អស់ទាស់! ថតស្ប៉តលើកទីមួយនៅថៃ អ៊ុន សិទ្ធា ស៊ីថ្លៃគុណនឹង៥

2018-08-16 03:48:39
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក អ៊ុន សិទ្ធា ត្រូវបានផលិតករនៅប្រទេសថៃចាប់អារម្មណ៍ឲ្យថតស្ប៉តជាមួយតារាថៃស្រីឈ្មោះ ឆុំភូ ដោយមានលោកជាតារាខ្មែរតែម្នាក់គត់ចូលរួម ព្រមទាំងទទួលបានតម្លៃពលកម្មថតខ្ពស់ទៀតផង។

អ៊ុន សិទ្ធា និង តារាថៃ ឆុំ ភូ

ស្ប៉តនោះបានថតបញ្ចប់ហើយ ដោយលោកបានចំណាយពេលទៅទីក្រុងបាងកករយៈពេល៣យប់៤ថ្ងៃ។ អ៊ុន សិទ្ធា បញ្ជាក់ថា ខាងថៃបានធ្វើតេស្តសមត្ថភាពសម្ដែងរបស់លោកជាច្រើនលើក ទម្រាំគេសម្រេចចិត្តជ្រើសរើស។ ដោយសារតែការថតសម្រិតសម្រាំងខ្លាំង និងមានការលំបាកច្រើន ដូច្នេះ លោក ត្រូវកំណត់តម្លៃខ្លួនខ្ពស់បន្តិចហើយ។

តួលេខទឹកប្រាក់ពិតប្រាកដ លោកសុំមិនបង្ហាញ តែ តារាសម្ដែងរូបនេះបង្ហើបថា តម្លៃពលកម្មថតស្ប៉តពាណិជ្ជកម្មនោះ ទទួលបានថ្លៃខ្ពស់ជាងនៅស្រុកខ្មែរ គុណនឹង៥។ នេះមានន័យថា តម្លៃខ្លួនបានពីប្រទេសថៃ យ៉ាងហោចណាស់ក៏ខ្ទង់ម៉ឺនដុល្លារដែរ ព្រោះតួអង្គក្នុងរឿង "សមុទ្រទឹកភ្នែក" ត្រូវគេដឹងថា ស៊ីថ្លៃក្នុងមួយស្ប៉តនៅខ្មែរ យ៉ាងហោចក៏ខ្ទង់ពាន់ដុល្លារដែរ៕

ឱកាសរួមការងារលើកទីមួយជាមួយតារាថៃ បានផ្ដល់នូវបទពិសោធន៍ផ្នែកថតស្ប៉ត ឲ្យលោកយ៉ាងច្រើន ។ លោក បន្តថា បច្ចេកទេសថតរបស់គេមានលក្ខណៈទំនើប និងខុសប្លែកច្រើនពីខាងយើង ដោយគេគិតលើគុណភាពខ្លាំង។ ទម្រាំថតយកមួយប្លង់ៗគេសម្រិតសម្រាំងខ្លាំង ហើយទម្រាំថតចប់ ក៏លំបាកច្រើនដែរ ។ អ្វីដែលពិសេសនោះ ខាងគេឲ្យតម្លៃលើសិល្បករណាស់ ធ្វើឲ្យលោកមានកម្លាំងចិត្តចង់បំពេញការងារ ទោះហត់នឿយខ្លាំងយ៉ាងណាក្ដី៕

ទស្សនាវីដេអូ អ៊ុន សិទ្ធា រៀបរាប់ពីតម្លៃខ្លួន និងដំណើរការនៃការថតស្ប៉តនៅថៃ៖