មកស្គាល់បុរសខ្លាំង ធ្លាប់និពន្ធបទម្រៀងឲ្យតារាល្បីៗច្រៀងរាប់ភ្លេច
- 2018-08-15 04:59:14
- ចំនួនមតិ 0 | ចំនួនចែករំលែក 0
មកស្គាល់បុរសខ្លាំង ធ្លាប់និពន្ធបទម្រៀងឲ្យតារាល្បីៗច្រៀងរាប់ភ្លេច
ចន្លោះមិនឃើញ
កន្លងមកទស្សនិកជនធ្លាប់តែស្ដាប់បទចម្រៀងពីរោះៗពីកំពូលតារាចម្រៀងល្បីក្នុងប្រទេសកម្ពុជា តែពុំធ្លាប់ដឹងថានរណាជាអ្នកនិពន្ធបទឡើយ។ ដូច្នេះនៅថ្ងៃនេះ Sabay សូមបង្ហាញរឿងរ៉ាវខ្លះៗទាក់ទងបុរសខ្លាំងម្នាក់ធ្លាប់និពន្ធបទចម្រៀងរាប់រយបទឲ្យតារាល្បីៗមួយចំនួនច្រៀងជិត១៥ឆ្នាំមកនេះ។
លោក ផល វឌ្ឍនៈ បានកាន់ចុងប៊ិចតែងនិពន្ធបទចម្រៀងអប់រំមុនដំបូងក្នុងឆ្នាំ ២០០៥ ឲ្យអង្គការក្រៅរដ្ឋាភិបាល (NGO) មួយ ក្នុងទីក្រុងភ្នំពេញ។ ឆ្លៀតពេលទំនេរពីការងារខាងលើ លោកបានធ្វើការងារក្រៅម៉ោងដោយនិពន្ធបទចម្រៀងឲ្យផលិតកម្មល្បីៗមួយចំនួនក្នុងស្រុក ដើម្បីទទួលបានចំណូលបន្ថែមផ្គត់ផ្គង់ការរស់នៅ។
ស្នាដៃដែលលោកបញ្ចេញមុនដំបូងគេ គឺនៅក្នុងផលិតកម្ម M និពន្ធបទចម្រៀងឲ្យ នីកូ ច្រៀងជាច្រើនបទ ទទួលបានការគាំទ្រយ៉ាងខ្លាំងក្នុងអំឡុងពេលនោះ ពិសេសបទ "ហេតុអ្វីកុហកខ្ញុំ" ។ ក្រោយពីសមិទ្ធផលទី១បានជោគជ័យ លោក វឌ្ឍនៈ ឈានដល់និពន្ធបទចម្រៀងឲ្យ ឆាយ វីរៈយុទ្ធ សុខ ពិសី អ៊ីវ៉ា យូរី ច្រៀងមានដូចជាបទ "ទឹកអប់មានពិស" “លុយបងមិនដល់គេ" និងបទចម្រៀងជាច្រើនបទទៀត តែលោកមិនចាំចំណងជើង។
ជាមួយគ្នានេះដែរលោក ក៏បាននិពន្ធបទឲ្យតារាចម្រៀងថោនច្រៀងមាន មាស សុខសោភា ខេម ម៉ៅ ហាជី ហើយបទដែលទទួលបានការគាំទ្រពីទស្សនិកជនខ្លាំងបំផុតក្នុងឆ្នាំ ២០១៨ នេះគឺបទ "ឲ្យអត់ស្រឡះទៅ" ។ ក្រៅពីផលិតកម្មល្បីៗខាងលើ ផល វឌ្ឍនៈ ក៏បាននិពន្ធឲ្យតារាចម្រៀងហង្សមាស មាន លាង សុផាឡែន និង នៅ ស៊ីនឿន។
ថ្មីនេះបទចម្រៀងមួយបទទៀតកាន់តែទទួលបានការគាំទ្រយ៉ាងច្រើននោះ គឺបទ "ស្នេហ៍បងលើសចិត្តស្អប់" ក្នុងខ្សែភាពយន្តភាគរឿង "ថ្ងៃមុនស្អប់ ថ្ងៃនេះស្រឡាញ់" ត្រៀមនឹងដាក់បញ្ចាំងនៅទូរទស្សន៍ PNN ក្នុងពេលឆាប់នេះ។
លោក ផល វឌ្ឍនៈ ជាកូនអ្នកភ្នំពេញ មានឪពុកបម្រើការងារជាមន្ត្រីរាជការ និងអ្នកម្ដាយជាស្ត្រីមេផ្ទះ លោកជាកូនច្បងក្នុងចំណោមបងប្អូន៣នាក់។ ចំពោះការសិក្សាវិញអ្នកនិពន្ធបទ" ឲ្យអត់ស្រឡះទៅ" បានបញ្ចប់មធ្យមសិក្សាផ្នែកសំឡេង នៅប្រទេសម៉ាឡេស៊ី ក្នុងឆ្នាំ ២០០២ និងបានបញ្ចប់ថ្នាក់បរិញ្ញាបត្រនៅសាលាវិចិត្រសិល្បៈ ផ្នែកដូរ្យតន្ត្រីក្នុងឆ្នាំ ២០០៦៕