ក្លឹប ៥ដែលមានតម្លៃថ្លៃបំផុតនៅ Premier League

2018-08-15 07:53:55
ចំនួនមតិ 0 | ចំនួនចែករំលែក 0

ចន្លោះមិនឃើញ

លុយបានប្រែក្លាយក្របខ័ណ្ឌកំពូលអង់គ្លេសទៅជាលីគមានប្រជាប្រិយភាពដាច់គេទាំងការនាំចូលកីឡាករថ្លៃៗ និងអ្នកចាត់ការទូទៅល្បីឈ្មោះបំផុតនៅលើពិភពលោកដូចជា Pep Guardiola (Manchester City), Jose Mourinho (Manchester United) និង Unai Emery (Arsenal) ជាដើម។

ប្រភពចំណូលធំៗរបស់ក្របខ័ណ្ឌដ៏ល្បីឈ្មោះនេះបានមកពីការលក់សំបុត្រ, សិទ្ធផ្សាយផ្ទាល់, លក់សិទ្ធផ្សាយបន្តទៅជុំវិញពិភពលោក, ការផ្សាយពាណិជ្ជកម្ម និងការដោះដូរកីឡាករជាដើម។ ទស្សនាវដ្ដីដ៏ល្បីឈ្មោះ Forbes បានបង្ហាញពីតម្លៃរបស់ក្លឹបធំ៥នៅអង់គ្លេសនាពេលបច្ចុប្បន្ន៖

#៥ Liverpool

Liverpool គឺជាក្លឹបជោគជ័យមួយរបស់អង់គ្លេសដែលឈរជើងយ៉ាងរឹងមាំនៅក្របខ័ណ្ឌកំពូលតាំងពីយូរណាស់មកហើយ។ Forbes អះអាងថាក្លឹបនេះមានតម្លៃ១,៩៤៤លានដុល្លារនាពេលបច្ចុប្បន្ន និងជាក្លឹបអ្នកមានលំដាប់ទី៨នៅលើពិភពលោក។ កីឡាករល្បីឈ្មោះកាលពីអតីតកាលមាន Steven Gerard, Xabi Alonso, Dirk Kuyt និង Daniel Agger ហើយកីឡាករក៏លេចធ្លោនាពេលបច្ចុប្បន្នគឺ Sadio Mane, Mo Salah, Naby Keita និង Alisson។ Liverpool ធ្លាប់ឈ្នះលីគកំពូល១៨សម័យកាល, ជើងឯក Champions League ៥ដង, FA Cup ៧ដង និងពានជាច្រើនទៀត។

#៤ Chelsea

នៅខែមិថុនាឆ្នាំ២០០៣ មហាសេដ្ឋីរុស្ស៊ីលោក Roman Abramovich បានទិញយក Chelsea ក៏ជាពេលវេលាមួយដែលធ្វើឲ្យក្លឹបមួយនេះទទួលជោគជ័យតាំងពីពេលនោះមក។ Forbes ប៉ាន់ស្មានថា Chelsea អាចមានតម្លៃ ២០៦២លានដុល្លារនាពេលបច្ចុប្បន្ន។ ក្រុមរហស្សនាមថាតោខៀវធ្លាប់ឈ្នះលីគកំពូល៥ដង, Champions League ១ដង និង FA Cup ៨ដង។

#៣Arsenal

Arsenal ក៏មិនខុសពី Liverpool ដែរគឺជាក្លឹបដ៏ជោគជ័យមួយនៅអង់គ្លេសពិសេសជំនាន់លោក Wenger។ ជាជើងឯកលីគអង់គ្លេស១៣សម័យកាល ជើងឯក FA Cup ១៣ដង តែ Arsenal មិនទាន់ស្គាល់ជាតិ Champions League នៅឡើយ។ Forbes ប៉ាន់ស្មានថា Arsenal ដែលមានកីឡដ្ឋានផ្ទាល់ខ្លួនឈ្មោះ Emirates មានតម្លៃ២,២៣៨លានដុល្លារនាពេលបច្ចុប្បន្នឈរលេខរៀងទី៣។

#២ Manchester City

មុនឆ្នាំ២០០៨ ក្រុម Manchester City មិនមែនជាក្លឹបយក្សនៅ Premier League នោះទេ។ ប៉ុន្តែនៅថ្ងៃទី១ ខែកញ្ញាកាលពី១០ឆ្នាំមុនជាពេលវេលាប្រវត្តិសាស្ត្ររបស់ក្លឹបនៅ ពេលដែលមហាសេដ្ឋីអារ៉ាប់ Sheikh Mansour បានទិញក្លឹបនេះយកហើយបានជះលុយផ្លាស់ប្ដូរមុខមាត់ឲ្យ City ក្លាយជាក្លឹបធំដល់បច្ចុប្បន្ន។ ជាជើងឯកអង់គ្លេស ៥ជំនាន់ និង FA Cup ៥ជំនាន់ Forbes វាយតម្លៃថាក្រុមដែលដឹកនាំដោយលោក Pep មានតម្លៃ ២៤៧៤លានដុល្លារលើទីផ្សារនាពេលបច្ចុប្បន្ន។

#១ Manchester United

ចុងក្រោយគេគឺ Manchester United ជាជើងឯកលីគអង់គ្លេស២០សម័យកាល, FA Cup ១២ និង Champions League ៣សម័យកាល។ ក្រុមរហស្សនាមថាបិសាចក្រហម ត្រូវ Forbes វាយតម្លៃថាអាចថ្លៃខ្ទង់៤ពាន់លានដុល្លារថ្លៃជាងគេនៅ Premier League៕

ប្រភព៖ Forbes | Wikipedia | Premier League អត្ថបទ៖ វិរ័ត្ន