១. សម្រួលអារម្មណ៍ខ្លួនឯង
មនុស្សយើង ត្រូវមានផ្លូវចិត្តរឹងមាំសិន មុនឈានទៅសម្រេចជំហានបន្ទាប់ នៃភាពជោគជ័យ។ សិស្សពូកែរូបនេះបញ្ជាក់ថា ជិតដល់ថ្ងៃប្រលងហើយ សូមចាំថា មានតែខ្លួនយើងទេ ដែលយល់ច្បាស់ពីសមត្ថភាពខ្លួនឯង។ ដំណាក់កាលនេះ គឺមិនមែនសម្រាប់សម្រុករៀនខ្លាំងទេ ប៉ុន្តែគឺជាពេលវេលា ថែទាំសុខភាពផ្លូវចិត្តឲ្យល្អ ដើម្បីដើរចូលទៅតុប្រលងដោយមិនភ័យ។
២. កុំទុកពេលទំនេរច្រើនពេក គួរចែកម៉ោងរំលឹកមេរៀន
ទោះជិតដល់ថ្ងៃប្រលង សល់៥ថ្ងៃ ឬតិចជាងនេះក៏ដោយ សូមចំណាយពេលខ្លះ ដើម្បីរំលឹកមេរៀន ឬរូបមន្តនានា។ សិស្សពូកែរូបនេះ តាំងពីដើមឆ្នាំមក គឺបានត្រៀមជាស្រេច សរសេរទុក កត់សង្ខេបរូបមន្ត និងចំណុចសំខាន់ៗនានា ដាក់ក្នុងសៀវភៅ១ ដើម្បីជួយឲ្យចំណេញពេលបើកមើល កុំឲ្យខាត ករណីរកឡើងវិញ។ ដូច្នេះ ឆ្លៀតឱកាសកាន់តែកៀកថ្ងៃប្រលង គឺយុវតីរូបនេះ បានយកវាមកបើកមើល រំលឹកឡើងវិញនៅផ្ទះមុនដែលបានជួយខ្លួនឯងយ៉ាងច្រើន។
បញ្ជាក់ បើយើងនៅទំនេរពេក ទោះអ្នករៀនល្មម ឬពូកែយ៉ាងណា នោះនឹងមានពេលគិតច្រើន ដែលជាហេតុនាំឲ្យភ័យឥតប្រយោជន៍។ យល់ល្អ គួរយកពេលមកហ្វឹកហាត់ខ្លួនខួរក្បាល និងរំលឹកមេរៀន ទើបវាចំណេញចំណេះ និងគ្មានពេលភ័យ និងស្មុគស្មាញ រហូតធ្វើឲ្យឈឺខាតពេលទៅប្រលង។
៣. អាហារសុខភាព និងការសម្រាក
រឿងនេះប្រហែលមិនសូវមានអ្នកចាប់អារម្មណ៍ទេ។ តាមពិតទៅ វាខុសគ្នាស្រលះ ពីចំណីផ្សេងៗដែលយើងញ៉ាំប្រចាំថ្ងៃ។ អាហារសុខភាព អាចមានតម្លៃថ្លៃបន្តិចមែន តែវាជួយសុខភាពយើងយ៉ាងច្រើន និងមានសុវត្ថិភាពមិនឲ្យយើងឈឺ រាករូស ខាតពេលប្រលង។ អាហារសុខភាពជាចំណុច ១ សំខាន់ទ្រទ្រង់រាងកាយយើង នៅមុនពេលការប្រយុទ្ធក្នុងសមរភូមិសិក្សា។ អាហារសុខភាព មានភាគច្រើនបន្លែ ដែលគ្មានជាតិគីមី ដែលញ៉ាំហើយបង្កើនថាមពល។
៤. ត្រៀមខ្លួនជាស្រេច
ក្រោយបានរៀបចំរួចរាល់ នៅពេលប្រលងនេះ សូមឧស្សាហ៍រំលឹកខ្លួនឯងថា គ្រប់យ៉ាងយើងអាចធ្វើបាន និងមានការគិតបែបវិជ្ជមាន កុំបន្លាចខ្លួនឯង។
៥. ទៅមើលកន្លែងប្រលងមុន
មុនថ្ងៃប្រលងមកដល់ គួរឆ្លៀតពេលទៅមើលមណ្ឌលប្រលង ដើម្បីស្គាល់ទីតាំង និងផ្លូវជិះទៅច្បាស់ មិនខាតពេលស្វែងរក ឬទៅប្រលងយឺតម៉ោង។ បើអាចសាកចូលទៅអង្គុយនៅតុ ឬក្នុងបន្ទប់ប្រលង ដើម្បីស៊ាំខ្លួនឯងជាមុន ក៏កាន់តែល្អ។
៦. ការសម្រាក និងធ្វើអារម្មណ៍ស្រស់ថ្លាជានិច្ច
ក្រោយញ៉ាំអាហារល្អគ្រប់គ្រាន់ និងស្រួលខ្លួន នោះយើងនឹងអាចគេងលក់ស្រួលដូចគ្នា គ្មានអ្វីមករំខាន។ សូមប្រយ័ត្នផង និងរៀបចំពេលគេងឲ្យគ្រប់គ្រាន់។ កុំប្រឡំសម្រុករៀនខ្លាំងនៅកៀកថ្ងៃប្រលង រហូតដាច់យប់ ព្រោះវាមិនចេះអីទេ ក្រៅតែអាចឲ្យយើងមានហានិភ័យខ្ពស់ នៃបញ្ហាសុខភាព ឬឈឺថ្កាត់នានា រាំងស្ទះទៅប្រលងមិនកើត។ ចុងក្រោយ កុំភ្លេចធ្វើខ្លួនឯងឲ្យមានភាពស្រស់ថ្លា ដើម្បីត្រៀមចូលទៅប្រលង ដោយរីករាយ។
សូមបញ្ជាក់ថា តាមរយៈការចែករំលែកបទពិសោធន៍ជោគជ័យខាងលើ បច្ចុប្បន្នអតីតសិស្សពូកែ និទ្ទេស A កញ្ញា សុខ សហស្ស កំពុងរង់ចាំលទ្ធផលជំហានបន្ទាប់ ក្រោយបានដាក់ពាក្យសុំអាហារូបករណ៍ល្បី១ ទៅរៀនបន្ត នៅសហរដ្ឋអាមេរិក នាពេលខាងមុខ។